ஆஸ்திரேலியாவில் ஹோட்டலில் உணவருந்திய 5 இந்திய வீரர்கள் தனிமைப்படுத்தப்பட்டனர்

பதிவு செய்த நாள் : 03 ஜனவரி 2021 18:46

பிரிஸ்பேன்,

ஆஸ்திரேலியாவில் சுற்றுப்பயணம் மேற்கொண்டுள்ள இந்திய வீரர்கள் 5 பேர் கொரோனா விதிமுறைகளை மீறி ஹோட்டலில் உணவருந்தியதால் தனிமைப்படுத்தப்பட்டுள்ளனர்.

ஆஸ்திரேியாவுக்குச் சென்றுள்ள இந்திய அணி டெஸ்ட், ஒருநாள், டி20தொடர்களில் விளையாடி வருகிறது. ஆஸ்திரேலியாவில் கரோனா வைரஸ் பரவல் இருப்பதால், இரு அணி வீரர்களும் பயோ-பபுள் (Bio Bubble) பாதுகாப்பில் இருக்கின்றனர். இதனால், அணியின் குழுவைத் தவிர வெளியே தனியாக எங்கும் செல்லத் தடை விதிக்கப்பட்டுள்ளது.

பயோபபுள் சூழலை மீறி எங்காவது சென்றுவிட்டால், அணிக்குள் கரோனா பரவல் தொற்று ஏற்படும் வாய்ப்பு இருப்பதால், வீரர்கள் தங்கி இருக்கும் ஹோட்டலுக்கும் பலத்த பாதுகாப்பு போடப்பட்டுள்ளது.

இந்நிலையில் புத்தாண்டு தினத்தன்று இந்திய வீரர்கள் ரோஹித் சர்மா, ரிஷப்பந்த், பிரித்விஷா, நவ்தீப் ஷைனி, ஷூப்மான் கில் ஆகிய 5 பேர் பயோ பபுள் சூழலை மீறி ஒரு ஹோட்டலுக்குச் சென்று உணவு சாப்பிட்டு புத்தாண்டைக் கொண்டாடியுள்ளனர்.

அந்த ஹோட்டலுக்கு வந்த இந்திய ரசிகர் நவால்தீப் சிங், இந்திய வீரர்களைப் பார்த்து மகிழச்சி அடைந்து அவர்கள் சாப்பிட்ட உணவுக்கு பணத்தை செலுத்திவிட்டு, செல்பி எடுத்துச் சென்றார்.

இந்தப் புகைப்படத்தையும் சமூக வலைத்தளத்தில் பதிவிட்டு, மகிழ்ச்சியில் ரிஷப்பந்தை கட்டித் தழுவியதாக நவால்தீப் சிங் வெளியி்ட்டார்.

இதையடுத்து, ஆஸ்திரேலிய கிரிக்கெட் வாரியம் வெளியிட்ட அறிக்கையில், “இந்திய மற்றும் ஆஸ்திரேலிய மருத்துவக் குழுவினரின் ஆலோசனையின்படி, புத்தாண்டு தினத்தன்று பயோபபுள் சூழலை மீறி வெளியே சென்ற இந்திய வீரர்கள் ரோஹித் சர்மா, பிரித்வி ஷா, ஷூப்மான் கில், ஷைனி, ரிஷப்பந்த் ஆகியோர் முன்னெச்சரிக்கையாக தனிமைப்படுத்தப்பட்டுள்ளார்கள்” என அறிவித்தது.

குயின்ஸ்லாந்து மாகாணம் அறிவிப்பு

இதற்கிடையே சிட்னி டெஸ்ட் முடிந்தபின் 4-வது டெஸ்ட் போட்டிக்காக இந்திய அணியினர் குயின்ஸ்லாந்து மாகாணத்தில் உள்ள பிரிஸ்பேனுக்கு செல்ல உள்ளனர். ஆனால், குயின்ஸ்லாந்து வரும் மக்கள் கண்டிப்பாக 14 நாட்கள் தனிமைப்படுத்திக்கொள்ள வேண்டும் என மாநில அரசு உத்தரவிட்டுள்ளது.

இந்திய அணியினர் விதிமுறைகளை மீறி செயல்பட்டதுபோல் குயின்ஸ்லாந்திலும் செயல்படக்கூடாது. விதிமுறைகளுக்கு கட்டுப்படாவிட்டால் இங்கு வரவேண்டாம் என அரசு அறிவித்துள்ளது

இதற்கிடையே பிசிசிஐ மற்றும் ஆஸ்திரேலிய கிரிக்கெட் வாரியம் இணைந்து இந்த விவகாரத்தில் விசாரணை நடத்தி வருகின்றன.

இந்திய வீரர்களுடன் செல்பி எடுத்த ரசிகர் நவால்தீப் சிங் டுவிட்டரில் பதிவிட்டுள்ள விளக்கத்தில், “ஹோட்டலில் இந்திய வீரர்களைப் பார்த்த மகிழ்ச்சியில் அவர்களுடன் புகைப்படம் எடுத்தேன். ஆனால், ரிஷப்பந்தை கட்டித்தழுவவில்லை. சமூக விலகலைப் பின்பற்றித்தான் இருந்தோம். தவறான தகவலை முன்பு நான் பதிவிட்டமைக்கு மன்னிப்புக் கோருகிறேன்” எனத் தெரிவித்துள்ளார்