அமெரிக்க தேர்தல் அடையாளம் காட்டிய தமிழர்கள்

பதிவு செய்த நாள் : 18 நவம்பர் 2020

அமெரிக்காவில் கடந்த நவம்பர் 3ம் தேதி நடைபெற்ற அதிபர் தேர்தலில் ஜோ பைடன் அதிபராக தேர்ந்தெடுக்கப்பட்டார்.

இந்த தேர்தல் 3 தமிழர்களை உலகத்துக்கு அடையாளம் காட்டியுள்ளது.

1. கமலா ஹாரிஸ்

2. டாக்டர் விவேக் மூர்த்தி

3. செலின் ராணி கவுண்டர்

முதல் இரண்டு பேர்களை பற்றி தமிழகத்தில் ஏராளமான செய்திகள் வெளியாகி உள்ளன.

மூன்றாவதாக உள்ள செலின் ராணி கவுண்டர்  மருத்துவம் சமூக சேவை என வெளி உலகுக்கு வராமல் ஒசையில்லாமல் உயர்ந்தவர்.

கொரோனாவை கட்டுப்படுத்த வழிகாட்டும் குழு ஒன்றை அமைத்துள்ளார் ஜோ பைடன். அதில் 13 பேர் உறுப்பினர்களாக உள்ளனர். அதில் மூன்று பேர் அக் குழுவுக்கு தலைமை தாங்குகிறார்கள். அவர்களில் ஒருவர் இந்திய வம்சாவளியைச் சேர்ந்த டாக்டர் விவேக் மூர்த்தி. மேலும் அக் குழுவின் உறுப்பினராக ஈரோட்டை பூர்விகமாக கொண்ட செலின் ராணி கவுண்டர் என்ற மருத்துவரையும் தேர்வு செய்துள்ளார் ஜோ பைடன்.

பிரின்ஸ்டன் பல்கலைக்கழகத்தில் செலின் மூலக்கூறு உயிரியல் படித்தவர் அதே பல்கலைக்கழகத்தில் தொற்றுநோய் துறையில் முதுகலை பட்டம் பெற்றார். அதன் பின்னர் வாஷிங்டன் பல்கலைக்கழகத்தில் எம்.டி., படிப்பு ஜான்ஸ் ஹாப்கின்ஸ் பல்கலைக்கழகத்தில் தொற்றுநோய்கள் தொடர்பாக  ஆராய்ச்சி மேற்கொண்டு முனைவர் பட்டம் பெற்றிருக்கிறார். அமெரிக்காவின் காசநோய்த் தடுப்புப் பிரிவின் உதவி இயக்குநராக பணியாற்றினார். தற்போது நியூயார்க் பல்கலைக்கழகத்தின் கிராஸ்மேன் மருத்துவக் கல்லூரியில் உதவி பேராசிரியராக இருக்கிறார்.

செலின் அமெரிக்காவின் மருத்துவத் துறையில் எந்த பயனும் பாராமல் பணியாற்றியதன் விளைவாக அமெரிக்காவின் புதிய அதிபராக தேர்ந்தெடுக்கப்பட்டுள்ள ஜோ பைடனின் கொரோனா ஒழிப்புக் குழுவில் இடம்பெற்றுள்ளார். இவரின் பூர்விகம் ஈரோடு மாவட்டத்திலுள்ள ஒரு குக்கிராமம் என கேள்விப்படும்போது தமிழராகிய நமக்கு பெருமைதான்.

ஈரோடு மாவட்டம் மொடக்குறிச்சி பேரூராட்சிக்கு அருகிலுள்ள பெருமாபாளையம் செலின் ராணி கவுண்டரின் பூர்விக்க் கிராமம். இக்கிராமத்தில் வாழ்ந்த திருமலை -சின்னம்மாள் தம்பதியருக்கு செங்கோட்டையன், சுப்பையன், சின்னப்பையன், நடராஜன் என நான்கு மகன்கள். இதில் கடைசி மகன் நடராஜன் (எ) ராஜ் கவுண்டரின் மகள்தான் செலின் ராணி கவுண்டர்.

ராஜ் கவுண்டர் பெருமாபாளையம் மற்றும் ஈரோட்டில் பள்ளிப் படிப்பையும், திருச்சி செயின்ட் ஜோசப் கல்லூரியில் இளங்கலை பட்டத்தையும் பெற்றார். அதன் பின்னர் பெங்களூரிலுள்ள இந்தியன் இன்ஸ்டிட்யூட் ஆப் சயின்ஸ் நிறுவனத்தில் மாஸ்டர் டிகிரி முடித்தார். அவருக்கு அமெரிக்காவிலுள்ள போயிங் விமான நிறுவனத்தில் வேலை கிடைத்ததால் அங்கு பணியாற்ற 1966ல் சென்றார். தன் பணித் திறமையால் அந் நிறுவனத்தின் இயக்குநர்களில் ஒருவராக வளர்ந்தார். பின்னர் அமெரிக்காவில் வசித்த பிரான்ஸ் பெண்ணை காதலித்து திருமணம் செய்துகொண்டார். இவர்களுக்கு மூன்று மகள்கள். அவர்களில் மூத்தவர்தான் செலின்.

செலினுக்கு பூர்விகம் பெருமாபாளையம் என்றாலும் பிறந்தது, வளர்ந்தது, படித்தது எல்லாமே அமெரிக்காதான்.

செலினை பற்றி அறிவதற்காக அவரது பெரியப்பா மகன் தங்கவேலிடம் பேசினோம். இவர் தமிழ்நாடு குடிநீர் வடிகால் வாரியத்தில் செயற்பொறியாளராக பணியாற்றி ஓய்வு பெற்றவர். "செலின் அமெரிக்காவின் புதிய அதிபரின் வழிகாட்டும் குழுவுக்கு தேர்வு செய்யப்பட்டுள்ளார் என்பதை கேள்விப்பட்டதும் பெருமாபாளையம் கிராம மக்கள் பெரும் உற்சாகத்தில் இருக்கிறார்கள்.

செலினும் மக்களுக்கு சேவை செய்யவேண்டும் என்பதற்காக காசநோய் போன்ற தொற்றுநோய்களுக்குச் சிகிச்சை அளிக்கும் தொற்றுநோயியல் துறை கையிலெடுத்தார். 1998 முதல் 2012 வரை தென் ஆப்பரிக்கா, மால்வாய், எத்தோப்பியா, பிரேசில் போன்ற நாடுகளில் காசநோய் மற்றும் ஹெச்.ஐ.வி பாதித்தவர்களுக்கு மருத்துவம் அளித்ததோடு இல்லாமல் அதை பற்றிய ஆராய்ச்சிகளையும் மேற்கொண்டார்.

செலின் இதுவரை நான்குமுறை பூர்விக கிராமமான மொடக்குறிச்சிக்கு வந்துள்ளார். இவர் அவரது அப்பா பெயரில் ராஜ் பவுண்டேஷன் என்ற ஓர் அறக்கட்டளை அமைத்து இருக்கிறார். இதன் மூலம் அவர் அப்பா படித்த தற்போதைய மொடக்குறிச்சி அரசு ஆண்கள் மேல்நிலைப் பள்ளிக்கு 10 லட்சம் ரூபாய் வரை உதவி புரிந்துள்ளார். அதோடு இல்லாமல் இப்பள்ளியில் ஒவ்வொரு ஆண்டும் பொதுதேர்வில் பத்து, பதினோன்று மற்றும் பன்னிரண்டாம் வகுப்புகளில் முதல் மதிப்பெண் பெறும் மாணவர்களுக்கு தலா 20 ஆயிரம் ரூபாயை பரிசளிக்கிறார். கடைசியாக 2018ம் ஆண்டு கிராமத்திற்கு வந்தபோது இப்பள்ளியில் நடைபெற்ற சுதந்திர தின விழாவில் கலந்துகொண்டார். இப்பள்ளியில் ஸ்மார்ட் கிளாஸ் அமைக்க இரண்டு லட்ச ரூபாயை அளித்தார்.

செலின் பூர்விக கிராமத்திற்கு வரும்போதெல்லாம் உறவினர்கள் வீடு, கோயில், விவசாய நிலம் ஆகிய இடங்களுக்கு செல்வார். உறவினர்களோடு பாசமாகப் பேசுவார். அவருக்கு இட்லி, தோசை மற்றும் இந்திய உணவுகளின் மீது பிரியம். அமெரிக்காவில் வாழ்ந்தாலும் பூர்விக கிராமத்தின் மீதும் இந்தியாவின் மீதும் எப்போதும் பெரும் பாசம் கொண்டவர்" என்கிறார் தங்கவேல்.

கொரோனாவைக் கட்டுப்படுத்தும் சிறப்புக் குழுவில் செலின் இடம்பெற்றதையடுத்து பலரும் செலினுக்கு வாழ்த்துகளைப் பகிர்ந்து வருகின்றனர்.

கூடவே, செலின் ராணி கவுண்டர் என தன் சாதிப்பெயரை ஏன் இன்னும் வைத்திருக்கிறார் என்ற விமர்சனங்களும் எழுந்துவருகின்றன. இதற்கு தன் டுவிட்டர் பக்கத்தில் விளக்கம் அளித்துள்ள செலின், ``ஏன் நான் என் பெயரின் பின்பு என் சாதிப் பெயரை குறிப்பிடுகிறேன் என்று பலரும் என்னிடம் கேட்கிறார்கள். என் அப்பா அமெரிக்காவுக்கு 1960-களில் குடிபெயர்ந்தார். `நடராஜன்' என்பதை உச்சரிப்பது அமெரிக்கர்களுக்கு சிரமமாக இருந்தது. `கவுண்டர்' என்பது அவர்கள் சொல்ல எளிமையாக இருந்தது. எனவே 1970-களில், அதாவது நான் பிறக்கும் முன்பே அவரது பெயரை கவுண்டர் என மாற்றிக்கொண்டார். கொஞ்சம் வலிதருவதாக இருந்தாலும், அது என் வரலாற்றுடனும் அடையாளத்துடனும் தொடர்புடையது. என் பெயர் என்பது என்னுடையது. அதை நான் திருமணத்தின் போதும் மாற்றவில்லை. இப்போதும் மாற்றமாட்டேன்" என விளக்கம் அளித்திருக்கிறார்.

2017ம் ஆண்டில் பீப்பிள் பத்திரிக்கை சார்பில் தேர்வு செய்யப்பட்ட உலகின் மாற்றத்திற்கான 25 சிறந்த பெண்களின் பட்டியலில் செலினும் இடம்பிடித்துள்ளார்.


கட்டுரையாளர்: குட்டிக்கண்ணன்





உங்கள் கருத்தைப் பதிவு செய்ய :


Your comment will be posted after the moderation