அரசுப்பள்ளி மாணவருக்கு மருத்துவபடிப்புகளில் 7.5% உள் இட ஒதுக்கீடு: பேரவையில் மசோதா நிறைவேறியது

பதிவு செய்த நாள் : 15 செப்டம்பர் 2020 14:46

சென்னை

தமிழ்நாடு அரசுப் பள்ளி மாணவர்களுக்கு மருத்துவப் படிப்புகளில் 7.5 சதவிகிதம் உள் இட ஒதுக்கீடு வழங்கும் மசோதா தமிழக சட்டப்பேரவையில் இன்று நிறைவேறியது.

 முதலமைச்சர் எடப்பாடி கே. பழனிசாமி முன்னதாக தமிழக சட்டப் பேரவையில் இன்று 7.5 சத வீத உள்ஒதுக்கீட்டுக்கான மசோதாவை தாக்கல் செய்தார். 

நீட் தேர்வில் தேர்ச்சி பெறும் அரசுப் பள்ளி மாணவர்களுக்கு மருத்துவப் படிப்பில் உள் இட ஒதுக்கீடு வழங்கும் அவசரச் சட்டம் கொண்டுவர தமிழ்நாடு அமைச்சரவை கடந்த ஜூன் மாதம் ஒப்புதல் அளித்துள்ளது.

அரசுப் பள்ளி மாணவர்களுக்கு மருத்துவப்படிப்புகளில் 7.5 சதவிகிதம் உள் இட ஒதுக்கீடு வழங்கும் சட்ட மசோதா சட்டப் பேரவையில் இன்று தாக்கல் செய்யப்பட்டது.

முதலமைச்சர் எடப்பாடி பழனிசாமி இந்த மசோதாவை தாக்கல் செய்தார்.

மருத்துவப் படிப்புகளில் தமிழக மாணவர்களுக்கு இதன்மூலமாக முன்னுரிமை அளிக்கப்படும் என்றும்

நடப்பு கல்வியாண்டு முதல் இது அமலுக்கு வரும் என்றும் முதலமைச்சர் பழனிசாமி தகவல் தெரிவித்துள்ளார்.

எம்பிபிஎஸ் படிப்பில் அரசுப் பள்ளி மாணவர்களுக்கு 10 சதவீத இடங்களை ஒதுக்கலாம் என கலையரசன் குழு பரிந்துரைத்திருந்தது குறிப்பிடத்தக்கது.


மாணவர்களுக்கு 7.5 சதவீத இடஒதுக்கீடு குறித்து முதலமைச்சர் பதிலுரை

அரசு பள்ளிகளில் பயிலும் மாணவர்கள், மருத்துவம் மற்றும்  பல் மருத்துவ கல்லூரிகளில் சேருவதற்கான இடஒதுக்கீடு சட்ட முன்வடிவு  மீதான விவாதத்திற்கு  முதலமைச்சர் எடப்பாடி கே. பழனிசாமி இன்று (15.9.2020) சட்டமன்றப் பேரவையில், பதிலளித்தார். அவர் ஆற்றிய பதிலுரை:

தமிழ்நாடு அரசு பள்ளிகளில் பயிலும் மாணவர்கள், மருத்துவம் மற்றும் பல் மருத்துவ கல்லூரிகளில் சேருவதற்கான இடஒதுக்கீட்டு முறையினை கொண்டுவருதல் குறித்த சட்டம் நிறைவேற்றப்படும் என நான் அறிவித்ததற்கிணங்க தற்பொழுது இச்சட்ட முன்வடிவு தாக்கல் செய்யப்பட்டு, அதன் மீது உறுப்பினர்கள் தங்களது கருத்துக்களை தெரிவித்துள்ளனர்.  இது சம்பந்தமாக என்னுடைய கருத்துக்களை தெரிவிக்க விரும்புகிறேன்:-

·     1993ஆம் ஆண்டு 69 சதவிகிதம் இட ஒதுக்கீட்டினை தொடர்ந்து செயல்படுத்தும் வகையில், உரிய சட்டத்தினை இயற்றி, அரசமைப்புச் சட்ட 9வது விவர அட்டவணையில் சேர்த்து, அதற்கு அரசமைப்பு சட்டம் 31(பி)ன் கீழ் பாதுகாப்பினையும் பெற்றுத் தந்தவர், சமூக நீதி காத்த வீராங்கனை அம்மா அவர்கள்தான்.  அவரால்தான் தமிழ்நாட்டில் தற்போது கல்வி மற்றும் வேலை வாய்ப்பில் 69 சதவிகிதம் இட ஒதுக்கீடு சாத்தியமாகி உள்ளது. 

·     அம்மாவின் அரசு, அரசுப் பணிகளில் நியமனங்கள் மற்றும் கல்வி நிலையங்களில் மாணாக்கர் சேர்க்கை ஆகியவற்றிற்கான இட ஒதுக்கீட்டை செயல்படுத்தி, சமூக நீதியை காப்பதுடன், பிற்படுத்தப்பட்ட, ஏழை எளிய மக்கள் நலனை காப்பதிலும் முன்னோடி அரசாக உள்ளது என்பதை தமிழ்நாட்டு மக்கள் நன்கு அறிவர்.

·     2006 - 2007ஆம் ஆண்டிலிருந்து 2010 - 2011ஆம் ஆண்டு வரை நடைபெற்ற ஆட்சியின் பொழுது புதிதாக 300 மருத்துவ பட்டப்படிப்பு இடங்கள் மட்டுமே உருவாக்கப்பட்டன.  அம்மா அவர்களும், அதனைத் தொடர்ந்து அம்மாவின் அரசும், 6 புதிய அரசு மருத்துவக் கல்லூரிகளை ஆரம்பித்ததன் மூலம், புதியதாக 700 மருத்துவ பட்டப்படிப்பு இடங்களை உருவாக்கியும், 9 அரசு மருத்துவக் கல்லூரிகளில் கூடுதலாக 700 மருத்துவ பட்டப்படிப்பு இடங்களை அதிகரித்தும், ஆக மொத்தம் 1,400 புதிய மருத்துவ பட்டப்படிப்பு இடங்களை கடந்த 9 ஆண்டுகளில் உருவாக்கியுள்ளது.  2010 - 2011ல் 1945ஆக இருந்த மருத்துவ பட்டப்படிப்பு இடங்கள், தற்போது 3,345 ஆக உயர்ந்துள்ளது. 

·     இதைத் தொடர்ந்து, அதிக அளவில் தமிழ்நாட்டைச் சார்ந்த கிராமப்புற மற்றும் பொருளாதாரத்தில் பின் தங்கியுள்ள மாணவர்களின் மருத்துவர் ஆகும் கனவை நனவாக்கும் விதமாக, அம்மாவின் அரசு, குறுகிய காலத்தில் ராமநாதபுரம், விருதுநகர், திண்டுக்கல், நீலகிரி, அரியலூர், நாகப்பட்டினம், கள்ளக்குறிச்சி, திருவள்ளூர், திருப்பூர், நாமக்கல், கிருஷ்ணகிரி ஆகிய 11 மாவட்டங்களில் புதிய மருத்துவக் கல்லூரிகள் அமைப்பதற்கு மத்திய அரசின் ஒப்புதலை பெற்று, அவை அனைத்துக்கும் அடிக்கல் நாட்டப்பட்டு, கட்டுமானப்  பணிகள் நடைபெற்று வருகின்றது. இதன் மூலம் வரும் ஆண்டுகளில் கூடுதலாக  1,650  மருத்துவ பட்டப்படிப்பு இடங்கள் உருவாக்க நடவடிக்கை எடுக்கப்பட்டுள்ளது என்பதை இந்த நேரத்தில் தெரிவித்துக் கொள்கிறேன்.

·     அம்மா அவர்களும், அம்மாவின் அரசும், ஏழை எளிய மாணவர்கள், குறிப்பாக, கிராமப்புற மாணவர்கள் மருத்துவ கல்வி பயில்வதற்கு தடையாக இருக்கும் ‘நீட்’ தேர்வினை ரத்து செய்ய வேண்டுமென்று தொடர்ந்து வலியுறுத்தி வருகின்றது.  அம்மாவின் அரசு ‘நீட் தேர்வை’ நடத்தக் கூடாது என்று கொள்கை அளவிலும், சட்ட ரீதியாகவும் தொடர்ந்து எதிர்த்து வருகின்றது.  

·     எனவே, அம்மாவின் அரசு, நீட் தேர்விற்கு எதிரான சட்டப் போராட்டத்தினை தொடர்ந்து நடத்தும் என்பதை இம்மாமன்றத்தில் உறுதிபட தெரிவித்துக் கொள்கிறேன்.

·     நான் 21.3.2020 அன்று சட்டப் பேரவையில் 110 விதியின் கீழ், அரசுப் பள்ளிகளில் பயிலும் மாணவர்கள் மருத்துவ படிப்பில் இடம் கிடைக்காமல் தொடர்ந்து பாதிப்புக்கு உள்ளாகக் கூடாது என்ற நோக்கத்தில்தான் அவர்களுக்கு உள் ஒதுக்கீடு வழங்கப்படும் என அறிவித்தேன்.  இது சம்பந்தப்பட்ட அனைத்து புள்ளி விவரங்களையும் தொகுத்து உரிய பரிந்துரையையும் தமிழ்நாடு அரசுக்கு வழங்க, ஓய்வு பெற்ற உயர்நீதிமன்ற  நீதியரசர் திரு. பி.கலையரசன் அவர்களின் தலைமையின் கீழ் 21.3.2020 அன்றே ஒரு ஆணையம் அமைக்கப்பட்டது.

·     அவ்வாணையம் கடந்த 8.6.2020 அன்று தனது பரிந்துரையை தமிழ்நாடு அரசுக்கு சமர்ப்பித்தது.

·     இந்த அறிக்கையின்படி, தமிழ்நாடு அரசுப் பள்ளிகளில் பயிலும் மாணவர்கள், சமூக, பொருளாதார நிலையில் மிகவும் பின்தங்கியவர்கள் என்பதும், அவர்களை பிற மாணவர்களுடன் ஒரே நிலையில் ஒப்பிட்டு தேர்வில் வகைப்படுத்துவது சமநீதிக்கு முரணானது என்றும், அதனால் அவர்களுக்கு உள் ஒதுக்கீடு வழங்குவதே சமநீதியை நிலைநாட்ட வகை செய்யும் என்றும் ஆணையம் பரிந்துரை செய்தது.

·     மேலும், அரசு பள்ளிகளில் பயின்று, தேசிய தகுதி மற்றும் நுழைவுத் தேர்வில் தகுதி பெற்ற மாணவர்களுக்கு, அனைத்து இளநிலை மருத்துவப் பிரிவுகளிலும் உள்இட ஒதுக்கீடு வழங்கிட ஏதுவாக ஒரு சிறப்பு சட்டம்  இயற்றிட  அவ்வாணையம் பரிந்துரைத்தது.

·     கடந்த 15.6.2020 மற்றும் 14.7.2020 அன்று தமிழ்நாடு அமைச்சரவைக் கூட்டத்தில், ஆணையத்தின் பரிந்துரை விவாதிக்கப்பட்டு, அதற்கு ஒப்புதல் அளிக்கப்பட்டது.

·     அதன் அடிப்படையில், இந்த ஆண்டு முதல், மருத்துவ படிப்பில் உள் ஒதுக்கீடாக 7.5 விழுக்காடு வழங்க அம்மாவின் அரசு முடிவு செய்து, அதையே சட்டமாக்க இந்த வரலாற்று சிறப்பு மிக்க சட்ட முன்வடிவினை அறிமுகம் செய்து, ஆய்வு நிலையில் உறுப்பினர்கள் தங்கள் கருத்துக்களை தெரிவித்திருக்கிறார்கள்.

·     தமிழ்நாட்டில் 7,968 மேல்நிலைப் பள்ளிகளில், 3,054 பள்ளிகள், தமிழ்நாடு அரசின் சார்பில், நடத்தப்பட்டு வருகின்றன.  இது 38.32 சதவீதமாகும். 

தமிழ்நாட்டில் +2 பயிலும் 8 லட்சத்து 41 ஆயிரத்து 251 மாணவர்களில், 3 லட்சத்து 44 ஆயிரத்து 485 மாணவர்கள் தமிழ்நாடு அரசுப் பள்ளிகளில் பயில்கின்றனர்.  இது 41 சதவீதமாகும். 

தமிழ்நாட்டில் உள்ள அரசு மற்றும் தனியார் மருத்துவ கல்லூரிகளில் உள்ள 5,550 மொத்த மருத்துவ இடங்களில், மாநில அரசின் ஒதுக்கீடாக 4,043 இடங்கள் உள்ளன.  இவற்றில் தமிழ்நாடு அரசுப் பள்ளிகளில் பயிலும் ஏழை எளிய மாணவர்களில் 0.15 சதவீதம் மாணவர்களுக்கு மட்டுமே மருத்துவப் பட்டப்படிப்பு இடங்கள் கிடைக்கின்றன.  

அரசு பள்ளி மாணவர்களும், தனியார் பள்ளிகளில் பயிலும் மாணவர்களும் வெவ்வேறு சமூக பொருளாதார பின்னணியை கொண்டவர்கள்.  இவர்கள்  கற்கும் பள்ளி, வளரும் வீட்டுச் சூழல், பெற்றோர் வருமானம் போன்றவற்றில் வேறுபாடுகள் உள்ளன.  எனவே, இவர்களை சமநிலையில் வைத்து பார்ப்பது சமநீதிக்கு எதிரானது.

தமிழ்நாடு அரசு பள்ளியில் பயிலும் மாணவர்கள் நீட் தேர்வில் தேர்ச்சி பெற்றாலும், மதிப்பெண் தரவரிசை அடிப்படையில் அவர்களுக்கு உரிய அளவுக்கு மருத்துவ இடம் கிடைப்பதில்லை. எனவேதான், தமிழ்நாடு அரசு பள்ளியில் பயிலும் மாணவர்களுக்கு தனியாக உள் ஒதுக்கீடு அவசியமாகிறது என்பதை இத்தருணத்தில் தெளிவுபடுத்தக் கடமைப்பட்டுள்ளேன்.

·     தற்போதுள்ள மருத்துவ பட்டப்படிப்பு இடங்களில், இந்த 7.5 சதவீதம் உள் ஒதுக்கீடு வழங்குவதால், சுமார் 300க்கு மேல் இடங்கள் ஏழை எளிய மாணவர்களுக்கு இதன் மூலம் சம நீதி வழங்க இது வழிவகுக்கும். 

     தேசிய தகுதி மற்றும் நுழைவுத் தேர்வில் தேர்ச்சி பெற்ற தமிழ்நாடு அரசு பள்ளி மாணாக்கர்கள், அதாவது ஊராட்சி ஒன்றிய ஆரம்ப மற்றும் நடுநிலைப் பள்ளிகள் உட்பட / நகராட்சி / மாநகராட்சி /ஆதி திராவிடர் நலன் / பழங்குடியினர் நலன் / பிற்படுத்தப்பட்ட மற்றும் மிகவும் பிற்படுத்தப்பட்ட, கள்ளர் சீர்மரபினர் /  மாற்று திறனாளிகள் நலன் / வனம் / சமூக பாதுகாப்பு (சிறார் சீர்திருத்தப் பள்ளிகள்) ஆகிய துறைகளின் கீழ் செயல்படும் பள்ளிகளில் ஆறாம் வகுப்பு முதல் பன்னிரெண்டாம் வகுப்பு வரை பயின்ற மாணாக்கர்கள்  மற்றும் இலவச மற்றும் கட்டாய கல்வி உரிமை சட்டம் (RTE), 2009-ன் கீழ் ஆறாம் வகுப்பு முதல் எட்டாம் வகுப்பு வரை பயின்று, பின்னர் 12ஆம் வகுப்பு வரை அரசுப் பள்ளிகளில் பயிலும் மாணாக்கர்களுக்கு,

·     மருத்துவம், பல் மருத்துவ மற்றும் இந்திய மருத்துவ பட்டப்படிப்பு சேர்க்கையின் போது மாநில ஒதுக்கீட்டில்  7.5 விழுக்காடு உள்ஒதுக்கீடு (horizontal reservation) வழங்கவும்,

·     மேற்படி இடஒதுக்கீட்டு முறையினை நீட் தகுதியின் அடிப்படையில் உள்ள அனைத்து பிரிவுகளுக்கும் (Courses) விரிவாக்கம் செய்யவும்,

·     மேலும்,  மேற்படி இட ஒதுக்கீட்டு முறையினை, அனைத்து மருத்துவம், பல் மருத்துவம், இந்திய மருத்துவம் மற்றும் ஓமியோபதி உள்ளடக்கிய அனைத்து அரசு கல்லூரிகளுக்கும் மற்றும் சுயநிதி கல்லூரிகளுக்கு அரசால் ஒதுக்கப்பட்ட அனைத்து பிரிவு இடங்களுக்கும் பின்பற்றும் வகையிலான முறையில் இச்சட்ட முன்வடிவு வைக்கப்பட்டுள்ளது. 

·     இந்தச் சட்ட முன்வடிவை அனைத்து சட்டமன்ற உறுப்பினர்களும் ஒருமனதாக நிறைவேற்றித் தர வேண்டுமென்று மாண்புமிகு பேரவைத் தலைவர் அவர்கள் வாயிலாகக் கேட்டுக் கொண்டு அமைகிறேன்.

இவ்வாறு, முதலமைச்சர் எடப்பாடி கே. பழனிசாமி தனது உரையில் தெரிவித்துள்ளார். அதைத் தொடர்ந்து மசோதா நிறைவேற்றப்பட்டது.