அண்ணா பல்கலை. துணைவேந்தர் சூரப்பாவை பதவி நீக்கம் செய்ய முதலமைச்சர் தனிப்பிரிவுக்கு மனு

பதிவு செய்த நாள் : 20 ஆகஸ்ட் 2020 19:15

சென்னை,

அண்ணா பல்கலைக்கழகத்தின் துணைவேந்தர் சூரப்பாவை பதவி நீக்கம் செய்ய வேண்டுமென ஆசிரியர்கள் கூட்டமைப்பு முதலமைச்சர் தனிப்பிரிவுக்கு கோரிக்கை மனு விடுத்துள்ளது

இது குறித்து  அண்ணா பல்கலைக்கழகத்தின் ஆசிரியர் கூட்டமைப்பு நிறுவனர் கார்த்திக் தமிழ்நாடு முதலமைச்சரின் தனிப்பிரிவுக்கு அனுப்பிய மனுவில் கூறியிருப்பதாவது

அண்ணா பல்கலைக்கழகத்தில் பல லட்சம் மாணவர்களுக்கு தேர்வு நடத்தாமல் தேர்வு கட்டணம் வசூல் செய்யப்பட்டுள்ளது. மாணவரின் பாதுகாப்பிற்காக தமிழ்நாடு அரசு தேர்வு விலக்கு அளித்ததை கொச்சைப்படுத்தும் விதமாக அண்ணா பல்கலையின் நடவடிக்கை உள்ளது. அவ்வாறு 100 கோடி ரூபாய்க்கு மேல் தேர்வுக்கட்டணம் வசூல் செய்தது சரி என்றால், சுமார் 50,000 ஆசிரியர்களுக்கு தேர்வின் ஆய்வாளர் படி, தேர்வு நடத்துனர் படி, விடைத்தாள் திருத்தும் படி, வினாத்தாள் மற்றும் விடைத்தாள் உருவாக்கும் படி போன்றவை ஏன் வழங்கப்படவில்லை.

சென்ற செமஸ்டர் விடைத்தாள் திருத்தத்திற்கு சுமார் 20,000 ஆசிரியருக்கு 10 சதவிகித வருமான வரி பிடித்தம் செய்த பல்கலைக்கழகம், இந்த செமஸ்ட்டருக்கு மேலேயுள்ள எந்த படிகளையும் வழங்காமல் சுமார் 50 கோடி ரூபாய் ஏமாற்றிவிட்டது.

மேலும் ஆய்வே நடக்தாமல் 8,000 ஆராய்ச்சி மாணவரிடம் செமஸ்டர் கட்டண வசூல், சென்னை உயர்நீதிமன்ற உத்தரவு படி 60 சதவிகித கட்டண விலக்கு அளிக்காமல் சுமார் 3,000 பல்கலைக்கழக மாணவருக்கு செமஸ்டர் கட்டணம் வசூல், என்று அண்ணா பல்கலைக்கழகம் முறைகேடான வசூல் வேட்டையில் இறங்கி உள்ளது.

 இந்த முறைகேடுகளை உடனே களைய வேண்டும். மேலும், துணை வேந்தர் சூரப்பாவால் அண்ணா பல்கலைக்கழக நிர்வாகத்தை திறம்பட நடத்த இயலவில்லை என்பதால் அவரை பணியில் இருந்து விடுவிக்க வேண்டும் என்று அந்த மனுவில் குறிப்பிடப்பட்டுள்ளது.