பிளஸ் 2 இறுதி தேர்வு எழுதாத மாணவர்களுக்கு 27ம் தேதி தேர்வு: 13, 17 தேதிகளில் ஹால் டிக்கெட் அமைச்சர் செங்கோட்டையன் அறிவிப்பு

பதிவு செய்த நாள் : 08 ஜூலை 2020 21:29

சென்னை, 

கடந்த மார்ச் 24ம் தேதி பிளஸ் 2 இறுதித் தேர்வு எழுத முடியாத மாணவர்கள் ஜூலை 27 ம்தேதி  எழுதலாம் என்று தமிழ்நாடு அரசு அறிவித்துள்ளது.

இது குறித்து பள்ளிக்கல்வித்துறை அமைச்சர் செங்கோட்டையன் வெளியிட்ட அறிக்கை

தமிழ்நாட்டில் 2019-20ஆம் கல்வியாண்டிற்கான பிளஸ் 2 (+2) பொதுத்தேர்வு கடந்த மார்ச் மாதம் நடத்தி முடிக்கப்பட்டது, மார்ச் 24 ம்தேதி நடத்தப்பட்ட பிளஸ் 2 இறுதிநாள் தேர்வில்  சில மாணவர்கள் தேர்வு எழுத முடியாத சூழ்நிலை ஏற்பட்டதாக பெற்றோர் மற்றும் மாணவர்கள் விடுத்த கோரிக்கையை முதல்வர் எடப்பாடி பழனிசாமி கனிவுடன் பரிசீலனை செய்து மார்ச் 24 ம்தேதி தேர்வு எழுத முடியாத மாணவர்களுக்கு மட்டும் தனியாக வேறொரு நாளில் தேர்வு நடத்தப்படும் என்று அறிவித்தார், அதன்படி இத்தேர்வு ஜூலை 27 ம்தேதி நடத்த தமிழக அரசு முடிவு செய்துள்ளது,

மாணவர்கள் அவர்தம் சொந்த பள்ளிகளிலேயே தேர்வு எழுத தேர்வு மையங்கள் அமைக்கப்படும், இத்தேர்வுக்கான புதிய நுழைவு சீட்டுகளை மாணவர்கள் தாங்களே   என்ற இணையதளம் வாயிலாகவோ அல்லது அவரவர் பள்ளிகளிலோ பதிவிறக்கம் செய்து வரும் ஜூலை 13 மற்றும் 17 தேதிகளில் பெற்றுக்கொள்ளலாம்,  தனித்தேர்வர்கள் தங்களது நுழைவுச்சீட்டுகளை  இத்தேதிகளில் சம்பந்தப்பட்ட தனித்தேர்வு மையங்களில் சென்று பெற்றுக்கொள்ளலாம்,

தேர்வு மையங்களுக்கு மாணழர்கள் செல்வதற்காக தேவைக்கேற்ப போக்குவரத்து வசதிகள் செய்து தரப்படும்,  நோய் கட்டுப்பாட்டு பகுதிகளில் தேர்வு மையங்கள் அமைக்கப்படாது,  நோய்க்கட்டுப்பாட்டு பகுதிகளில் வசிக்கும் தேர்வர்கள்  எவரேனும்  இருப்பின் அவர்கள் தேர்வு மையங்களில் தனி அறைகளில் தேர்வு எழுத அனுமதிக்கப்படுவர் அரசு வெளியிட்டுள்ள கோவிட் 19 நோய்த்தொற்று கட்டுப்பாடு தொடர்பான நிலையான செயல்பாட்டு விதிமுறைகள் அனைத்தும் இத்தேர்வு நடத்துவதில் பின்பற்றப்படும், என்று அந்த அறிக்கையில் அமைச்சர் செங்கோட்டையன் தெரிவித்துள்ளார்,