லாக்அப் மரணம்: போலீசுக்கு வாழ்நாள் சிறை தண்டனை வழங்க - மத்திய அரசுக்கு தி.மு.க. கடிதம்

பதிவு செய்த நாள் : 04 ஜூலை 2020 16:36

புதுடில்லி, 

விசாரணைக்கு அழைத்து செல்லும்போது போலீசாரின் அத்துமீறிய தாக்குதல்களால் அப்பாவி பொதுமக்கள் உயிரிழக்க நேரிடும்போது சம்பந்தப்பட்ட போலீசாருக்கு ஆயுள்காலம் முழுவதும் சிறைத்தண்டனை வழங்க வகை செய்யும் சட்டத்தை நிறைவேற்ற வேண்டும் என்று மத்திய அரசுக்கு தி.மு.க. கடிதம் அனுப்பி உள்ளது.

மத்திய உள்துறை அமைச்சர் அமித் ஷாவுக்கு  தி.மு.க  கோரிக்கை ஒன்றை விடுத்துள்ளது. உடனடி நடவடிக்கை எடுக்கவும் வலியுறுத்தியாக கூறப்படுகிறது. இது குறித்த செய்தி இதோ:-

உள்துறை அமைச்சர் அமித் ஷாவுக்கு தி.மு.க.எம்.பி. ஆ.ராசா ஒரு கடிதம் அனுப்பி உள்ளார். அதில் கூறி  இருப்பதாவது:

     சட்டத்தின் ஆட்சி நடைபெறும் நம் நாட்டில், காவல்நிலைய விசாரணைகளின்போது 'லாக் அப்' மரணங்கள் இன்னமும் நிகழ்ந்து கொண்டிருப்பது, மிக துரதிர்ஷ்டவசமானது. கைது செய்யும் போதும், அதன்பின் விசாரணை நடத்தும்போதும், போலீசார் எவ்விதமான வழிமுறைகளை கையாள வேண்டுமென்ற விதிகள் வகுக்கப்பட்டு, அவை சட்டமாக உள்ளது.சட்டத்தின் கீழ் கைது செய்யும் உரிமை, போலீசாருக்கும் இருப்பதைப்போல தன் மீது மனித உரிமை மீறல்கள் நடக்காதபடி, தன்னை காத்துக் கொள்வதற்கான உரிமை, கைதானவருக்கும் உள்ளது.

     இதற்காக 1994ல் தாக்கலான, சட்டக் கமிஷனின் 152வது அறிக்கையில், குற்றவியல் சட்ட நடைமுறைகள் குறித்து, பல்வேறு பரிந்துரைகள் செய்யப்பட்டு உள்ளன, அதற்கேற்ப பார்லிமெண்டிலும் திருத்தம் கொண்டு வரப்பட்டது. அதன்பின்பும் சித்ரவதைகள் தொடரவே, நீதிபதி சவுகான் தலைமையிலான சட்டக் கமிஷனின், 273வது அறிக்கையின் படி, புதிய பரிந்துரைகளை ஏற்றுக்கொள்ளப்பட்டு கடந்த 2017ல், சித்ரவதை தடுப்புச் சட்ட மசோதாவானது வடிவமைக்கப்பட்டது. ஆனால் பல்வேறு காரணங்களால் அது கிடப்பிலேயே கிடக்கிறது.

     இந்த தருணத்தில் சாத்தான்குளம் போன்ற சம்பவங்கள் தமிழ்நாடு போலீசின் அத்துமீறிய வன்முறையை எடுத்துக்காட்டுகிறது. நாகரிக சமுதாயத்தில் இது மிகவும் மோசமான குற்றங்களில் ஒன்றாகும். எனவே  இனியும் காலதாமதம் செய்யோமல்  வரும் கூட்டத்தொடரிலே, இம்மசோதாவை நிறைவேற்ற வேண்டும் அல்லது ஜனாதிபதி மூலமாகவோ அவசர சட்டமாக பிறப்பிக்க நடவடிக்கை எடுக்க வேண்டும்.

இவ்வாறு அந்த கடிதத்தில் ராசா கூறி உள்ளார்.

ஆயுள் சிறை

அந்த வரைவு மசோதாவில் விசாரணைக்கு அழைத்து வருகிறவர்களை சித்ரவதை செய்வதால் ஏற்படும் உயிரிழப்புகளுக்கு சம்பந்தப்பட்ட போலீசார்  சிறையிலேயே ஆயுளை கழிக்கும் வகையில் வாழ்நாள் சிறைத்   தண்டனை  வழங்கப்படவேண்டும் என்று கூறப்பட்டு உள்ளது.