நேபாள அரசை கவிழ்க்க இந்தியாவில்கூட்டங்கள்: நேபாள பிரதமர் ஒலி புகார்

பதிவு செய்த நாள் : 28 ஜூன் 2020 19:31

காத்மாண்டு

மக்களால் தேர்ந்தெடுக்கப்பட்ட என்னுடைய அரசை ஆட்சிப் பொறுப்பில் இருந்து அகற்றுவதற்காக டெல்லியில் கூட்டங்கள் நடத்தப்படுகின்றன என்று காத்மாண்டு நகரில் உள்ள பிரதமரின் இல்லத்தில் நடந்த கூட்டம் ஒன்றில் பேசும் பொழுது நேபாள பிரதமர் கே.பி. ஷர்மா ஒலி குற்றம்சாட்டினார்.

மறைந்த கம்யூனிஸ்ட் தலைவர் மதன் பண்டாரி நினைவுக் கூட்டம் பிரதமர் இல்லத்தில் இன்று நடந்தது. அந்த கூட்டத்தில் பேசும்போது இந்தப் புகாரை நேபாள பிரதமர் சர்மா வெளியிட்டார்.

நேபாள  அரசு நேபாள நாடாளுமன்றத்தில் பெரும்பான்மை பலத்துடன் இயங்குகிறது. பெரும்பான்மை ஆதரவு பெற்ற எனது அரசை கவிழ்ப்பதற்கு வகுக்கப்படும் திட்டங்கள் தோல்வியை தழுவும் என்று சர்மா குறிப்பிட்டார்.

நேபாளத்தின் புதிய எல்லைகளை காட்டும் வரைபடத்தை நேபாள நாடாளுமன்றம் அங்கீகாரம் செய்ததை டெல்லி விரும்பவில்லை. அதனால் தான் நேபாள அரசைக் கவிழ்க்க திட்டம் தீட்டப்படுகிறது.

நேபாள அரசு தன் உரிமையை வலியுறுத்தி நாடாளுமன்றத்தில் பெரும்பான்மை ஆதரவுடன் அரசியல் சட்டத்தை திருத்த தீர்மானம் நிறைவேற்றியது. டெல்லி அரசுக்கு கலக்கத்தை தந்திருக்கிறது என சர்மா குறிப்பிட்டார்,

நேபாள மக்களின் தேசிய உணர்வு அவ்வளவு பலவீனமானது அல்ல. நேபாள மக்களின் உரிமையை உலகுக்கு உணர்த்துவதற்காக புதிய வரை படத்துக்கு அங்கீகாரம் தரப்பட்டது இது குற்றமல்ல.

நேபாளத்தில் 15 நாட்களுக்கு ஒரு முறை பிரதமர்கள் மாற்றப்பட்டார்கள், அது ஒரு காலம். இப்பொழுது பிரதமர் பொறுப்பிலிருந்து சர்மா நீக்கப்பட்டால் நேபாளத்தின் உரிமையை காக்க யாரும் குரல் கொடுக்க முன்வர மாட்டார்கள் . சர்மா தன்னுடைய சொந்த லாபத்துக்காக பேசவில்லை நேபாள நாட்டுக்காக பேசுகிறேன். நாடாளுமன்ற உரிமைக்காக பேசுகிறேன் .

இத்தகைய அரசுக்கு எதிரான முயற்சிகளை எல்லாம் நேபாளம் அலட்சியப் படுத்தி வெற்றி கொள்ளும் என்று பிரதமர் சர்மா தெரிவித்தார்.