சீனாவில் வேலை வாய்ப்பு மற்றும் மக்களின் வாழ்க்கை தரத்துக்கு முன்னுரிமை!

பதிவு செய்த நாள் : 23 மே 2020 17:35

சீனத் தேசிய மக்கள் பேரவைக் கூட்டத்தொடரின் போது ஆண்டு தோறும் வழங்கப்படும் அரசுப் பணியறிக்கையின் மூலம் சீனாவின் பொருளாதார மற்றும் சமூக சீர்த்திருத்தக் கொள்கைகளின் போக்கு பற்றி அறிந்து கொள்ள முடியும். ஆனால் இவ்வாண்டு 13ஆவது சீனத் தேசிய மக்கள் பேரவையின் 3ஆவது கூட்டத் தொடரின் துவக்க விழாவில், கடந்த வெள்ளிக்கிழமை சீனத் தலைமை அமைச்சர் வழங்கிய அரசுப் பணியறிக்கையில் மொத்த உள்நாட்டு உற்பத்திக்கான இலக்கு நிர்ணயிகப்படவில்லை என்பது குறிப்பிடத்தக்கது. எனினும் வேலைவாய்ப்பு, மக்களின் அடிப்படை வாழ்க்கை, வறுமை ஒழிப்பு, நுகர்வுப் பொருட்களின் விலைவாசி உள்ளிட்ட பல்வேறு சிக்கல்களை ஒட்டுமொத்தமாக எவ்வாறு சரிசெய்வது என்பதற்கான இலக்கு குறித்து  இந்த அறிக்கையில் விவரமாக தெரிவிக்கப்பட்டுள்ளது.


தற்போது, உலகளவில் கரோனா வைரஸ் பாதிப்பு இன்னும் தொடர்ந்து நிலவி வருகிறது. இதனால் உலகப் பொருளாதாரத்தில் கடும் வீழ்ச்சி ஏற்பட்டுள்ளது. உலக நாணய நிதியம் கடந்த ஏப்ரலில் வழங்கிய உலகப் பொருளாதாரக் கண்ணோட்டம் என்ற அறிக்கையில், இவ்வாண்டு உலகப் பொருளாதாரம் 3 விழுக்காடு குறையும் என்று மதிப்பிடப்பட்டுள்ளது. இது கடந்த 30ஆம் ஆண்டுகளில் இல்லாத பெரும் பொருளாதார வீழச்சியாகும். சீனா தற்போது கணிக்க முடியாத பல புதிய நிலைமையை எதிர்நோக்கி உள்ளது. இந்நிலையை கருத்தில் கொண்டே சீனா இவ்வாண்டுக்கான பொருளாதார வளர்ச்சி இலக்கை நிர்ணயிக்கவில்லை.

ஆனாலும், நிதிக்கொள்கை, நாணயக் கொள்கை உள்ளிட்ட இதர வளர்ச்சி இலக்குகளிலிருந்து சீனாவின் பொருளாதார வளர்ச்சிப் போக்கு பற்றி அறிந்து கொள்ள முடியும். எடுத்துக்காட்டாக, நகரங்களில் 90 இலட்சம் புதிய வேலை வாய்ப்புகளை உருவாக்குதல். நுகர்வுப் பொருட்களின் விலைவாசி குறியீடு அதிகரிப்பு 3.5 விழுக்காட்டுக்குள் கட்டுப்படுத்துதல், தற்போது வறுமைக் கோட்டுக்குக் கீழுள்ள கிராமப்புற மக்களையும் வறிய வட்டங்களையும் வறுமையிலிருந்து விடுவித்தல் உள்ளிட்ட இலக்குகளை சீன அரசு வகுத்துள்ளது.

இது பற்றி தி ஆஸ்திரேலியன் ஃபைனன்ஷல் லிவேயூ வெளியிட்ட கட்டுரையில், பொருளாதார வளர்ச்சி இலக்கு வகுப்பதன் வழக்கத்தைச் சீனா கடைபிடிக்கவில்லை. மாறாக, வேலை வாய்ப்பு மற்றும் மக்களின் வாழ்க்கை தரத்துக்கு முன்னுரிமை வழங்கியுள்ளது என்று தெரிவிக்கப்பட்டுள்ளது.

கரோனா வைரஸ் பரவல் சீனாவின் பொருளாதார மற்றும் சமூக வளர்ச்சிக்கு மாபெரும் பாதிப்பை ஏற்படுத்தி உள்ளது. இந்நிலைமையைச் சமாளிக்க பல்வேறு நடவடிக்கைகளை எடுத்து வரும் சீன அரசு, மனித உயிர்களுக்கு முக்கியத்துவம் அளித்து, நோய் பாதிப்பைக் வெகுவாக குறைக்கும் வகையில் விரைவான நடவடிக்கைகளை எடுத்து வந்தது..

எனவே இவ்வாண்டின் பற்றாக்குறை விகிதம் ஒட்டுமொத்தமாக பார்த்தால் 3.6 விழுக்காடு அளவில் இருக்கும் என தெரிகிறது.  மேலும், நிதிப் பற்றாக்குறை அளவு கடந்த ஆண்டில் இருந்ததை விட ஒரு இலட்சம் கோடி யுவானுக்கு அதிகம் என்று மதிப்பிடப்பட்டுள்ளது. தவிரவும், நோய் தடுப்புக்கான ஒரு இலட்சம் கோடி யுவான் அரசுக் கடன் பத்திரத்தை சீன அரசு வெளியிட உள்ளது.

தொழில் நிறுவனங்களுக்கு உதவி அளிக்கும் வகையில், இவ்வாண்டு 2 இலட்சத்து 50 ஆயிரம் கோடி யுவான் நிதியுதவி அளிக்க உள்ளது. இது நடுத்தர மற்றும் சிறிய தனியார் தொழில் நிறுவனங்களின் இன்னல்களை போக்க துணை புரியும் என கருதப்படுகிறது. தொற்று நோயால் பாதிக்கப்பட்ட பல்கலைக்கழகங்களின் பட்டதாரிகள், நகரங்களில் வேலை பார்த்து வரும் விவசாயிகள் உள்ளிட்ட பலருக்கும் சீன அரசு வேலை வாய்ப்பு வழங்க ஏற்பாடு செய்துள்ளது. வெளி நாட்டுச் சூழல் நிதானமற்ற நிலையில் இருப்பதால், உள்நாட்டுத் தேவையை விரிவாக்குவதன் மூலம் சீனப் பொருளாதாரத் துறையின் நெகிழ்த் திறனை அதிகரிக்க முடியும்.

மேலும் தரமான வெளிநாட்டுத் திறப்புக் கொள்கையை சீனா தொடர்ந்து கடைபிடிக்கும் என்று தெரிவிக்கப்பட்டது. உலக விநியோகச் சங்கிலியைப் பேணிக்காக்கும் சீனாவின் இம்முயற்சி உலக பொருளாதாரத்துக்கும் உத்தரவாதம் அளிக்கும் முக்கியமான விசயம் ஆகும்.

-சீன ஊடகக் குழுமம்