ஊரடங்கை மீறினால் 2 ஆண்டு சிறை: உள்துறை அமைச்சகம் எச்சரிக்கை

பதிவு செய்த நாள் : 02 ஏப்ரல் 2020 21:25

புதுடெல்லி,

இந்தியாவில் அறிவிக்கப்பட்டுள்ள  21 நாள் ஊரடங்கு உத்தரவை மீறும் நபர்களுக்கு 2 ஆண்டுகள் சிறை தண்டனை விதிக்கப்படும் என மத்திய உள்துறை அமைச்சகம் எச்சரிக்கை விடுத்து உள்ளது.

கொரோனா வைரஸ் பரவுவதை தடுக்க மத்திய அரசு பல்வேறு நடவடிக்கைகளை எடுத்து வருகிறது. இதற்காக நாடு முழுவதும் கடந்த மார்ச் மாதம் 24ந் தேதி 21 நாட்கள் ஊரடங்கு உத்தரவு பிறப்பித்து உத்தரவிட்டது. இதன்படி, பொதுமக்கள் தேவையின்றி வீட்டைவிட்டு வெளியில் வர தடை விதிக்கப்பட்டு உள்ளது.

இந்த நிலையில், ஊரடங்கு உத்தரவை மீறும் நபர்கள் மீது, ஐ.பி.சி. மற்றும் பேரிடர் மேலாண்மை சட்டம் 2005ன் தொடர்புடைய பிரிவுகளின் கீழ் 2 ஆண்டுகள் சிறை தண்டனை விதிக்கும்படி மாநிலங்கள் மற்றும் யூனியன் பிரதேசங்களுக்கு மத்திய உள்துறை அமைச்சகம் உத்தரவு பிறப்பித்து உள்ளது.

இதுபற்றி அனைத்து மாநில அரசுகள் மற்றும் யூனியன் பிரதேசங்களின் தலைமை செயலாளர்களுக்கு மத்திய உள்துறை செயலாளர் அஜய் பல்லா கடிதம் அனுப்பி உள்ளார்.

கடந்த மார்ச் 24ந்தேதி பிறப்பிக்கப்பட்ட ஊரடங்கு உத்தரவை மீறுவோர் மீது விசாரணை நடத்தப்படும்.  விசாரணையில் குற்றச்சாட்டு உறுதியானால்  அவர்களுக்கு 2 ஆண்டுகள் சிறை தண்டனை விதிக்கப்படும். இதேபோன்று வதந்தி பரப்பினாலும் அபராதமும் 2 ஆண்டுகள் சிறை தண்டனையும் விதிக்கப்படும் என கடிதத்தில் கூறப்பட்டுள்ளது.