கரோனா வைரஸ் தொற்றை பரப்பினால் 2 ஆண்டுகள் சிறை தண்டனை – தமிழ்நாடு அரசு உத்தரவு

பதிவு செய்த நாள் : 25 மார்ச் 2020 11:01

சென்னை

கரோனா வைரஸ் தொற்றை பரப்பினால் இந்திய குற்றவியல் சட்டம் 270ஆவது பிரிவின் கீழ் 2ஆண்டுகள் சிறைத்தண்டனை விதிக்கப்படும் என தமிழ்நாடு அரசு இன்று அறிவித்துள்ளது.

கரோனா வைரஸ் தொற்றை தடுக்கும் முன்னெச்சரிக்கையாக இந்தியா முழுவதும் 21 நாள் ஊரடங்கு உத்தரவு பிறப்பிக்கப்பட்டுள்ள நிலையில், வைரஸ் தொற்றை பரப்பினால் கடும் நடவடிக்கை எடுக்கப்படும் தமிழ்நாடு அரசு செய்திக்குறிப்பு வெளியிட்டுள்ளது.

இந்திய குற்றவியல் சட்டம் 270ஆவது பிரிவு படி, இந்த நடவடிக்கை எடுக்கப்படும் என விளக்கம் அளிக்கப்பட்டு உள்ளது.

அதாவது மனித உயிருக்கு ஆபத்து விளைவிக்கும் வீரியமிக்க வைரஸ் பரவலுக்கு, தெரிந்தே எவர் ஒருவர் காரணமாக இருப்பது உறுதியானால், 2 ஆண்டு சிறை தண்டனை மற்றும் அபராதம் அல்லது இரண்டும் சேர்த்து வழங்கப்படும்.

அரசின் உத்தரவை மீறி, ஆபத்தான வைரஸ் தொற்று பரவுவதற்கான செயலில் ஈடுபட்டாலோ அல்லது அலட்சியமாக நடந்து கொண்டாலோ, இந்திய குற்றவியல் சட்டம் 269ஆவது பிரிவின் கீழ், 6 மாதங்கள் சிறை தண்டனை விதிக்கப்படும்.

கரோனா வைரஸ் அறிகுறியுடன் தனிமை முகாம்களில் தங்க அறிவுறுத்தப்பட்டவர்கள், அரசின் உத்தரவுக்கு கீழ் படியாமல் இருந்தால், இந்திய குற்றவியல் சட்டம் 271 வது பிரிவு படி, 6 மாத சிறை தண்டனை மற்றும் அபராதம், அல்லது இரண்டும் சேர்த்து விதிக்கப்படும் என்று தமிழ்நாடு அரசு செய்திக்குறிப்பில் அறிவிக்கப்பட்டுள்ளது.