பொதுத்தேர்வில் மாணவிகளை பெண் ஆசிரியை மட்டுமே சோதனை செய்யலாம்: தேர்வுத்துறை உத்தரவு

பதிவு செய்த நாள் : 21 பிப்ரவரி 2020 18:28

சென்னை,

10, 11, 12-ம் வகுப்பு பொதுத் தேர்வின்போது ஆண் ஆசிரியர்கள் மாணவிகளை சோதனை செய்ய தடை விதித்து அரசு தேர்வுத்துறை இயக்ககம் உத்தரவிட்டுள்ளது.

தமிழ்நாடு அரசு பள்ளிக் கல்வியில் 10, 11, 12-ம் வகுப்பு மாணவர்களுக்கான 2020ம் கல்வி ஆண்டிற்கான பொதுத்தேர்வு மார்ச் 2-ம் தேதி தொடங்கி ஏப்ரல் 13ஆம் தேதி வரை நடைபெற உள்ளன. இதற்கான முன்னேற்பாடுகள் முடிவுற்ற நிலையில் இறுதி கட்ட பணிகள் தற்போது நடைபெறுகின்றன.

பிளஸ் 2 பொதுத்தேர்வு மார்ச் 2ல் தொடங்கி மார்ச் 24ல் முடிகிறது; ஏப்ரல் 24ம் தேதி தேர்வு முடிவு வெளியாகிறது.

பிளஸ்-1 பொதுத்தேர்வு மார்ச் 4ல் தொடங்கி மார்ச் 26ல் முடிகிறது; முடிவுகள் - மே 14ம் தேதி தேர்வு முடிவு வெளியாகிறது.

10ம் வகுப்பு பொதுத்தேர்வு மார்ச் 17ல் தொடங்கி ஏப்ரல் 4ம் தேதி முடிகிறது; முடிவுகள் - மே 5ம் தேதி தேர்வு முடிவு வெளியாகிறது.

பொதுத்தேர்வுக்கான வழிமுறைகள்

பொதுத்தேர்வு நடத்துவதற்கான வழிமுறைகள் குறித்து மாவட்ட முதன்மைகல்வி அலுவலர்களுக்கு, அரசு தேர்வுத்துறை இயக்ககம் சுற்றறிக்கை அனுப்பியுள்ளது.

அதில், குறைந்தபட்சம் 5 ஆண்டுகள் அனுபவம் உள்ள ஆசிரியர்களை பறக்கும் படையில் நியமிக்க வேண்டும் என அறிவுறுத்தப்பட்டுள்ளது.

மாணவிகளை ஆண் ஆசிரியர்கள் சோதனை செய்யக் கூடாது என்றும் பெண் ஆசிரியர்களை கொண்டுதான் சோதனை செய்ய வேண்டும் எனவும் குறிப்பிடப்பட்டுள்ளது. மேலும், அடிக்கடி புகார்களுக்கு இடமளிக்கக்கூடிய தேர்வு மையங்களை பறக்கும்படை உன்னிப்பாக கண்காணிக்க வேண்டும் எனவும் தேர்வுத்துறை உத்தரவிட்டுள்ளது.