ஈஷா சிவராத்திரி விழாவில் பங்கேற்க குடியரசு துணைத் தலைவர் வெங்கய்ய நாயுடு இன்று கோவை வருகை

பதிவு செய்த நாள் : 21 பிப்ரவரி 2020 13:07

கோவை,

கோவை-வெள்ளிங்கிரி ஈஷா யோகா மையத்தில் நடைபெறும் மகா சிவராத்திரி சிறப்பு விழா மற்றும் தனியார் கல்லூரி விழாவில் பங்கேற்பதற்காக குடியரசு துணைத் தலைவர் வெங்கய்ய நாயுடு இன்று கோவை வருகிறார்.

கோவை ஈஷா யோகா மையத்தில், மகா சிவராத்திரி விழா இன்று கொண்டாடப்படுகிறது. இன்று மாலை 6:00 மணி முதல் நாளை காலை 6:00 மணி வரை இசை நிகழ்ச்சியுடன் இடைவிடாத கொண்டாட்டம் சத்குரு ஜக்கி வாசுதேவ் தலைமையில் நடைபெறுகிறது.

நாடு முழுவதும் மட்டுமின்றி, வெளிநாடுகளில் இருந்தும் ஆயிரக்கணக்கான பக்தர்கள் கலந்துகொள்கின்றனர்.

சிவராத்திரி விழாவில் குடியரசு துணைத்தலைவர் வெங்கய்ய நாயுடு சிறப்பு விருந்தினராக கலந்து கொள்கிறார்.

இதற்காக இன்று காலை டில்லியில் இருந்து விமானப்படை விமானம் மூலம் புறப்படும் அவர், காலை 11.30 மணிக்கு கோவை விமான நிலையத்துக்கு வருகிறார்.

பீளமேட்டில் பிஎஸ்ஜி (PSG) தனியார் கல்லூரியில் நடைபெறும் நிகழ்ச்சியில் பங்கேற்கிறார் வெங்கய்ய நாயுடு, மாலை ஈஷா யோகா மையத்துக்கு செல்கிறார். மகா சிவராத்திரி விழாவை தொடங்கி வைக்கிறார்.

இரவு ஈஷா யோகா மையத்தில் தங்கும் அவர் நாளை (22-ம் தேதி) காலை, 8.30 மணிக்கு டில்லிக்கு புறப்பட்டுச் செல்கிறார். 

கோவையில் போலீஸ் பாதுகாப்பு

குடியரசு துணைத் தலைவர் வருகையையொட்டி கோவையில் பாதுகாப்பு ஏற்பாடுகள் பலப்படுத்தப்பட்டு உள்ளன.

கோவை மாநகர காவல்துறையினர், மாவட்ட காவல்துறையினர், மத்திய ரிசர்வ் போலீஸ் படையினர், அதி விரைவுப்படை போலீஸார் பாதுகாப்புப் பணியில் ஈடுபடுத்தப்பட்டுள்ளனர்.

விமான நிலையத்தில் இருந்து ஈஷா யோகா மையத்துக்கு செல்லும் வழியில் காவல் துறையினர் நிறுத்தப்பட உள்ளனர்.

பாதுகாப்பு சோதனைக்கு பிறகே, சிவராத்திரி விழா நடைபெறும் இடத்துக்கு பொதுமக்கள் அனுமதிக்கப்படுவர் என்றும் காவல் துறை அதிகாரிகள் தெரிவித்தனர்.