கட்சி, சாதி, மத பேதமின்றி டில்லி மக்களுக்காக பாடுபடுவேன்: முதலமைச்சராக பதவியேற்ற கெஜ்ரிவால் பேச்சு

பதிவு செய்த நாள் : 16 பிப்ரவரி 2020 17:02

புதுடில்லி,

கட்சி, சாதி, மத பேதமின்றி டில்லி மக்களுக்காக அடுத்த 5 ஆண்டுகளுக்கு பாடுபடுவேன் என்று டில்லி முதலமைச்சராக பதவியேற்ற கெஜ்ரிவால் தெரிவித்துள்ளார்.

டில்லியில் உள்ள 70 சட்டமன்ற தொகுதிகளுக்கு கடந்த 8-ஆம் தேதி நடைபெற்ற தோ்தலில் ஆம் ஆத்மி கட்சி 62 இடங்களில் வெற்றி பெற்று தொடர்ந்து மூன்றாவது முறையாக ஆட்சியைப் பிடித்துள்ளது.

ஆம் ஆத்மி கட்சியின் தேசிய அமைப்பாளரான அரவிந்த் கெஜ்ரிவால், மூன்றாவது முறையாக டில்லியின் முதலமைச்சராக இன்று பதவியேற்றுக் கொண்டார். 

கெஜ்ரிவாலுடன் ஆம் ஆத்மி கட்சியைச் சேர்ந்த மணீஷ் சிசோடியா உள்ளிட்ட 6 அமைச்சர்களும் பதவியேற்றுக் கொண்டனர். 

கெஜ்ரிவால் மற்றும் அமைச்சர்களுக்கு துணைநிலை ஆளுநர் அனில் பைஜால் பதவிப் பிரமாணம் செய்து வைத்தார்.

மக்கள் முன்னிலையில் பேசிய கெஜ்ரிவால், 

'டில்லியின் மகன் முதலமைச்சராக பதவியேற்றுள்ளதால் மக்கள் கவலைப்படத் தேவையில்லை. கட்சி, சாதி, மத பேதமின்றி டில்லி மக்களுக்காக அடுத்த 5 ஆண்டுகளுக்கு பாடுபடுவேன்.

தேர்தலில் சிலர் ஆம் ஆத்மிக்கு வாக்களித்தனர்.  சிலர் பா.ஜ.க.விற்கும் மற்றும் சிலர் காங்கிரஸ் கட்சிக்கும் வாக்களித்தனர்...

ஆனால் இன்று, டெல்லி முதல் மந்திரியாக எப்பொழுது பதவியேற்று கொண்டேனோ, அதிலிருந்து அனைவருக்கும் உரிய முதல் மந்திரியாக நான் இருக்கிறேன். 

நாட்டுக்கே டில்லி ஒரு உதாரணமாக இருக்கிறது. 

ஆம் ஆத்மி கட்சியின் வெற்றி ஒவ்வொரு டில்லி வாசிக்கும் கிடைத்த வெற்றி. 

டில்லியில் உள்ள 2 கோடி மக்களும் எனது குடும்பத்தினர்.

டில்லி மாணவர்களிடம் கட்டணம் வசூலிக்க முடியாது. அதேபோன்று மருத்துவ மனையில் சிகிச்சை பெற வருவபர்களிடம் கட்டணம் வசூலிக்க முடியாது. கல்வி, மருத்துவம் இரண்டும் இலவசமாக வழங்கப்பட வேண்டும்.

டில்லியின் முழு வளர்ச்சிக்காக பிரதமர் மோடியின் உதவியை எதிர்பார்க்கிறேன் என்று அரவிந்த் கெஜ்ரிவால் பேசினார்.

புதுடில்லி முதலமைச்சராக கெஜ்ரிவால் பதவியேற்ற விழாவிற்கு - ராம்லீலா மைதானத்திற்கு வருகை தந்த பொதுமக்களின் கூட்டம் (முழு வியூ).