பாகுபாடு காட்டாத சமாதான நண்பர்கள்: டில்லி போலீஸை புகழ்ந்து அமித் ஷா பேச்சு

பதிவு செய்த நாள் : 16 பிப்ரவரி 2020 12:52

புதுடில்லி:

மதம், ஜாதி என பாகுபாடு காட்டாமல், அமைதியையும் பாதுகாப்பையும் பராமரிக்கும் சமாதானத்தின் நண்பர்கள், என டில்லி போலீஸை புகழ்ந்து மத்திய உள்துறை அமைச்சர் அமித் ஷா இன்று பேசியுள்ளார்.

டெல்லி காவல்துறையின் 73வது ரைசிங் டே  விழா இன்று (பிப்ரவரி,16) நடைபெற்றது. இதில், மத்திய உள்துறை அமைச்சர் அமித் ஷா பங்கேற்றார். விழாவில் போலீஸாருக்கு விருதுகள் வழங்கினார்.

போலீஸாரின் அணிவகுப்பு மரியாதையை ஏற்றுக்கொண்ட  அமித் ஷா, விழாவில் பேசியதாவது:

மதம் அல்லது ஜாதிகளின் அடிப்படையில் பாகுபாடு காட்டாமல் அமைதியையும் பாதுகாப்பையும் பராமரிக்கவே போலீஸ் செயல்படுகிறது.

இவர்கள் யாருடைய எதிரியும் அல்ல. சமாதானத்தின் நண்பர்களான இவர்கள், மதிக்கப்பட வேண்டும்.

டில்லிக்கு செல்லும்போதெல்லாம், போலீஸ் நினைவு சின்னத்தை பார்வையிட்டு, தேசத்திற்காக தங்கள் உயிரை தியாகம் செய்த 35,000 போலீஸ் வீரர்களுக்கு அஞ்சலி செலுத்துமாறு மக்களிடம் கேட்டுக்கொள்கிறேன்.

தேசத்திற்காக இவர்கள் உயிரை கொடுத்துள்ளனர் என்பதை நாம் நினைவில் கொள்ள வேண்டும். அதேபோல், அவர்களின் பணியின் தன்மையையும் நாம் புரிந்து கொள்ள வேண்டும். நமது பாதுகாப்புக்காக தான் போலீஸ் என்பதை நாம் புரிந்து கொள்ள வேண்டும் என பிரதமர் மோடி கூறியிருக்கிறார்.

அதனாலேயே போலீஸை விமர்சிப்பது நல்லதல்ல.

டில்லி போலீஸை இந்தியாவின் இரும்பு மனிதர் சர்தார் வல்லபாய் படேல் தான் தொடங்கினார் என்பது பெருமைக்குரிய விஷயம்.

இது இந்த துறைக்கே முழு உத்வேகம் அளிக்கிறது என்பது உறுதி. இவ்வாறு அமித்ஷா பேசினார்.