மூன்றாவது முறையாக டில்லி முதலமைச்சரானார் அரவிந்த் கெஜ்ரிவால்

பதிவு செய்த நாள் : 16 பிப்ரவரி 2020 11:59

புதுடில்லி,

ஆம் ஆத்மி கட்சியின் தேசிய அமைப்பாளரான அரவிந்த் கெஜ்ரிவால், மூன்றாவது முறையாக டில்லி முதலமைச்சராக இன்று (ஞாயிற்றுக்கிழமை) பதவியேற்றார்.

டில்லியில் உள்ள 70 சட்டமன்ற தொகுதிகளுக்கு கடந்த பிப்ரவரி 8-ஆம் தேதி நடைபெற்ற தோ்தலில், ஆம் ஆத்மி கட்சி 62 இடங்களில் வெற்றி பெற்று மூன்றாவது முறையாக ஆட்சி அமைத்தது. பாஜக 8 இடங்களை கைப்பற்றியுள்ளது.

ஆம் ஆத்மி கட்சியின் தேசிய அமைப்பாளரான அரவிந்த் கெஜ்ரிவால், மூன்றாவது முறையாக டில்லியின் முதலமைச்சராக இன்று பதவியேற்றுக் கொண்டார்.

கெஜ்ரிவாலுடன் ஆம் ஆத்மி கட்சியைச் சேர்ந்த மணீஷ் சிசோடியா, கோபால் ராய், சத்யேந்தர் ஜெயின், கைலாஷ் கெலாட், இம்ரான் உசைன், ராஜேந்திர கவுதம் ஆகிய 6 அமைச்சர்களும் பதவியேற்றுக் கொண்டனர்.

கெஜ்ரிவால் மற்றும் அமைச்சர்களுக்கு துணைநிலை ஆளுநர் அனில் பைஜால் பதவிப் பிரமாணம் செய்து வைத்தார்.

மக்கள் முன்னிலையில் பதவியேற்பு

கெஜ்ரிவால் பதவியேற்பு விழாவில் பல்வேறு மாநில முதலமைச்சர்கள், அரசியல் தலைவர்கள் பங்கேற்பார்கள் என்று எதிர்பார்க்கப்பட்ட நிலையில், மக்கள் முன்னிலையில் பதவியேற்பதாக கூறினார் கெஜ்ரிவால்.

டில்லியில் உள்ள ராம் லீலா மைதானத்தில் இன்று பிற்பகல் 12:00 மணியளவில் பதவியேற்பு விழா நடைபெற்றது.

அழைப்பின் பேரில் ஆசிரியா்கள், மருத்துவர்கள், துப்புரவுத் தொழிலாளா்கள் உள்பட 50 பேர் கலந்து கொண்டனர்.

பதவியேற்பு விழாவைக் காண்பதற்காக ஏராளமானோர் வந்திருந்தனர். ராம் லீலா மைதானம் ஆம் ஆத்மி தொண்டர்கள் மற்றும் மக்கள் வெள்ளத்தால் நிரம்பியது.

பிரதமர் நரேந்திர  மோடிக்கு அழைப்பு விடுக்கப்பட்டிருந்த போதும், வாரணாசியில் நடைபெறும் நிகழ்ச்சியில் பங்கேற்றதால் கெஜ்ரிவால் பதவியேற்பு விழாவுக்கு  பிரதமர் மோடி வரவில்லை.

கெஜ்ரிவால் பதவியேற்பு விழாவில் முதலமைச்சர் கெஜ்ரிவால் தோற்றத்தில் 100-க்கும் மேற்பட்ட குட்டி கெஜ்ரிவால்கள் சிகப்பு வண்ண மப்ளர் அணிந்து, ஆம் ஆத்மி தொப்பி, கண்ணாடி அணிந்து வெற்றி சின்னத்தை காண்பித்து மைதானத்தில் வலம் வந்தது விழாவில் உற்சாகத்தை ஏற்படுத்தியது குறிப்பிடத்தக்கது.