டி.என்.பி.எஸ்.சி. தேர்வில் முறைகேடுகளைத் தடுக்க புதிய மாற்றங்கள்

பதிவு செய்த நாள் : 15 பிப்ரவரி 2020 15:11

சென்னை:

தமிழ்நாடு அரசு பணியாளர் தேர்வாணையம் (டி.என்.பி.எஸ்.சி.) தேர்வில் அதிரடியாக புதிய மாற்றங்கள், சட்டத் திருத்தங்கள் செய்யப்பட்டுள்ளன.

குரூப்-4, குரூப்-2ஏ  தேர்வுகளில் நடைபெறும் மோசடியை தடுக்க டி.என்.பி.எஸ்.சி. தேர்வில் அதிரடி மாற்றங்கள் செய்யப்பட்டுள்ளன.

தொகுதி-4, தொகுதி-2ஏ தேர்வு இருநிலைகளில் நடைபெறும், டிஎன்பிஎஸ்சி தேர்வுக்கு ஆதார் எண் கட்டாயம், 1 மணி நேரத்திற்கு முன்னதாகவே தேர்வு கூடத்திற்கு வரவேண்டும், விடைதாளில் தேர்வர்களின் கையெழுத்திற்கு பதிலாக இடதுகைவிரல் ரேகையை பதிய வேண்டும் என புதிய கட்டுப்பாடுகள் விதிக்கப்பட்டுள்ளன.

டிஎன்பிஎஸ்சி தேர்வு விடைத்தாள்களை தேர்வாணைய அலுவலகத்திற்கு எடுத்துவரும் வாகனத்திற்கு அதிநவீன தொழில்நுட்ப ஜிபிஎஸ் மற்றும் கண்காணிப்பு கேமரா வசதியுடன் கூடிய பாதுகாப்பு ஏற்பாடுகள் செய்யப்படும் எனவும் அறிவிக்கப்பட்டுள்ளது.

ஆதார் அட்டை கட்டாயம்

கடந்த 7.2.2020 அன்று தேர்வர்களுக்கு ஆதார் எண் கட்டாயம் உள்ளிட்ட 6 முக்கியமான புதிய மாற்றங்களை முதற்கட்டமாக அறிவித்து இருந்தது.

தொடர்ச்சியாக 14.2.2020 அன்றும் தேர்வு முறைகளில் செய்யப்படவுள்ள சீர்திருத்தங்கள் குறித்து தேர்வாணையத் தலைவர் தலைமையில் தேர்வாணையக் குழுமம் கூடி விவாதித்து பல முடிவுகள் எடுக்கப்பட்டன.

அதிரடி மாற்றம்

தமிழ்நாடு அரசுப் பணியாளர் தேர்வாணையம் (டி.என்.பி.எஸ்.சி.) வெளியிட்டுள்ள செய்திக்குறிப்பில் கூறி இருப்பதாவது:-

தொகுதி-4, தொகுதி-2ஏ போன்ற தேர்வுகளுக்கு பொது அறிவுத்தாள் மட்டுமே கொண்ட ஒரே ஒரு தேர்வு மட்டும் இதுவரை நடந்து வருகிறது.

இனி வருங்காலங்களில் இந்த தேர்வுகள் இருநிலைகளைக் கொண்டதாக அதாவது முதனிலை மற்றும் முதன்மைத் தேர்வுகளாக நடத்தப்படும்.

தேர்வு எழுத வரும் தேர்வர்களின் மெய்த்தன்மை உறுதி செய்யவும், இதர தேர்வு விதிமுறைகளைத் தேர்வர்களுக்கு விளக்கும் விதமாகவும், தேர்வர்கள் இனி, 9 மணிக்கே தேர்வுக்கூடங்களுக்கு வருகை புரிதல் வேண்டும்.

தேர்வு நேரம் சரியாக 10:00 மணி முதல் 1:00 மணி வரை மூன்று மணி நேரத்திற்கு நடைபெறும்.

10:00 மணிக்கு மேல் வரும் எந்த தேர்வர்களும் தேர்வு எழுத அனுமதிக்கப்பட மாட்டார்கள்.

தேர்வு நேரத்திற்குப் பின்னர் விடைத்தாளில் பதிவு செய்ய வேண்டிய கூடுதல் விவரங்களுக்காக 15 நிமிடங்கள் கூடுதலாக வழங்கப்படும்.

காலை - மாலை 2 வேளைகளிலும் தேர்வு இருந்தால் மாலை நடைபெறவுள்ள தேர்வு பிற்பகல் 3:00 மணிக்கு தொடங்கிவிடும்.

அனைத்து வினாக்களுக்கும் பதில் அவசியம்

இனி வரும் கொள்குறி வகைத்தேர்வுகளில் அனைத்து கேள்விகளுக்கும் தேர்வர்கள் விடையளிக்க வேண்டும். எந்தவொரு வினாவிற்கும் விடை அளிக்க இயலவில்லை, விடை தெரியவில்லை எனில் அதற்கு கூடுதலாக கொடுக்கப்படும் ‘இ’(E)  என்ற வட்டத்தினை நிரப்புவதுடன் மொத்தம் எத்தனை கேள்விகளுக்கு முறையே ஏ.பி.சி.டி. மற்றும் இ விடைகளை (A,B,C,D) நிரப்பியுள்ளார் என்ற விவரங்களை தனியே பதிவு செய்து அதற்கான உரிய கட்டங்களையும் நிரப்ப வேண்டும்.

எந்தவொரு கேள்விக்கும் மேற்கூறிய ஏ.பி.சி.டி. மற்றும் இ ஆகியவற்றில் ஏதேனும் ஒன்றை குறிக்கத் தவறியிருந்தால் விடைத்தாள் செல்லாததாக கருதப்படும்.

தேர்வு முடிந்ததும் எந்தவொரு குறிப்பிட்ட நபரின் விடைத்தாளையும் இனங்கான இயலாதவாறு தேர்வர்களின் விவரங்கள் அடங்கிய பகுதி மற்றும் விடையளிக்கும் பகுதி ஆகியவற்றை தேர்வர்களின் முன்னிலையிலேயே தனித்தனியே பிரித்து தேர்வு அறையிலேயே சீலிடப்படும். தேர்வர்களுடைய விடைத்தாளை அடையாளம் காண இயலாத வகையில் விடைத்தாளின் விடையளிக்கும் பகுதியில் தேர்வரின் கையொப்பத்திற்கு பதிலாக தேர்வரின் இடது கை பெருவிரல் ரேகை பதிவு செய்யப்படும்.

தேர்வு மையங்களிலிருந்து விடைத்தாள்களை பாதுகாப்பான முறையில் தேர்வாணைய அலுவலகத்திற்கு எடுத்துவர தற்போதுள்ள முறை முற்றிலும் மாற்றப்பட்டு அதிநவீன தொழில்நுட்ப ஜி.பி.எஸ். மற்றும் கண்காணிப்பு கேமரா வசதியுடன் கூடிய பாதுகாப்பு ஏற்பாடுகள் செய்யப்படும். இந்த நடவடிக்கைகள் முழுவதையும் நேரலையாக தேர்வாணைய அலுவலகத்தில் 24 மணி நேரமும் கண்காணிக்க கட்டுப்பாட்டு அறை தொடங்கப்படும்.

தேர்வாணையத்தின் தகவல் பரிமாற்றத்தினை மேலும் எளிமைப்படுத்தவும் தேர்வாணைய இணைய தளத்தில் ஒரு சிறப்பு தகவல் தளம் விரைவில் உருவாக்கப்படும். தேர்வாணையம் அவ்வப்போது கொண்டு வரும் ஆக்கப்பூர்வமான மாற்றங்கள் குறித்த பின்னூட்டங்களைப் பெறவும் தேர்வர்கள் தங்களுக்குத் தெரியவரும் தகவல்களை தேர்வாணையத்துடன் பகிர்ந்து கொள்ளவும் இத்தளம் பயனுள்ளதாக இருக்கும். அவ்வாறு தகவல் அளிக்கும் தேர்வர்களின் ரகசியத்தன்மை காக்கப்படும்.

இவ்வாறு, டிஎன்பிஎஸ்சியின் அறிவிப்பில் கூறப்பட்டுள்ளது.


தமிழ்நாட்டில் சமீபத்தில், டி.என்.பி.எஸ்.சி. தேர்வில் நடைபெற்ற ஊழல் மிகப்பெரும் பரபரப்பை ஏற்படுத்தி உள்ளது. குரூப்-4, குரூப்-2ஏ மற்றும் கிராம நிர்வாக அதிகாரி தேர்வுகளில் நடைபெற்ற முறைகேடு தொடர்பாக இதுவரை 2 காவலர்கள் உள்பட அரசு பணியிலிருந்த அதிகாரிகள், அலுவலர்கள் என 40-க்கும் மேற்பட்டோர் கைதாகி உள்ளனர், சிபிசிஐடி போலீஸாரின் விசாரணை தொடர்கிறது என்பது குறிப்பிடத்தக்கது.