கரூர் திமுக எம்எல்ஏ செந்தில் பாலாஜி மீது மோசடி வழக்கு: விசாரணைக்கு ஆஜர்

பதிவு செய்த நாள் : 14 பிப்ரவரி 2020 13:07

சென்னை,

தமிழ்நாடு அரசு போக்குவரத்து துறையில் வேலை வாங்கி தருவதாக கூறி மோசடியில் ஈடுபட்டதாக பதிவு செய்யப்பட்ட வழக்கில் முன்னாள் அதிமுக அமைச்சரும், தற்போதைய திமுக எம்எல்ஏவுமான செந்தில் பாலாஜி, மத்திய குற்றப்பிரிவு விசாரணை அதிகாரி முன்பு ஆஜரானார்.

அதிமுக ஆட்சியில் போக்குவரத்து துறை அமைச்சராக இருந்த செந்தில்பாலாஜி, அதே துறையில் வேலை வாங்கித் தருவதாகக் கூறி 2 கோடியே 80 லட்சம் ரூபாய் லஞ்சம் பெற்று மோசடியில் ஈடுபட்டதாக வழக்கு பதிவு செய்தனர்.

கடந்த வாரத்தில் சென்னை மத்திய குற்றப்பிரிவு போலீசார், கரூர் ராமேஸ்வரபட்டியில் உள்ள செந்தில் பாலாஜியின் வீடு, மற்றும் அலுவலகங்களில் சோதனை நடத்தினர். சென்னை - மந்தைவெளியில் உள்ள வீட்டிலும் சோதனை நடத்திய பின்னர் சீல் வைத்தனர்.

செந்தில் பாலாஜிக்கு முன்ஜாமீன்

போலீஸார் நடத்திய திடீர் சோதனையில் தான் கைது செய்யப்படுவோமோ என பயந்த செந்தில் பாலாஜி முன்ஜாமீன் கோரி சென்னை உயர்நீதிமன்றத்தில் முறையிட்டார். செந்தில் பாலாஜிக்கு முன்ஜாமீன் வழங்கிய சென்னை உயர் நீதிமன்றம், தேவைப்படும்போது விசாரணைக்கு ஆஜராக வேண்டும் என நிபந்தனை விதித்து உத்தரவிட்டது.

விசாரணைக்கு ஆஜர்

சென்னை காவல் ஆணையர் அலுவலகத்தில், மத்திய குற்றப்பிரிவு விசாரணை அதிகாரி ராமசந்திரமூர்த்தி முன்பு திமுக எம்எல்ஏ செந்தில் பாலாஜி விசாரணைக்கு ஆஜரானார்.