தைப்பூச திருநாள் விழா - முருகன் கோவில்களில் பக்தர்கள் வெள்ளம்

பதிவு செய்த நாள் : 08 பிப்ரவரி 2020 12:32

சென்னை

தைப் பூசத் திருநாள் இன்று விமர்சையாக கொண்டாடப்படுகிறது. இதையொட்டி அம்மன் மற்றும் முருகன் கோவில்களில் பக்தர்கள் வெள்ளமெனத் திரண்டுள்ளனர். 

வெற்றிவேல் முருகனுக்கு அரோகரா, முருகனுக்கு அரோகரா என்ற பக்தி கோஷம் விண்ணை பிளந்தன.

முருகப் பெருமானுக்கு உகந்த நாள் தைப் பூசம். தை மாதம் பூச நட்சத்திரமும் பௌர்ணமி திதியும் கூடி வரும் நன்நாளில் முருகனுக்கு எடுக்கப்படும் விழா தைப்பூசம்.

தைப் பூச நன்னாளில் முருகன் கோவில்களுக்கு காவடி எடுத்தும், பால்குடம் ஏந்தியும், அலகு குத்தி காவடி எடுத்தும் நேர்த்திக்கடன் செலுத்துகின்றனர் பக்தர்கள்.

தைப்பூசத்தில் முருகனைக் காண பக்தர்கள் வெள்ளமாக குவிந்திருப்பதால் அறுபடை வீடுகளும் விழாக்கோலமாகக் காட்சியளிக்கிறது.

முதல்படை வீடு

ஆறுபடை வீடுகளில் முதல்படை வீடான திருப்பரங்குன்றம் சுப்பிரமணிய சுவாமி கோயிலில், முருகன் தெய்வானையுடன் மணக்கோலத்தில் காட்சி தருகிறார்.

இரண்டாம் படைவீடு திருச்செந்தூர்.

சூரபத்மனை போரில் வெல்வதற்கு முன்னும் பின்னும் முருகப்பெருமான் தங்கிய இடமாக கூறப்படுவது இரண்டாம் படைவீடு திருச்செந்தூர்.

மூன்றாம் படை வீடு பழனி

ஞானப்பழம் கிடைக்காத கோபத்துடன் ஆண்டிக்கோலம் பூண்டு முருகன் தங்கிவிட்டதாக கூறப்படும் இடம் மூன்றாம் படை வீடு பழனி மலை.

நான்காம் படை வீடு

சிவபெருமானுக்கு பிரணவ மந்திரத்தை உபதேசித்த முருகப் பெருமான் நான்காம் படை வீடான சுவாமி மலையில் சுவாமிநாதனாக வீற்றிருக்கின்றார். கும்பகோணம் அருகே அமைந்துள்ளது சுவாமி மலை திருத்தலம். இது மாடக்கோவிலாக அமைந்துள்ளது.

ஐந்தாம் படை வீடு

திருச்செந்தூரில் சூரனை வதம் செய்த முருகன்  திருத்தணியில் கோபம் தணிந்து சாந்தமாக அமர்ந்ததால் தணிகை என பெயர் பெற்றது. இது ஐந்தாம் படை வீடு.

ஆறாம் படை வீடு

அறுபடைவீடுகளில் ஆறாவது வீடாக விளங்குவது பழமுதிர்ச்சோலை.

சுட்ட பழம் வேண்டுமா? சுடாத பழம் வேண்டுமா என்று அவ்வை பாட்டியுடன்  முருகன் இங்குதான் உரையாடினார்.  இங்கு மலைமீது கோயில் கொண்டிருக்கிறார் முருகன்.  மதுரை மாவட்டம், அழகர் கோவில் மலை மீதுள்ள இடம் பழமுதிர்சோலை.

அறுபடை வீடுகள் மட்டுமல்லாமல் தமிழ்நாட்டின் பிற மாவட்டங்களில் அமைந்துள்ள பிரசித்தி பெற்ற முருகன் தலங்களிலும், சென்னை - வடபழனி முருகன் கோவில், சிக்கல் சிங்காரவேலர், எட்டுக்குடி முருகன், எண்கண்  முருகன், கோவை மருதமலை முருகன் கோவில்களிலும் தைப் பூச திருவிழா விமர்சையாக நடைபெறுகிறது.

தமிழ்நாடு மட்டுமின்றி இலங்கை, மலேசியா - சிங்கப்பூர், மொரியஸ் ஆகிய நாடுகளிலும் விமர்சையாக கொண்டாடப்படுகிறது தைப்பூசத் திருவிழா.

அம்மன் கோவில்களில் தைப் பூச விழா

முருகன் கோவில்கள் மட்டுமல்லாது அம்மன் கோவில்களிலும் தைப் பூச திருவிழா கொண்டாடப்பட்டது. கஞ்சி ஊற்றுதல், பால் காவடி எடுத்தல், காவடி ஆட்டம் ஆகியவற்றுடன் பக்தர்கள் விமர்சையாக திருவிழாவை கொண்டாடுகின்றனர்.