ஹைட்ரோ கார்பன் திட்டத்துக்கு எதிராக ஜன. 28-ல் டெல்டா மாவட்டங்களில் திமுக ஆர்ப்பாட்டம்

பதிவு செய்த நாள் : 22 ஜனவரி 2020 18:13

சென்னை,

காவிரி டெல்டா மாவட்டங்களில் ஹைட்ரோ கார்பன்  எடுக்கும் திட்டத்துக்கு எதிராக ஜனவரி 28ஆம் தேதி திமுக சார்பில் ஆர்ப்பாட்டம் நடத்தப்படும் என திமுக தலைவர் மு.க.ஸ்டாலின் அறிவித்துள்ளார்.

ஹைட்ரோ கார்பன் ஆய்வுக் கிணறுகள் தோண்ட சுற்றுச்சூழல் அனுமதியும் மக்களிடம் கருத்துக் கேட்புக் கூட்டம் நடத்தவும் தேவையில்லை என்று மத்திய அரசு புதிய அறிவிப்பு ஒன்றை வெளியிட்டுள்ளது.

மத்திய அரசின் இந்த அறிவிப்பு தமிழ்நாடு விவசாயிகள் மற்றும் அரசியல் கட்சியினரிடையே கடும் கொந்தளிப்பை ஏற்படுத்தியுள்ளது. இதற்கு எதிராக தமிழக அமைச்சரவை கூடி தீர்மானம் நிறைவேற்ற வேண்டும் என்று திமுக கோரிக்கை வைத்திருந்தது. 

திமுக ஆர்ப்பாட்டம்

ஹைட்ரோ கார்பன் திட்டத்துக்கு எதிராக 2020 ஜனவரி 28-ம் தேதி டெல்டா மாவட்டங்களில் திமுக சார்பில் ஆர்ப்பாட்டம் நடத்தப்படும் என திமுக தலைவர் மு.க. ஸ்டாலின் இன்று அறிவித்துள்ளார்.

இதுகுறித்து ஸ்டாலின் விடுத்துள்ள அறிக்கையில், 

ஹைட்ரோ கார்பன் திட்டங்களுக்கு, “சுற்றுச்சூழல் அனுமதி, மக்களின் கருத்து கேட்பு தேவையில்லை” என்ற ஆணையை திரும்பப் பெற வலியுறுத்தியும் - விவசாய நிலங்களை பாழ்படுத்தும் ஹைட்ரோ கார்பன் திட்டங்களையும் திரும்பப் பெற்றும், காவிரி டெல்டாவை பாதுகாக்கப்பட்ட வேளாண் மண்டலமாக அறிவிக்க வேண்டுமென்றும், ஜனவரி 28-ம் தேதி அன்று தஞ்சாவூர், திருவாரூர், நாகப்பட்டினம், புதுக்கோட்டை, கடலூர் ஆகிய மாவட்டத்தலை நகரங்களில், தி.மு.க. சார்பில் “மாபெரும் கண்டன ஆர்ப்பாட்டம்” நடைபெறும்.

இக்கண்டன ஆர்ப்பாட்டத்தில் திமுக நிர்வாகிகள், உடன்பிறப்புகள் மற்றும் விவசாயிகள் - மாணவர்கள், சமூக ஆர்வலர்கள் - பொதுநல அமைப்புகளைச் சேர்ந்தவர்கள், பெருமளவில் கலந்துகொண்டு, ஆர்ப்பாட்டத்தை வெற்றி பெறச் செய்ய வேண்டும் என்று அன்போடு கேட்டுக் கொள்கிறேன்.

இவ்வாறு திமுக தலைவர் மு.க.ஸ்டாலின் தெரிவித்துள்ளார்.