ரஜினி சொன்னது போல் 1971-ல் எதுவும் நடக்கவில்லை: அமைச்சர் ஜெயக்குமார் உறுதி

பதிவு செய்த நாள் : 22 ஜனவரி 2020 15:42

சென்னை,

நடிகர் ரஜினிகாந்த் சொன்னதுபோல் 1971-ல் எதுவும் நடக்கவில்லை என மீன்வளத்துறை அமைச்சர் ஜெயக்குமார் இன்று கருத்து தெரிவித்துள்ளார்.

கடந்த வாரம் சென்னையில் நடைபெற்ற துக்ளக் பத்திரிகையின் பொன்விழா நிகழ்ச்சியில் பேசிய நடிகர் ரஜினிகாந்த், 1971 ஆம் ஆண்டு சேலத்தில் நடைபெற்ற திராவிடர் கழகப் பேரணியின் போது ராமர், சீதையின் உருவங்கள் ஆடையில்லாமல் கொண்டுவரப்பட்டதாகவும், சோ வின் துக்ளக் பத்திரிகையைத் தவிர வேறு எந்த பத்திரிகையும் இதை வெளியிடவில்லை என குறிப்பிட்டு இருந்தார்.

இதற்கு பல்வேறு தரப்பினரும் கண்டனம் தெரிவித்திருந்த நிலையில், ரஜினிகாந்த் நேற்று செய்தியாளர்களைச் சந்தித்தார். அப்போது,

நான் கேள்விப்பட்டதையும் அவுட்லுக் பத்திரிகையில் வந்ததையும்தான் தான் பேசியதாகவும் அதற்காக யாரிடமும் மன்னிப்பு கேட்க முடியாது என்றும் ரஜினிகாந்த் தெரிவித்தார்.

ஜெயக்குமார் கருத்து

சென்னை -ராயபுரத்தில் அமைச்சர் ஜெயக்குமார் இன்று செய்தியாளர்கள் சந்திப்பில் கூறியதாவது:

துக்ளக் பத்திரிகையில் வந்த செய்திக்கு அவுட்லுக் பத்திரிகை எப்படி ஆதாரமாக முடியும்? 

ரஜினி சொன்னது போல் 1971-ல் எதுவும் நடைபெறவில்லை. இப்பொழுது இந்தப் பிரச்சினையை அவர் எதற்குப் பேச வேண்டும். இது மலிவான அரசியல்.

தேவையில்லாத ஒன்றை பேசுவதற்கு பதில் ரஜினி வாய் மூடி மவுனமாக இருக்க வேண்டும். 

1971ல் நடைபெறாத விஷயத்தை பேசி ரஜினி மக்களை திசை திருப்புகிறார். 

எத்தனை ரஜினி வந்தாலும் அதிமுகவை அசைத்துப் பார்க்க முடியாது.

இவ்வாறு அமைச்சர் ஜெயக்குமார்  கூறினார்.