2020 ஒலிம்பிக் குத்துச்சண்டை தகுதிச்சுற்று போட்டிக்கு மேரி கோம் தகுதி

பதிவு செய்த நாள் : 28 டிசம்பர் 2019 14:48

புதுடில்லி,

2020ம் ஆண்டுக்கான ஒலிம்பிக் போட்டிக்கான குத்துச்சண்டை தகுதி சுற்று போட்டியில் இந்தியா சார்பில் களமிறங்க குத்துச்சண்டை வீராங்கனை மேரி கோம் இன்று தகுதி பெற்றார்.

சீனாவில் அடுத்த ஆண்டு பிப்ரவரி மாதம் ஒலிம்பிக் போட்டிக்கான குத்துச்சண்டை தகுதி சுற்று போட்டி நடக்கிறது. இந்த போட்டியில் இந்திய பெண்கள் குத்துச்சண்டை அணியில் 5 எடைப்பிரிவுகளில் யார் பங்கேற்பது என்பதை முடிவு செய்வதற்கான 2 நாள் தகுதி போட்டி டில்லியில் நேற்று தொடங்கியது.

இதில் 51 கிலோ உடல் எடைப் பிரிவில் நடந்த குத்து சண்டை போட்டியில் 6 முறை உலக சாம்பியனான மணிப்பூரை சேர்ந்த மேரிகோம் (36) சக போட்டியாளரான ரிது கிரிவாலை வீழ்த்தினார்.

மேலும் இதே பிரிவில் நடந்த மற்றொரு ஆட்டத்தில் ஜூனியர் உலக சாம்பியனான தெலுங்கானாவை சேர்ந்த நிகாத் ஜரீன் (23), தேசிய சாம்பியன் ஜோதி குலியாவை தோற்கடித்தார். நடுவர்களின் ஒருமித்த முடிவின்படி நிகாத் ஜரீன் வெற்றியாளராக அறிவிக்கப்பட்டார்.

வெற்றி பெற்ற மேரிகோம் மற்றும் நிகாத் ஜரீன் இருவரும் இன்று நடைபெற்ற தகுதி சுற்றின் இறுதி ஆட்டத்தில் மோதினர்.

இதில் நிகாத் ஜரீனை 9- 1 என்ற விகிதத்தில் முறியடித்த மேரிகோம் ஒலிம்பிக் குத்துச்சண்டை தகுதி சுற்றுக்கான இந்திய அணியில் இடம் பெற்றார்.

மேரி கோம் வெற்றி பெற்றதாக அறிவிக்கப்பட்ட முடிவுக்கு நிகாத் ஜரீன் மற்றும் அவரது ஆதரவாளர்கள் கடும் எதிர்ப்பு தெரிவித்தனர். இது தொடர்பாக நிகாத் ஜரீன் மற்றும் மேரி கோம் இடையே வாக்குவாதம் ஏற்பட்டது.

இருதரப்பினர் இடையே வாக்குவாதம் தீவிரமடைந்ததைத் தொடர்ந்து இந்திய குத்துச்சண்டை கூட்டமைப்பின் தலைவர் அஜய் சிங் தலையிட்டு இருதரப்பினரிடமும் பேசி நிலைமையை கட்டுக்குள் கொண்டுவந்தார். விளையாட்டில் இவ்வாறு அரசியல் செய்தால் இந்திய குத்துச்சண்டை எப்படி வளரும் என செய்தியாளர்களிடம் அஜய் சிங் வேதனை தெரிவித்தார்.