மகாகவி பாரதியாரின் 138வது பிறந்தநாள்: பிரதமர் மோடி புகழஞ்சலி

பதிவு செய்த நாள் : 11 டிசம்பர் 2019 10:57

புதுடில்லி,      

மகாகவி சுப்பிரமணிய பாரதியாரின் 138வது பிறந்தநாளை முன்னிட்டு, இன்று பிரதமர் நரேந்திர மோடி அவருக்கு புகழாரம் சூட்டியுள்ளார்.

மகாகவி பாரதியாரின் 138வது பிறந்தநாள் இன்று கொண்டாடப்பட்டு வருகின்றது. இதையொட்டி பல்வேறு தலைவர்கள் அவருக்கு தங்கள் மரியாதையை செலுத்தி வருகின்றனர்.

பிரதமர் நரேந்திர மோடியும் அவருக்கு மரியாதை செலுத்தும் விதமாக டுவிட்டரில் பதிவு ஒன்றை இன்று வெளியிட்டுள்ளார். அதில்,

”மகாகவி பாரதியார் என்றழைக்கப்படும் மாமனிதர் சுப்பிரமணிய பாரதியின் பிறந்தநாளன்று அவரை நினைவு கூர்கிறேன். தேசப்பற்று, சமூக சீர்திருத்தம், கவிப்புலமைக்கு சிறந்த எடுத்துக்காட்டாய் திகழ்ந்தவர். அவரது எண்ணங்களும் பணிகளும் இன்றைக்கும் நம்மை எழுச்சியூட்டும் விதமாகவே உள்ளன.

சுப்பிரமணிய பாரதி, நீதி சமத்துவம் ஆகியவற்றை மற்ற எவற்றிற்கும் மேலாக நம்பினார். 'தனியொருவனுக்கு உணவில்லை எனில் ஜகத்தினை அழித்திடுவோம்' என்று ஒருமுறை சொன்னார். மனிதனின் அவதியை போக்கி அதிகாரமளிக்க அவர் கொண்டிருந்த பார்வையை இது ஒன்றே விளக்குகிறது” என்று பிரதமர் மோடி தமிழில் பதிவிட்டுள்ளார்.