கர்நாடக இடைத்தேர்தலில் பாஜக அமோக வெற்றி : ஆட்சியை தக்கவைத்தார் எடியூரப்பா

பதிவு செய்த நாள் : 09 டிசம்பர் 2019 18:58

பெங்களூரு,

கர்நாடகத்தின் 15 சட்டமன்ற தொகுதிகளில் நடைபெற்ற இடைத்தேர்தலில் பாஜக 12 இடங்களை கைப்பற்றி வெற்றி பெற்றுள்ளது. இதன்மூலம் முதல்வர் எடியூரப்பா தலைமையிலான பாஜக அரசு ஆட்சியை தக்க வைத்துள்ளது.



கடந்த ஆண்டு எச்.டி. குமாரசாமி தலைமையிலான காங்கிரஸ் – மதசார்பற்ற ஜனதா தளம் கூட்டணி கர்நாடகத்தில் ஆட்சி அமைத்தது. ஆனால் 14 மாதங்களுக்கு பின் கூட்டணி அரசை சேர்ந்த 17 எம்.எல்.ஏக்கள் தங்கள் பதவியை திடீரென்று ராஜினாமா செய்ததால் குமாரசாமி அரசு பெரும்பான்மை இழந்து ஆட்சி கவிழ்ந்தது.

அதைத்தொடர்ந்து எடியூரப்பா தலைமையில் கர்நாடகத்தில் பாஜக ஆட்சி அமைத்தது.

இதற்கிடையில் பதவியை ராஜினாமா செய்த 17 எம்.எல்.ஏக்களையும் சபாநாயகர் ரமேஷ்குமார் தகுதி நீக்கம் செய்து உத்தரவிட்டார். அதைத் தொடர்ந்து 17 எம்.எல்.ஏக்களின் தொகுதிகளும் காலியானதாக அறிவிக்கப்பட்டது.

காலியான 17 தொகுதிகளில் 15 தொகுதிகளுக்கு இடைத்தேர்தல் அறிவிக்கப்பட்டது. மாஸ்கி மற்றும் ஆர்.ஆர். நகர் தொகுதிகள் தொடர்பாக உயர்நீதிமன்றத்தில் வழக்கு நிலுவையில் உள்ளதால் இங்கு மட்டும் தேர்தல் அறிவிக்கப்படவில்லை.

தகுதி நீக்கப்பட்ட 17 எம்.எல்.ஏக்களில் 13 பேர் தாங்கள் முன்பு வெற்றி பெற்ற அதே தொகுதியில் பாஜக சார்பில் போட்டியிட்டனர்.  மேலும் காங்கிரஸ் எந்த கட்சியுடனும் கூட்டணி அமைக்காமல் இந்த தேர்தலில் தனியாக போட்டியிட்டது.

இந்நிலையில் டிசம்பர் 5ம் தேதி கர்நாடகத்தில் 15 சட்டமன்ற தொகுதிகளில் இடைத்தேர்தல் நடைபெற்றது.

பாஜக வெற்றி

கர்நாடக இடைத்தேர்தலுக்கான வாக்கு எண்ணிக்கை இன்று நடைபெற்றது. வாக்கு எண்ணிக்கை துவங்கியது முதல் பாஜக முன்னிலை வகித்து வந்தது.

வாக்கு எண்ணிக்கை முடிவில் தேர்தல் நடந்த 15 தொகுதிகளில் 12 தொகுதிகளை பாஜக கைப்பற்றி அமோக வெற்றி பெற்றது. குறிப்பாக காங்கிரஸ் மற்றும் மதசார்பற்ற ஜனதா தளம் கட்சிகளின் கைகளில் இருந்து வந்த மாண்டியா தொகுதியில் பாஜக தன் முதல் வெற்றியை பதிவு செய்துள்ளது.

நான்கு மாதங்கள் முன் ஆட்சி அமைத்த எடியூரப்பா தலைமையிலான அரசு பெரும்பான்மை பெற 6 இடங்கள் மட்டுமே தேவைப்பட்ட நிலையில் இன்று 12 இடங்களை கைப்பற்றியுள்ளதால் பாஜக அரசின் பலம் 105ல் இருந்து 117 ஆக உயர்ந்துள்ளது. இதனால் எடியூரப்பா தன் ஆட்சியை தக்கவைத்துள்ளார்.

மேலும் பாஜக சார்பில் போட்டியிட்ட தகுதிநீக்கப்பட்ட 13 எம்.எல்.ஏக்களில் 11 பேர் இந்த தேர்தலில் வெற்றி பெற்றுள்ளது குறிப்பிடத்தக்கது.

தேர்தல் வெற்றிக்கு பின் செய்தியாளர்களிடம் பேசிய முதல்வர் எடியூரப்பா தகுதி நீக்கப்பட்ட எம்.எல்.ஏக்கள் அனைவருக்கும் அமைச்சரவையில் பதவி அளிப்பதாக வாக்குறுதி அளிக்கப்பட்டுள்ளது. அந்த வாக்குறுதியில் இருந்து பின்வாங்கும் பேச்சுக்கே இடமில்லை என தெரிவித்தார்.

மேலும் மக்கள் நல்ல தீர்ப்பை அளித்துள்ளதாகவும் இனி கர்நாடகத்தில் நிலையான ஆட்சியை அளிக்க முடியும் என எடியூரப்பா கூறினார். 

கர்நாடக இடைத்தேர்தலில் காங்கிரஸ் 2 இடங்களை மட்டுமே கைப்பற்றியது. மீதி ஒரு இடத்தை சுயேட்சை வேட்பாளர் கைப்பற்றினார்.

சித்தராமையா ராஜினாமா

கர்நாடக இடைத்தேர்தலில் காங்கிரஸ் கட்சி படுதோல்வி அடைந்ததற்கு பொறுப்பேற்று காங்கிரஸ் தலைவர் சித்தராமையா தன் சட்டமன்ற எதிர்க்கட்சி தலைவர் பதவியை ராஜினாமா செய்தார்.

அவருடன் கர்நாடக காங்கிரஸ் கட்சி தலைவர் தினேஷ் குண்டு ராவும் தேர்தல் தோல்விக்கு பொறுப்பேற்று தன் பதவியை ராஜினாமா செய்தார்.

இருவரும் தங்கள் ராஜினாமா கடிதத்தை காங்கிரஸ் பொறுப்பு தலைவர் சோனியா காந்தியிடம் ஒப்படைத்தனர்.

கர்நாடக இடைத்தேர்தலில் மக்களின் தீர்ப்பை ஏற்பதாக இருவரும் ஊடகங்கள் முன்னிலையில் அறிவித்தனர்.