மு.க. ஸ்டாலினை வாழ்த்திய அரசகுமாருக்கு பாஜக கட்டுப்பாடு

பதிவு செய்த நாள் : 02 டிசம்பர் 2019 16:32

சென்னை

மு.க. ஸ்டாலினை சாதாரணமாகத் தான் வாழ்த்தினேன் என பாஜக மாநில துணைத்தலைவர் பி.டி. அரசகுமார் செய்தியாளர்களுக்கு இன்று அளித்த பேட்டியில் கூறியுள்ளார். அரசகுமார் ஊடகங்களில், கூட்டங்களில் கலந்துகொள்ள தமிழ்நாடு பாஜக பொதுச்செயலாளர் கட்டுப்பாடு விதித்துள்ளார்.

புதுக்கோட்டையில் நேற்று நடைபெற்ற திருமண விழா ஒன்றில் பா.ஜ.க. மாநில துணை தலைவர் பி.டி. அரசகுமார் கலந்து கொண்டு பேசும்பொழுது,

எம்.ஜி.ஆருக்கு அடுத்து நான் ரசிக்கும் தலைவர் மு.க. ஸ்டாலின். அவர் நினைத்தால் கூவத்தூர் சம்பவத்தின்போதே முதல்வராகியிருக்க முடியும். ஆனால் அவர் ஜனநாயகத்திற்காக அமைதியாக இருந்தார். காலம் வரும் கட்டாயம் ஸ்டாலின் முதலமைச்சர் ஆவார் எனப் பேசினார்.

அரசகுமாரின் இந்த பேச்சு பா.ஜ.க.வினரிடையே சலசலப்பினை ஏற்படுத்தியது.

அரசகுமார் பேட்டி

சென்னை விமான நிலையத்தில் தனது பேச்சு பற்றி செய்தியாளர்களிடம் அவர் அளித்த பேட்டியில், 

திருமணம் நடைபெறும் இடத்தில் ஸ்டாலினை சந்தித்தேன். திட்டமிட்டு சந்திக்கவில்லை,

என் தனிப்பட்ட உணர்வுகளை நான் வெளிப்படுத்தினேன். ஸ்டாலினை சாதாரணமாக தான் வாழ்த்தினேன்.

கட்சி தலைமை என்ன முடிவு எடுத்தாலும் அதனை ஏற்க தயார் என அரசகுமார் கூறியுள்ளார்.

அரசகுமாருக்கு பாஜக கட்டுப்பாடு

புதுக்கோட்டை திருமண நிகழ்ச்சியி்ல் திமுக தலைவர் ஸ்டாலின் முதலமைச்சர் ஆவார் என பா.ஜ.க. மாநில துணை தலைவர் அரசகுமார் பேசினார்.

இந்த பேச்சு குறித்து அரசகுமாரிடம் தமிழ்நாடு பாஜக பொதுச்செயலாளர் விளக்கம் கேட்டார், அதற்கு நேரடியாகவும், எழுத்தும் மூலமாகவும் அரசகுமார் விளக்கம் அளித்திருந்த நிலையில்

கட்சிக் கூட்டங்கள், ஊடக விவாதங்களில் அரசகுமார் பங்கேற்கக்கூடாது என தமிழ்நாடு பாஜக பொதுச்செயலாளர் நரேந்திரன் அறிவித்திருக்கிறார்.

மேலும், பாஜக டெல்லி தலைமைக்கும் கடிதம் எழுதியிருக்கிறோம், அங்கிருந்து வரும் முடிவு குறித்து நடவடிக்கை எடுக்கப்படும் என நரேந்திரன் தெரிவித்துள்ளார்.