ஸ்வீடன் அரசர் – ராணியுடன் பிரதமர் நரேந்திர மோடி சந்திப்பு

பதிவு செய்த நாள் : 02 டிசம்பர் 2019 12:11

புதுடில்லி

இந்தியா வந்துள்ள ஸ்வீடன் அரசர் கார்ல் கஸ்தஃப் மற்றும் ராணி சில்வியா ஆகியோர், பிரதமர் நரேந்திர மோடியை இன்று சந்தித்துப் பேசினர்.

5 நாள் அரசுமுறைப் பயணமாக ஸ்வீடன் அரசர் 16வது கார்ல் கஸ்தஃப் மற்றும் ராணி சில்வியா ஆகியோர் இன்று காலை இந்தியா வந்தடைந்தனர். இன்று காலை மத்திய வெளியுறவுத்துறை அமைச்சர் ஜெய்சங்கரை சந்தித்த ஸ்வீடன் அரசரும், ராணியும் இருதரப்பு உறவுகளை வலுபடுத்துவது குறித்து ஆலோசனை மேற்கொண்டனர்.

ராஷ்டிரபதி பவனில் சிறப்பான வரவேற்பு
ஸ்வீடன் அரசர் 16வது கார்ல் கஸ்தஃப் மற்றும் ராணி சில்வியா ஆகிய இருவரும், டில்லியில் உள்ள ராஷ்டிரபதி பவனிற்கு காரில் வந்தடைந்தனர். அவர்களை குடியரசு தலைவர் ராம்நாத் கோவிந்தும், அவரது மனைவி சவிதா கோவிந்தும் வரவேற்றனர். முப்படை வீரர்களின் மரியாதையை ஏற்றுக்கொண்ட ஸ்வீடன் அரசருக்கு சிவப்பு கம்பள வரவேற்பு அளிக்கப்பட்டது.
பிரதமர் மோடியுடன் சந்திப்பு
டில்லியில் உள்ள ஐதரபாத் இல்லத்தில் பிரதமர் நரேந்திர மோடியை, ஸ்வீடன் அரசர் கார்ல் கஸ்தஃப் மற்றும் ராணி சில்வியா ஆகிய இருவரும் சந்தித்துப் பேசினார். இதில், இருதரப்பு உறவுகளை மேம்படுத்துவது, இருதரப்பு நலன்களை சார்ந்த பிராந்திய மற்றும் சர்வதேச விவகாரங்கள் குறித்து கலந்துரையாடினர்.
மேலும், வர்த்தகம், முதலீடு, புதுப்பிக்கத்தக்க ஆற்றல், சுற்றுச்சூழல் மற்றும் பருவநிலை மாற்றம் ஆகிய துறைகளில் ஒத்துழைப்பு நல்குவது குறித்து ஆலோசனை மேற்கொள்ளப்பட்டது.