அயோத்தி வழக்கின் தீர்ப்பு, யாருடைய வெற்றியாகவோ தோல்வியாகவோ இருக்காது: பிரதமர் மோடி

பதிவு செய்த நாள் : 09 நவம்பர் 2019 10:06

புதுடில்லி,          

அயோத்தி வழக்கில் தீர்ப்பு எப்படி வெளியானாலும், அது யாருடைய வெற்றியாகவோ தோல்வியாகவோ இருக்காது என பிரதமர் நரேந்திர மோடி இன்று தெரிவித்துள்ளார்.

உத்தரபிரதேச மாநிலம் அயோத்தியில் உள்ள சர்ச்சைக்குரிய நிலம் யாருக்கு சொந்தம் என்பது தொடர்பான வழக்கில் தலைமை நீதிபதி ரஞ்சன் கோகாய் தலைமையிலான அரசியல் சாசன அமர்வு இன்று காலை 10.30 மணிக்கு தீர்ப்பு வழங்குகிறது.

நாடு முழுவதும் பல்வேறு முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன. சட்டம் ஒழுங்கை தொடர்ந்து கண்காணிக்கவேண்டும் என்றும், பாதுகாப்பு நடவடிக்கைகளை பலப்படுத்துமாறும் அனைத்து மாநில அரசுகளுக்கும் உள்துறை அமைச்சகம் சுற்றறிக்கை அனுப்பியுள்ளது.

இந்நிலையில் நாளை வெளியாக உள்ள அயோத்தி வழக்கின் தீர்ப்பு குறித்து பிரதமர் மோடி தனது டுவிட்டரில்,“அயோத்தி வழக்கில் உச்சநீதிமன்றம், எந்த முடிவை அளித்தாலும் அது யாருடைய வெற்றியாகவோ, தோல்வியாகவோ இருக்காது.

நாட்டு மக்களுக்கு எனது வேண்டுகோள் என்னவென்றால், இந்த முடிவு சமாதானத்தின் பெரிய பாரம்பரியத்தை மேலும் வலுப்படுத்தவேண்டும். இந்தியாவின் ஒற்றுமை மற்றும் நல்லெண்ணத்திற்கு நம் அனைவருக்கும் முன்னுரிமை அளிக்கவேண்டும்” என்று பிரதமர் மோடி பதிவிட்டுள்ளார்.