தென் ஆப்பிரிக்காவுக்கு எதிரான டெஸ்ட் கிரிக்கெட் போட்டி: தொடரை கைப்பற்றி இந்திய அணி அசத்தல்

பதிவு செய்த நாள் : 22 அக்டோபர் 2019 10:30

ராஞ்சி,         

ராஞ்சியில் நடந்த தென் ஆப்பிரிக்காவுக்கு எதிரான 3வது டெஸ்ட் போட்டியில் இந்திய அணி, இன்னிங்ஸ் வெற்றி பெற்று, தொடரையும் கைப்பற்றியது.

இந்தியா - தென்ஆப்பிரிக்கா கிரிக்கெட் அணிகளுக்கு இடையிலான 3வது மற்றும் கடைசி டெஸ்ட் ராஞ்சியில் நடைபெற்றது. முதலில் பேட்டிங் செய்த இந்திய அணி, முதல் இன்னிங்சில் 9 விக்கெட் இழப்பிற்கு 497 ரன்கள் குவித்து டிக்ளேர் செய்தது. பின்னர், முதல் இன்னிங்சில் பேட்டிங் செய்த தென் ஆப்பிரிக்க அணி, இன்றைய 3வது நாள் ஆட்டத்தின்போது 162 ரன்னில் சுருண்டு பாலோ-ஆன் ஆனது. இந்தியாவும் பாலோ-ஆன் கொடுக்க தென் ஆப்பிரிக்கா தொடர்ந்து 2வது இன்னிங்சில் பேட்டிங் செய்தது

இந்திய வீரர் முகமது ஷமியின் பந்து வீச்சால் தென்ஆப்பிரிக்காவின் விக்கெட்டுக்கள் மளமளவென சரிந்தன. 36 ரன்னுக்குள் 5 விக்கெட்டுக்களை இழந்து தடுமாறியது. நேற்றைய ஆட்டநேர முடிவில் தென்ஆப்பிரிக்கா 8 விக்கெட் இழப்பிற்கு 132 ரன்கள் சேர்த்திருந்தது.

இந்நிலையில், 4ம் நாள் ஆட்டம் இன்று காலை தொடங்கியது. ஆட்டம் தொடங்கிய சிறிது நேரத்தில் புரூயின்(30), நிகிடி(0) இருவரும், நதீம் ஓவரில் அடுத்தடுத்து விக்கெட்டை இழக்க, தென் ஆப்பிரிக்க அணி 133 ரன்களில் சுருண்டது.

இதனால் இந்திய அணி இன்னிங்ஸ் மற்றும் தொடரை 202 ரன்கள் வித்தியாசத்தில் கைப்பற்றியது. இது, தென் ஆப்பிரிக்க அணிக்கு எதிரான மிகப்பெரிய வெற்றியாகும்.

இந்த வெற்றியின் மூலம் இந்திய அணி 3 போட்டிகள் கொண்ட டெஸ்ட் தொடரை 3-0 என முழுமையாக கைப்பற்றியுள்ளது என்பது குறிப்பிடத்தக்கது.