பாஜக - அதிமுக கூட்டணியிலிருந்து விலகிவிட்டதாக கிருஷ்ணசாமி அறிவிப்பு

பதிவு செய்த நாள் : 10 அக்டோபர் 2019 16:20

சென்னை

அதிமுக கூட்டணியில் இருந்து விலகிவிட்டோம். நாங்குநேரி, விக்கிரவாண்டி சட்டமன்ற தொகுதி இடைத்தேர்தலில் அதிமுகவுக்கு ஆதரவு இல்லை என புதிய தமிழகம் கட்சி தலைவர் டாக்டர் கிருஷ்ணசாமி வியாழனன்று அறிவித்துள்ளார்.

சமீபத்தில் நடைபெற்ற 17வது நாடாளுமன்றத் தேர்தலின் போது அதிமுக - பாஜக கூட்டணி அறிவிக்கப்பட்டது. அதில் இடம்பெற்று தென்காசி தொகுதியில் புதிய தமிழகம் போட்டியிட்டது. தற்போது அதிமுக கூட்டணியில் இருந்து விலகிவிட்டதாக கிருஷ்ணசாமி இன்று அறிவித்தார்.  

இதுகுறித்து செய்தியாளர்களை சந்தித்த அவர் கூறியதாவது:

 “அதிமுகவை நம்பி நாங்கள் ஏமாந்து போய்விட்டோம். சில கோரிக்கைகளை முன்வைத்து கூட்டணி வைத்தோம். அந்தக் கோரிக்கைகளை ஜெயலலிதாவும் நிறைவேற்றவில்லை..

2010 ஆம் ஆண்டில் ஜெயலலிதா முதலமைச்சராக இல்லை. அதிமுகவினர் பெரும்பாலானோர் திமுகவுக்கு மாறிக்கொண்டிருந்தனர். அப்போது நாங்கள் ஜெயலலிதாவை சந்தித்துப் பேசினோம். அதிமுகவுக்கு ஆதரவு தெரிவித்தோம்.

ஆட்சிக்கு வந்தவுடன் எங்கள் கோரிக்கைகளை நிறைவேற்றுவதாக ஜெயலலிதா வாக்குறுதி அளித்தார். ஆனால் அவர் செய்யவில்லை. அதன்பின் சங்கரன்கோயில் இடைத்தேர்தலிலும் வாக்குறுதி கொடுத்தார்.

அதன் பின்னரும் அதிகவுக்கு ஆதரவு அளித்தோம் ஆனால் இன்று வரை கோரிக்கைகள் நிறைவேற்றப்படவில்லை.

அதிமுகவை நம்பி ஏமாந்துவிட்டோம். அதனால் கூட்டணியில் இருந்து விலகுகிறோம்.

அதனால் நாங்குநேரி, விக்கிரவாண்டி தொகுதி சட்டமன்ற இடைத்தேர்தலில் அதிமுகவுக்கு எங்கள் ஆதரவு இல்லை” என புதிய தமிழகம் கட்சி தலைவர் கிருஷ்ணசாமி செய்தியாளர்கள் சந்திப்பில் தெரிவித்துள்ளார்.