செம்மர கட்டை கடத்த முயன்ற 4 தமிழர்கள் திருமலையில் கைது

பதிவு செய்த நாள் : 10 அக்டோபர் 2019 13:27

திருப்பதி,

திருமலையில் இருந்து 30 லட்ச ரூபாய் மதிப்புள்ள செம்மர கட்டைகளை கடத்த முயன்ற தமிழ்நாட்டைச் சேர்ந்த 4 பேர் ஆந்திரா போலீசாரால் கைது செயப்பட்டுள்ளனர்.

ஆந்திர மாநில வனப்பகுதியில் சட்டவிரோதமாக செம்மரங்களை வெட்டும் விவகாரம் தொடர்ந்து நிகழ்ந்து வருகிறது. செம்மரம் வெட்டுவது தொடர்பாக தமிழர்கள் பலர் கைது செய்யப்படுவதும் சர்ச்சையை ஏற்படுத்தி வருகிறது.

செம்மரக் கடத்தல்காரர்கள் என தமிழர்களை  ஆந்திர காவல்துறை சிறையில் அடைப்பதும், குற்ற மற்றவர்களை செம்மரக் கடத்தல்காரர்கள் என சிறை பிடிக்கிறது என்றும் பல்வேறு வகையான விமர்சனங்கள் எழுந்து வருகிறது. எனினும், செம்மரக் கடத்தலை தடுக்க ஆந்திர அரசு பல்வேறு நடவடிக்கைகளை எடுத்து வருகிறது. 

இந்நிலையில், திருமலையில் இருந்து திருப்பதி அலிபிரி மலைப்பாதை வழியாக செம்மரங்கள் கடத்தப்படுவதாக செம்மரக் கடத்தல் தடுப்பு பிரிவு போலீசாருக்கு ரகசிய தகவல் கிடைத்தது. இதனைத்தொடர்ந்து, செம்மரக்கடத்தல் தடுப்பு பிரிவு காவல் துணை ஆய்வாளர் வாசு தலைமையில் திருமலையிலிருந்து திருப்பதிக்கு வாகனங்கள் வரும் முதல் மலைப்பாதையில் போலீசார் வாகன சோதனையில் ஈடுபட்டனர்.  அதிகாலை 3:30 மணியளவில் வந்த வாகனத்தை செம்மரக் கடத்தல் தடுப்பு பிரிவு போலீசார் தடுத்து நிறுத்தி சோதனை மேற்கொண்டனர். அப்போது வாகனத்தில் 13  செம்மரக்கட்டைகள் இருந்தது தெரியவந்தது.

இதையடுத்து, வாகனத்தில் இருந்த 4 பேரை பிடித்து விசாரணை மேற்கொண்டதில் முருகேசன் (25), ஓட்டுனர் பெருமாள் வேலு (35),  அருணாச்சலம் (30), கந்தசுவாமி (27) என்றும், இதற்கு முன்னதாக இதே வழியில் 5 முறை செம்மரக் கடத்தலில் அவர்கள் ஈடுபட்டதும் போலீசாருக்கு தெரிய வந்துள்ளது.

இதுதொடர்பாக வழக்குப்பதிவு செய்து அவர்களை போலீஸார் கைது செய்துள்ளனர்.  30 லட்ச ரூபாய் மதிப்புள்ள 13 செம்மரக்கட்டைகளை வாகனத்துடன் பறிமுதல்செய்து அவர்களிடம் தொடர்ந்து விசாரணை மேற்கொண்டு வருகின்றனர்.