பித்ரு தோஷம் போக்கும் மகாளய அமாவாசை - தர்ப்பணம் கொடுக்க குவிந்த பக்தர்கள்

பதிவு செய்த நாள் : 28 செப்டம்பர் 2019 12:57

சென்னை

இன்று மாகாளய அமாவாசை. காசி முதல் ராமேஸ்வரம் வரை பல்வேறு இடங்களில் உள்ள புனித நீர்நிலைகளில் ஏராளமானோர் நீராடி, மறைந்த தங்களின் முன்னோர்களுக்கு தர்ப்பணம் கொடுத்து வழிபாடு நடத்தினர்.

புரட்டாசி மாதத்தில் வரும் மகாளய அமாவாசை முன்னோர்களுக்கு தர்ப்பணம் கொடுக்க மிகச்சிறப்பான நாளாக கருதப்படுகிறது. 20 ஆண்டுகளுக்குப் பிறகு சனிக்கிழமையில் இன்றைய மஹாளய அமாவாசை திதி தர்ப்பணம் கடைபிடிக்கப்படுவதும் சிறப்பாகக் கருதப்படுகிறது.

மகாளய அமாவாசை நாளில், புனித தலங்களில் உள்ள நீர் நிலைகளிலும், புனித நதிகளிலும், கடலிலும்  நீராடி தங்களது மறைந்த முன்னோர்களுக்கு படையலிட்டும், தர்ப்பணம் கொடுத்தும் வழிபட்டால் கர்மா நீங்கி அவர்களது பரிபூரண ஆசி கிடைக்கும் என்பது ஐதீகம்.

மஹாளய அமாவாசை நாளில், கருப்பு உளுந்து, கறுப்பு எள், வெல்லம், உப்பு, புத்தாடை, தேங்காய், காய்கறி, பழங்கள் போன்றவற்றை தானம் அளித்து வழிபடுவதும் மிகவும் சிறப்பு என கடைப்பிடிக்கப்பட்டு வருகிறது.

வடஇந்தியாவில் காசி, வாரணாசி, பனாரஸ், கங்கோத்ரி புனித கரையில் புனித நீராடி முன்னோர்களுக்குத் தர்ப்பணம் அளித்தனர்.

தமிழ்நாட்டில் சென்னை மயிலாப்பூர் கபாலீஸ்வரர் கோவில், திருவாரூர் தியாகராஜர் கோவில், நாகப்பட்டிணம் மாவட்டம் வேதாரண்யம், கோடியக்கரை கடற்கரை, திருச்சி - ஸ்ரீரங்கம் காவிரிக்கரை, ராமேஸ்வரம் கடல் மற்றும் ராமநாதசுவாமி திருக்கோயில், கும்பகோணம், மயிலாடுதுறை மற்றும் சிறப்பு புனித தலங்களில் மஹாளய அமாவாசையை முன்னிட்டு மக்கள் புனித நீராடி, புதுத்துணி உடுத்தி, தான தருமங்கள் செய்து தங்களது முன்னோர்களுக்கு தர்ப்பணம் செய்தனர்.



காசிக்கு நிகராக கருதப்படும் திருவாரூர் தியாகராஜ சுவாமி ஆலயத்தில் மேற்குபுறம் அமைந்திருக்கும் கமலாலய தீர்த்த குளத்தில், மஹாளய அமாவாசையை முன்னிட்டு  இன்று அதிகாலை முதல் ஆயிரக்கணக்கானோர் புனித நீராடி மறைந்த தங்களுடைய முன்னோர்களுக்கு  தர்பணம் செய்து வழிபட்டனர்.

ராமேஸ்வரத்தில் திரண்ட லட்சக்கணக்கான பக்தர்கள் புனித நீராடி, தங்களது முன்னோர்களுக்கு தர்ப்பணம் செய்தனர்.  அக்னி தீர்த்த கடலில் புனித நீராடிய பக்தர்கள், கடற்கரையில் திதி கொடுத்தனர்.

சென்னை -  மைலாப்பூர் கபாலீசுவரர் கோவில் குளத்தில் ஏராளமானோர் புனித நீராடினர்.  படித்துறையில் அமர்ந்து மறைந்த தங்களது முன்னோர்களுக்கு தர்ப்பணம் கொடுத்து வழிபாடு நடத்தி, பித்ருகடன்களை நிறைவேற்றினர்.

திருச்சி ஸ்ரீரங்கம் காவிரி அம்மாமண்டபம் படித்துறையில் ஆயிரக்கணக்கானோர் புனித நீராடினர்.  பின்னர் எள் தண்ணீர் இட்டு வேத விற்பனர்கள் மந்திரங்கள் ஓதி பூஜை செய்து அதனை காவிரி ஆற்றில் விட்டு தங்கள் முன்னோர்களுக்கு திதி கொடுத்தனர்.

அய்யாளம்மன், சிந்தாமணி, ஓடத்துறை ஆகிய காவிரி படித்துறையிலும் முன்னோர்களுக்கு ஆயிரக்கணக்கானோர் திதி கொடுத்தனர்.

நாகை மாவட்டம் வேதாரண்யம் சன்னதி கடல் மற்றும் கோடியக்கரை ஆதிசேது கடலில் மஹாளய அமாவாசையையொட்டி ஏராளமானோர் புனித நீராடினர். கடற்கரையில் அமர்ந்து மறைந்த மூதாதையர்களுக்கு பச்சரிசி, காய்கறிகள், பழங்கள், தர்ப்பணம் கொடுத்து வழிபட்டனர்.

காரைக்காலில் புனித நீராடல்

புதுச்சேரி யூனியன் பிரதேசத்துக்கு உட்பட்ட காரைக்காலில் அரசலாறும், கடலும் சங்கமிக்கும் பகுதியில் தர்ம ரக்க்ஷிண சமிதி சார்பில் ஏராளமானோர் ஒரே நேரத்தில் தங்களது முன்னோர்களுக்கு தர்ப்பணம் கொடுத்து வழிபட்டனர். பின்னர் எள், தண்ணீர், பூ ஆகியவற்றை கடலில் விட்டு, நீரில் மூழ்கி வழிபாடு நடத்தினர்.