37 ஆண்டுகளுக்கு பிறகு குலசேகரமுடையார் கோயிலுக்கு திரும்பிய ஐம்பொன் நடராஜர் சிலை!

பதிவு செய்த நாள் : 24 செப்டம்பர் 2019 14:32

சென்னை,

37 ஆண்டுகளுக்கு முன்பு, கடந்த 1982-ல் காணாமல் போன ஐம்பொன் நடராஜர் சிலை ஆஸ்திரேலியாவிற்கு கடத்தப்பட்டது. சிலைக்கடத்தல் தடுப்பு பிரிவு சிறப்பு அதிகாரி பொன்.மாணிக்கவேல் தலைமையிலான போலீஸார் மீட்டுள்ளனர். நடராஜர் சிலை இன்று கோவிலில் வைத்து பூஜிக்கப்பட்டது.

திருநெல்வேலி மாவட்டம் கல்லிடைக்குறிச்சி குலசேகரமுடையார் கோயிலில் 37 ஆண்டுகளுக்கு முன்பு ஐம்பொன்னால் செய்யப்பட்ட நடராஜர் சிலை திருட்டு போனது. சிலை காணாமல் போனது தொடர்பாக கல்லிடைக்குறிச்சி காவல்துறையினர் வழக்குப்பதிவு செய்து விசாரணை நடத்தினர். ஆனால், வழக்கில் எந்த வித முன்னேற்றமும் ஏற்படாததால் 1984-ஆம் ஆண்டு வழக்கு முடித்து வைக்கப்பட்டது.

சென்னை உயர்நீதிமன்றத்தால் நியமிக்கப்பட்டுள்ள சிலை கடத்தல் தடுப்பு பிரிவு சிறப்பு அதிகாரி பொன்.மாணிக்கவேல் தலைமையிலான சிலைக் கடத்தல் தடுப்பு பிரிவு காவல்துறையினர் இந்த வழக்கை மீண்டும் விசாரித்தனர். விசாரணையில் அந்த சிலை ஆஸ்திரேலியாவில் உள்ள அருங்காட்சியகம் ஒன்றில் இருப்பது தெரியவந்தது.

ஆஸ்திரேலியாவிலிருந்து மீட்கப்பட்ட நடராஜர் சிலை கடந்த செப்டம்பர் 13-ஆம் தேதி ரயில் மூலம் டெல்லியிலிருந்து சென்னைக்கு எடுத்துவரப்பட்டது. சிலை கடத்தல் வழக்குகளை விசாரிக்கும் தஞ்சை மாவட்டம் கும்பகோணத்தில் உள்ள கூடுதல் தலைமை குற்றவியல் நீதிமன்றத்திற்கு நேற்று கொண்டுவரப்பட்டது.  

இதனை தொடர்ந்து. 37 ஆண்டுகளுக்கு பிறகு நடராஜர் சிலை தற்போது மீண்டும் கல்லிடைக்குறிச்சி குலசேகரமுடையார் கோயிலில் வழிபாட்டிற்காக இன்று வைக்கப்பட்டுள்ளது.

மேள வாத்தியங்கள் முழங்க, கல்லிடைக்குறிச்சி குலசேகரமுடையார் கோயிலுக்குள் கொண்டுவரப்பட்ட ரூ. 30 கோடி மதிப்புள்ள ஐம்பொன் நடராஜர் சிலைக்கு 24 மணிநேரம் காவல்துறை பாதுகாப்பு வழங்கப்படும்.