டில்லி – லாகூர் இடையிலான பேருந்து சேவையை ரத்து செய்தது பாகிஸ்தான் அரசு

பதிவு செய்த நாள் : 10 ஆகஸ்ட் 2019 10:08

இஸ்லாமாபாத்,           

ஜம்மு காஷ்மீர் விவகாரத்தில் இந்திய அரசு மேற்கொண்ட அதிரடி நடவடிக்கையால் கோவமடைந்துள்ள பாகிஸ்தான், டில்லி - லாகூர் இடையிலான பேருந்து சேவையையும் ரத்து செய்துள்ளது.

ஜம்மு காஷ்மீருக்கு சிறப்பு அந்தஸ்து வழங்கும் 370வது சட்டப் பிரிவை இந்தியா ரத்து செய்துள்ளது. அத்துடன் ஜம்மு - காஷ்மீர் மாநிலத்தை 2 யூனியன் பிரதேசங்களாக பிரித்து அதிரடி நடவடிக்கையை எடுத்தது. இந்தியாவின் இந்த நடவடிக்கைகளால் கடும் கோவமடைந்த பாகிஸ்தான் அரசு பல்வேறு பதிலடி கொடுக்கும் வகைகள் பல நடவடிக்கைகளை எடுத்து வருகின்றது.

டில்லியில் இருந்து லாகூர் செல்லும் சம்ஜவுதா எக்ஸ்பிரஸ் ரயிலை பாகிஸ்தான் பகுதிக்குள் அனுமதிக்க மறுத்து நிறுத்தியது. இதேபோல் ஜோத்பூர்-கராச்சி இடையிலான தார் எக்ஸ்பிரஸ் ரயிலையும் அனுமதிக்காமல் ரத்து செய்தது.

இந்நிலையில், லாகூர்-டில்லி இடையே நட்புரீதியில் இயக்கப்படும் பேருந்து சேவையையும் பாகிஸ்தான் அரசு ரத்து செய்துள்ளது. இந்த தகவலை பாகிஸ்தானின் தகவல் தொடர்புத்துறை அமைச்சர் முராத் சயீத் தெரிவித்தார். தேசிய பாதுகாப்பு கமிட்டி எடுத்த முடிவின்படி இந்த நடவடிக்கை எடுக்கப்பட்டிருப்பதாகவும் அவர் தெரிவித்தார்.

இந்த பேருந்து சேவையானது 1999ல் முதன் முதலில் அறிமுகம் செய்யப்பட்டது. ஆனால், இந்தியாவில் 2001ம் ஆண்டு நடந்த பாராளுமன்றத் தாக்குதலுக்குப் பிறகு பேருந்து சேவை நிறுத்தி வைக்கப்பட்டது. அதன்பின்னர், 2003ல் மீண்டும் பேருந்து சேவை தொடங்கியது என்பது குறிப்பிடத்தக்கது.