கும்பகோணம் பள்ளி தீ விபத்து: 15-ஆம் ஆண்டு நினைவு தினம் அனுசரிப்பு

பதிவு செய்த நாள் : 16 ஜூலை 2019 12:29

கும்பகோணம்,

கும்பகோணம் பள்ளி தீ விபத்தில் இறந்த 94 குழந்தைகளின் 15வது ஆண்டு நினைவு தினம் இன்று அனுசரிக்கப்படுகிறது. ஆண்டுகள் பல கடந்தும் ஆறாத ரணத்துடன் வாழ்கின்றனர் அக்குழந்தைகளின் பெற்றோர்கள்.

2004ஆம் ஆண்டு இதேநாளில், கும்பகோணத்தில் உள்ள  ஸ்ரீ கிருஷ்ணா ஆரம்பப் பள்ளிக்குச் சென்ற பால் மணம் மாறாத பிஞ்சு குழந்தைகள் பள்ளியில் ஏற்பட்ட தீயில் சிக்கி உயிரிழந்தனர்.

பள்ளியில் மதிய உணவு தயாரித்தபோது சமையலறையின் கூரையில் பற்றிய தீ, வகுப்பறைகளுக்கு மேல் போடப்பட்டிருந்த கீற்றுக் கூரைகளிலும் பரவியது. தீயின் கோரப் பிடியில் சிக்கிய குழந்தைகளின் அலறல் கேட்போரைக் கலங்கடித்தன. சாலையில் சென்றவர்கள், அக்கம்பக்கத்தினர், தீயணைப்பு வீரர்கள் கடுமையாகப் போராடியும் குழந்தைகளைக் காப்பாற்ற முடியவில்லை.

சற்று நேரத்தில் 94 குழந்தைகள் உடல் கருகி உயிரிழந்தன. கரிக்கட்டைகளாகக் கிடந்த குழந்தைகளின் சடலங்களைக் கண்டு பெற்றோர்கள் உறவினர்கள் கதறி அழுதனர்.

இந்த கொடூர சம்பவம் நிகழ்ந்து 15 ஆண்டுகள் உருண்டோடி விட்டன. ஒவ்வொரு ஆண்டும் இதே நாளில் கண்ணீருடன் பெற்றோரும், பொதுமக்களும் அஞ்சலி செலுத்தி வருகின்றனர்.

தீ விபத்தின் 15-ஆம் ஆண்டு நினைவு தினம் இன்று அனுசரிக்கப்பட்டு வருகிறது. தீ விபத்தில் இறந்த குழந்தைகளுக்கு அவர்களின் பெற்றோர், பள்ளி மாணவ, மாணவியர் மற்றும் மக்கள் அஞ்சலி செலுத்தி வருகின்றனர்.

பள்ளியின் முன்பு குழந்தைகளின் படங்களை வைத்து மலர் தூவி அஞ்சலி செலுத்தினர். குழந்தைகளின் நினைவிடங்களிலும் அவர்களுக்கு பிடித்த இனிப்பு வகைகளை வைத்து பெற்றோர்கள் அஞ்சலி செலுத்தினர்.