தமிழில் உடனுக்குடன் உச்சநீதிமன்றத் தீர்ப்புகள்: தலைமை நீதிபதியிடம் திமுக மனு

பதிவு செய்த நாள் : 12 ஜூலை 2019 19:40

புதுடில்லி,

   உச்சநீதிமன்றத்தின் தீர்ப்புகளை உடனுக்குடன் மொழி பெயர்ப்பதற்கான மொழிகளின்  பட்டியலில் தமிழையும் சேர்க்க வேண்டும் என்று தலைமை நீதிபதியிடம் திமுக அளித்துள்ளது.

இதுதொடர்பாக திமுக தலைமையகம் இன்று விடுத்துள்ள அறிக்கையில் கூறப்பட்டுள்ளதாவது:

உச்சநீதிமன்றத்தின் தீர்ப்புகளை உடனுக்குடன் ஏககாலத்தில் மொழி பெயர்ப்பதற்கான மொழிகளின் முதல் பட்டியலிலேயே தமிழையும் சேர்க்க வேண்டும் என்று கழகத் தலைவர் மு.க.ஸ்டாலின் சார்பில் நாடாளுமன்றக் கழகக் குழுத் தலைவர் டி.ஆர்.பாலு நேற்று உச்சநீதிமன்றத் தலைமை நீதிபதியை நேரில் சந்தித்து மனு கொடுத்து வலியுறுத்தினார்.

கழகத் தலைவர் மு.க.ஸ்டாலின் சார்பில் நாடாளுமன்றக் குழுத் தலைவர் டி.ஆர்.பாலு தெரிவித்த கருத்துக்களைக் கூர்மையாகக் கேட்டுக் கொண்ட இந்தியாவின் தலைமை நீதிபதி, உச்சநீதிமன்றத்தின் தீர்ப்புகளை ஏக காலத்தில் மொழி பெயர்த்து வழங்குவதற்கு உத்தேசிக்கப்பட்டிருக்கும் தாய்மொழிகளின் முதல் பட்டியலிலேயே தமிழையும் சேர்ப்பது குறித்த கோரிக்கையை பரிசீலித்து, விரைவில் நல்ல முடிவை எடுப்பதற்கு ஒப்புக் கொண்டார்.

இவ்வாறு திமுக தலைமையகம் விடுத்த அறிக்கையில் தெரிவிக்கப்பட்டுள்ளது.