இலங்கை கடற்படை அட்டூழியம்: நெடுந்தீவு அருகே ராமேஸ்வரம் மீனவர்கள் 6 பேர் கைது

பதிவு செய்த நாள் : 12 ஜூலை 2019 13:37

ராமேஸ்வரம்,

  எல்லை தாண்டி மீன்பிடித்ததாக நெடுந்தீவு அருகே ராமேஸ்வரம் மீனவர்கள் 6 பேரை இலங்கை கடற்படையினர் கைது செய்துள்ளனர்.

ராமேஸ்வரத்தில் இருந்து மீனவர்கள் நேற்று வழக்கம்போல் மீன்பிடிக்க கடலுக்கு சென்றனர். இவர்கள் அனைவரும் நேற்றிரவு நெடுந்தீவு அருகே மீன்பிடித்துக் கொண்டிருந்ததாக கூறப்படுகிறது.

அப்போது அங்கு ரோந்து வந்த இலங்கை கடற்படையினர் எல்லை தாண்டி மீன்பிடித்ததாகக் கூறி ராமேஸ்வரம் மீனவர்கள் 6 பேரையும் கைது செய்தனர். அத்துடன் அவர்களின் நாட்டுப்படகையும் இலங்கை கடற்படையினர் பறிமுதல் செய்தனர்.

இதையடுத்து கைது செய்யப்பட்ட மீனவர்களை காங்கேசன் கடற்படை முகாமிற்கு அழைத்துச் சென்று விசாரணை நடத்தி வருகின்றனர். விசாரணைக்கு பின்னர் ராமேஸ்வரம் மீனவர்கள் மீது வழக்குப்பதிவு செய்யப்படும் என கூறப்படுகிறது.