அமெரிக்க வெள்ளை மாளிகைக்குள் வெள்ளம் புகுந்தது

பதிவு செய்த நாள் : 09 ஜூலை 2019 15:16

வாஷிங்டன், 

   அமெரிக்காவில் கடந்த சில நாட்களாக கன மழை பெய்து வருகிறது. இதனால் பல பகுதிகளில் வெள்ளப்பெருக்கு ஏற்பட்டுள்ளது. அமெரிக்க அதிபரின் வெள்ளை மாளிகையின் கீழ்தளப் பகுதியிலும் மழைநீர் புகுந்ததாக தகவல்கள் வெளியாகி உள்ளன.

அமெரிக்க தலைநகர் வாஷிங்டனில் அந்நாட்டு நேரப்படி நேற்று காலை கனமழை பெய்தது. ஒரு மணி நேரத்தில் பலத்த மழை கொட்டித் தீர்த்ததால் பல பகுதிகளில் திடீர் வெள்ளப்பெருக்கு ஏற்பட்டது.

சாலைகளில் திடீரென காட்டாறு போல வெள்ளம் பாய்ந்தது மழைநீர் வழிந்தோடி செல்ல வழியில்லாததால் இதுபோன்ற திடீர் வெள்ளப்பெருக்கு ஏற்பட்டதாகக் கூறப்படுகிறது.

சாலைகளில் சென்ற கார்கள் இந்த எதிர்பாராத வெள்ளத்தில் சிக்கி நின்றன. வெள்ளம் தொடர்பான புகைப்படங்கள், வீடியோக்கள் சமூகவலைதளங்களில் பகிரப்பட்டு வருகின்றன

.

மெட்ரோ ரயில் நிலையங்கள் உள்ளிட்ட இடங்களில் மீட்புப் பணியாளர்கள் களமிறக்கப்பட்டனர். சில இடங்களில் வெள்ளத்தில் சிக்கிக் கொண்டவர்கள் மோட்டார் படகுகள் மூலம் மீட்கப்பட்டுள்ளனர்.

நீரிறைக்கும் எந்திரங்கள் மூலம் நீரை வெளியேற்றும் பணிகள் நடைபெற்று வருகின்றன. கனமழை திடீர் வெள்ளப்பெருக்கின் காரணமாக வெள்ளை மாளிகையின் தரைகீழ் தளத்தில் மழைநீர் புகுந்தது தொடர்பான புகைப்படங்களும் வெளியாகியுள்ளன.