சர்வதேச கிரிக்கெட் போட்டிகளில் இருந்து அம்பத்தி ராயுடு ஓய்வு

பதிவு செய்த நாள் : 03 ஜூலை 2019 15:36

புதுடில்லி

உலகக் கோப்பை கிரிக்கெட் தொடருக்கான இந்திய அணியில் இடம் கிடைக்காததால் அதிருப்தியில் இருந்த அம்பத்தி ராயுடு, கிரிக்கெட் போட்டிகளில் இருந்து ஓய்வு பெறுவதாக அறிவித்துள்ளார்.

இந்திய கிரிக்கெட் அணியின் மிடில் ஆர்டர் பேட்ஸ்மேனாக விளையாடி வந்தவர் அம்பத்தி ராயுடு. தற்போது நடைபெற்றுவரும் உலகக் கோப்பை கிரிக்கெட் தொடருக்கான இந்திய அணியில் அவருக்கு வாய்ப்பு வழங்கப்படவில்லை. தமிழக வீரர் விஜய்சங்கரை அணியில் சேர்த்தபோது அவர்  அதிருப்தி தெரிவித்தார். அணியில் தனக்கு வாய்ப்பு கிடைக்கும் என்ற நம்பிக்கையில் அம்பதி ராயுடு இருந்தார்.

இந்நிலையில், உலகக் கோப்பை தொடரில் ஷிகர் தவான் மற்றும் விஜய் சங்கர் இருவரும் காயம் காரணமாக விலகிவிட்டனர். மாற்று வீரர்களை தேர்வு செய்யும்போதும் அம்பதி ராயுடுக்கு வாய்ப்பு வழங்கப்படவில்லை. இதனால் அம்பத்தி ராயுடு மேலும் அதிருப்தி அடைந்தார்.

அம்பத்தி ராயுடு நிராகரிக்கப்பட்டதை ஐஸ்லாந்து கிரிக்கெட் நிர்வாகம் பயன்படுத்திக்கொள்ள விரும்பியது. 

அம்பத்தி ராயுடுவை தங்கள் நாட்டுக்காக விளையாடும்படி கேட்டுக்கொண்டதுடன், அவருக்கு நிரந்தர குடியுரிமை பெற்றுத்தரவும் முன்வந்தது.

கிரிக்கெட்டிலிருந்து விலகல்

இந்நிலையில், ஐபிஎல் உள்பட அனைத்து வகை கிரிக்கெட் போட்டிகளில் இருந்தும் விலகுவதாக அம்பத்தி ராயுடு அறிவித்திருப்பதாக தகவல்கள் கிடைத்துள்ளன.

ஆந்திர பிரதேச மாநிலத்தைச் சேர்ந்த இவர், கடந்த 2013ம் ஆண்டு ஜிம்பாப்வேக்கு எதிரான ஒருநாள் போட்டியின்மூலம், சர்வதேச போட்டிகளில் அறிமுகமானார். அதன்பின், இந்திய அணிக்காக 55 ஒருநாள் போட்டிகள் மற்றும் 6 டி20 போட்டிகளில் விளையாடியுள்ளார். 

ஒரு நாள் போட்டிகளில் 10 அரை சதங்கள் உள்பட 1694 ரன்களும், டி20 போட்டிகளில் 42 ரன்களும் எடுத்துள்ளார்.

ஒருநாள் போட்டி மற்றும் டி20 போட்டிகளில் கூடுதல் கவனம் செலுத்துவதற்காக, முதல்தர போட்டிகளில் இருந்து கடந்த ஆண்டே ராயுடு விலகினார் என்பது குறிப்பிடத்தக்கது.