நாடாளுமன்றத்தில் ஜூன் 16ம் தேதி காலை அனைத்து கட்சி கூட்டம்

பதிவு செய்த நாள் : 13 ஜூன் 2019 15:22

புதுடில்லி,

நாடாளுமன்றத்தில் ஜூன் 16ம் தேதி காலை அனைத்துக்கட்சி கூட்டம் நடைபெறும் என நாடாளுமன்ற விவகார துறை அமைச்சர் பிரலாத் ஜோஷி தெரிவித்துள்ளார்.

பிரதமர் நரேந்திர மோடி தலைமையிலான அமைச்சரவை  2வது முறையாக பொறுப்பேற்ற பின்னர், முதல் நாடாளுமன்ற கூட்டத்தொடர் வரும் ஜூன் 17ம் தேதி தொடங்குகிறது.

இந்த நாடாளுமன்ற கூட்டத்தொடரில் 38க்கும் மேற்பட்ட சட்ட மசோதாக்கள் தாக்கல் செய்யப்பட உள்ளன.

காஷ்மீரில் குடியரசுத் தலைவர்  ஆட்சியை நீட்டிப்பது, முத்தலாக் தடை உள்பட முக்கியமான பிரச்னைகளுக்காக இந்த மசோதாக்கள் தாக்கல் செய்யப்படுகின்றன.

இதுபற்றி நாடாளுமன்ற விவகார துறை அமைச்சர் பிரலாத் ஜோஷி இன்று கூறும்பொழுது,

நாடாளுமன்றத்தில் வருகிற ஜூன் 16ம் தேதி காலை நாடாளுமன்ற அனைத்து கட்சி கூட்டம் நடைபெறுகிறது. இந்தக் கூட்டத்தொடரில், முக்கிய விவகாரங்கள் பற்றி ஆலோசனை மேற்கொள்ள அன்று மாலை தேசிய ஜனநாயக கூட்டணி தலைமையிலான கூட்டமும் நடைபெறும்.

பா.ஜ.க. நாடாளுமன்ற கட்சி நிர்வாக குழு கூட்டமும் அன்று மாலை நாடாளுமன்றத்தில் நடைபெறும் என  நாடாளுமன்ற விவகார துறை அமைச்சர் பிரலாத் ஜோஷி கூறினார்.