சிரித்துக் கொண்டே சென்றோம், சிரித்துக் கொண்டே வெளியே வந்தோம் - அமைச்சர் ராஜேந்திர பாலாஜி பேட்டி

பதிவு செய்த நாள் : 12 ஜூன் 2019 12:54

சென்னை,

கூட்டத்திற்கு சிரித்துக் கொண்டே சென்றோம், சிரித்துக் கொண்டே வெளியே வந்தோம் என்று அதிமுக நிர்வாகிகள் கூட்டம் குறித்து அமைச்சர் ராஜேந்திர பாலாஜி பதிலளித்துள்ளார்.

நடைபெற்ற 17வது மக்களவைத் தேர்தலில் அதிமுக அணி 1 தொகுதியில் மட்டுமே வெற்றி பெற்றது.

தமிழ்நாடு சட்டசபை இடைத்தேர்தலில் 22 தொகுதிகளில் போட்டியிட்ட அதிமுக, 13 தொகுதிகளை இழந்து 9 தொகுதிகளில் மட்டுமே வென்று ஆட்சியைத் தக்கவைத்துக் கொண்டது. இதனால் அதிமுக தலைமை குறித்து உறுப்பினர்கள் மற்றும் எம்எல்ஏக்களிடையே சர்ச்சை பேச்சு எழுந்தது.

ஒற்றைத் தலைமை – சர்ச்சை பேச்சு

அதிமுகவில் ஒருங்கிணைப்பாளர், இணை ஒருங்கிணைப்பாளர் என இரட்டைத் தலைமைக்குப் பதிலாக ஒற்றைத் தலைமையை உருவாக்க வேண்டுமென்ற கோரிக்கையை எம்.எல்.ஏ., ராஜன்செல்லப்பா முன்வைத்தார்.

அதிமுகவுக்குள் நிலவும் பரபரப்பான அரசியல் சூழலில் அந்தக் கட்சி நிர்வாகிகள் கூட்டம் கட்சியின் ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி தலைமையில் கட்சித் தலைமை அலுவலகத்தில் இன்று காலை நடைபெற்றது.

மக்களவைத் தேர்தல், சட்டப் பேரவை இடைத்தேர்தலுக்குப் பிறகு நடைபெறும் முதல் ஆலோசனைக் கூட்டம் என்பதால் பெரும் எதிர்பார்ப்பை ஏற்படுத்தியது.

கூட்டத்தில் தலைமைக்கழக நிர்வாகிகள், மாவட்டச் செயலாளர்கள், நாடாளுமன்ற உறுப்பினர்கள், அமைச்சர்கள், சட்டப்பேரவை உறுப்பினர்கள் பங்கேற்றனர்.

அதிமுக ஆலோசனைக் கூட்டத்தில் பங்கேற்றுள்ள நிர்வாகிகள் செல்போன் வைத்திருக்க தடை விதிக்கப்பட்டது. கூட்டத்தில் விவாதிக்கப்படும் விஷயங்கள் வெளியே செல்வதை தடுக்க இந்த நடவடிக்கை மேற்கொள்ளப்பட்டது.

அதிமுக நிர்வாகிகள் கூட்டம் நிறைவு பெற்றததும். அதிமுக தலைமை அலுவலகத்திலிருந்து வெளியே வந்த அமைச்சர் ராஜேந்திர பாலாஜியிடம் கூட்டம் குறித்து செய்தியாளர்கள் கேள்வி எழுப்பினர்.

செய்தியாளர்களின் கேள்விக்கு பதிலளித்த ராஜேந்திர பாலாஜி,

அதிமுக தலைமை அலுவலகத்தில் நடைபெற்ற ஆலோசனை கூட்டத்தில் ஒற்றைத் தலைமை விவகாரம் தொடர்பாக பேசவில்லை.

அதிமுக பொதுக்குழு குறித்து முதல்வர், துணை முதல்வர் முடிவெடுப்பார்கள்.

தற்போது உள்ள தலைமை அடிப்படையில் செயல்பட கூட்டம் ஒப்புதல் தந்தது; ராஜன் செல்லப்பாவும் அதை ஏற்றுக் கொண்டார்.

கூட்டத்திற்கு சிரித்துக் கொண்டே சென்றோம், சிரித்துக் கொண்டே வெளியே வந்தோம்.

இவ்வாறு, அமைச்சர் ராஜேந்திர பாலாஜி பதில் அளித்துவிட்டு வேறு எதுவும் பேசாமல் சிரித்துக்கொண்டே சென்றார்.