டாக்டர் எம்.ஜி.ஆர். மருத்துவ பல்கலைக்கழகத்துக்கு ரூ.5 லட்சம் அபராதம் - சென்னை ஐகோர்ட்டு கிளை உத்தரவு

பதிவு செய்த நாள் : 08 ஜூன் 2019 13:39

மதுரை,

அனுமதியின்றி தொலைதூர கல்வியில் மருத்துவ படிப்புகள் துவங்கியதால் டாக்டர் எம்ஜிஆர் மருத்துவ பல்கலைகழகத்திற்கு ரூ.5 லட்சம் அபராதம் விதித்து சென்னை உயர்நீதிமன்ற மதுரைக் கிளை உத்தரவிட்டது.

இந்திய மருத்துவக் கவுன்சில் அங்கீகாரம் பெறாமல் முதுநிலை மருத்துவ டிப்ளமோ படிப்பு நடத்தியதற்கு அபராதம் விதிக்கப்பட்டுள்ளது. அபராத தொகையை அரசு பள்ளிகளின் உட்கட்டமைப்பு வசதிகளுக்கு பயன்படுத்தவும் சென்னை உயர்நீதிமன்ற மதுரைக் கிளை  அறிவுறுத்தியுள்ளது.

தமிழ்நாடு டாக்டர்கள் நலச்சங்கத்தின் பொதுச்செயலாளர் சீனிவாசன், சென்னை உயர்நீதிமன்றத்தில் தாக்கல் செய்த மனுவில் கூறியிருந்ததாவது:–

தமிழ்நாடு டாக்டர் எம்.ஜி.ஆர் மருத்துவ பல்கலைக்கழகத்தின் சார்பில் எம்.பி.பி.எஸ் முடித்தவர்களுக்காக ஓராண்டு மற்றும் ஈராண்டு மருத்துவ பட்டய படிப்புகளுக்கு தொலைநிலைக் கல்வி திட்டத்தின் கீழான சேர்க்கை அறிவிப்பு கடந்த 11.2.2018–ல் வெளியிடப்பட்டது.

இதற்காக மத்திய அரசிடமோ, இந்திய மருத்துவ கவுன்சிலிலோ எந்தவித அனுமதியும் பெறவில்லை.

எனவே தொலைநிலைக் கல்வி திட்டத்தின் கீழ் மருத்துவம் சார்ந்த படிப்புகளை நடத்துவதற்காக வெளியிடப்பட்ட அறிவிப்பை செல்லாது என அறிவித்து உத்தரவிட வேண்டும்.

இவ்வாறு மனுவில் சீனிவாசன் கூறியிருந்தார்.


இந்த மனுவை நீதிபதி எஸ்.எஸ். சுந்தர் விசாரித்தார்.

ஆட்சிமன்ற குழு தீர்மானத்தின் அடிப்படையிலேயே இந்த படிப்புகள் தொலைதூரக் கல்வித்திட்டத்தின் கீழ் நடத்தப்படுகிறது என்று பல்கலைக்கழகத்தின் தரப்பில் கூறப்பட்டது.

“இது போன்ற படிப்புகளை தொலைநிலைக் கல்வி திட்டத்தின் கீழ் நடத்தக் கூடாது. எனவே மருத்துவ படிப்புகளைத் தொலைநிலைக் கல்வி திட்டத்தின் கீழ் நடத்த இந்திய மருத்துவ கவுன்சிலின் அனுமதி பெறவேண்டும்” என இந்திய மருத்துவ கவுன்சில் சார்பில் கூறப்பட்டது.

அனைத்து தரப்பு வாதங்கள் முடிந்த நிலையில் நீதிபதி எஸ்.எஸ். சுந்தர் தீர்ப்பை தேதி குறிப்பிடாமல் ஒத்திவைத்திருந்தார்.

நேற்று நீதிபதி எஸ்.எஸ். சுந்தர் தீர்ப்பை வழங்கினார்.

ஏற்கனவே இது குறித்து பல்வேறு வழக்குகள் தொடரப்பட்டிருந்தன. அந்த வழக்குகளில் பிறப்பிக்கப்பட்ட உத்தரவுகளை மீறியே தொலைநிலைக் கல்வித் திட்டத்தின் கீழ் மருத்துவம் சார்ந்த படிப்புகளை நடத்த அறிவிப்பு வெளியிடப்பட்டுள்ளது. இது மக்களை தவறாக வழிநடத்துவதாகும்.

எனவே, மனுதாரரின் கோரிக்கையை இந்த நீதிமன்றம் ஏற்றுக் கொள்கிறது.

 எம்.ஜி.ஆர் மருத்துவ பல்கலைக்கழகத்திற்கு ரூ.5 லட்சம் அபராதமாக விதிக்கப்படுகிறது.

அபராதப் பணத்தை தமிழகத்தில் உள்ள அரசுப் பள்ளிகளின் வளர்ச்சிக்கு செலவிடும் வகையில் பள்ளிக் கல்வித்துறை செயலாளரிடம் வழங்க வேண்டும்.

இவ்வாறு, நீதிபதி எஸ்.எஸ். சுந்தர் உத்தரவிட்டுள்ளார்.