ஆதிபராசக்தி கோயிலில் ஆய்வு நடத்திய - அறநிலையத்துறை இணை ஆணையர் பணியிட மாற்றம்

பதிவு செய்த நாள் : 07 ஜூன் 2019 12:22

சென்னை,

மேல்வருத்தூர் ஆதிபராசக்தி கோயிலில் ஆய்வு நடத்திய விவகாரம் தொடர்பாக அறநிலையத்துறை இணை ஆணையர் தனபால் பணியிட மாற்றம் செய்யப்பட்டுள்ளார்.

அறநிலைய துறையின் கீழ் கொண்டு வரும் முயற்சியாக மேல்மருவத்தூர் கோயிலில் அறநிலைய துறை அதிகாரிகள் ஆய்வுக்குச் சென்றனர். இதற்கு எதிர்ப்பு தெரிவித்து அதிகாரிகளை தடுத்த ஊழியர்கள் மீது போலீசில் புகார் செய்யப்பட்டது. இது தொடர்பாக போலீசார் விசாரித்து வருகின்றனர்.

மேல்மருவத்தூரில் உள்ள ஆதிபராசக்தி கோயிலை பங்காரு அடிகளார், அவரது மனைவி லட்சுமி பங்காரு அடிகளார் மற்றும் அவரது குடும்பத்தினர் நிர்வகித்து வருகின்றனர். கோயிலில் நடக்கும் தைப் பூசத் திருவிழாவில் லட்சக் கணக்கான பக்தர்கள் குவிவார்கள்.

இந்த கோயில் இந்து அறநிலைய துறையின் கட்டுப்பாட்டில் இல்லாமல் உள்ளது. 

இந்த கோயிலை அறநிலையத்துறையின் கட்டுப்பாட்டில் கொண்டு வருவது குறித்து ஆய்வு செய்ய வேலூர் அறநிலையத்துறை இணை ஆணையர் தனபால் உத்தரவிட்டார்.

இதற்காக காஞ்சிபுரம் அறநிலையத்துறை உதவி ஆணையர் ரமணி தலைமையில் 4 பேர் குழு அமைக்கப்பட்டது. அதிகாரிகள் குழுவினர் மேல்மருவத்தூர் கோயிலில் ஆய்வு செய்ய சென்றனர். அவர்கள் அறநிலையத்துறையின் உத்தரவு நகலை கோயில் ஊழியர்களிடம் காண்பித்து ஆய்வு செய்ய முயன்றனர்.

இதற்கு கோயிலில் இருந்த ஊழியர்கள் கடும் எதிர்ப்பு தெரிவித்து அதிகாரிகளுடன் வாக்குவாதத்தில் ஈடுபட்டனர். இதையடுத்து அதிகாரிகள் கோயிலில் இருந்து வெளியேறினர்.

புகார் மனு

இதுபற்றி உதவி ஆணையர் ரமணி மேல்மருவத்தூர் போலீசில் புகார் செய்தார்.

வேலூர் இந்து சமய அறநிலையத்துறை இணை ஆணையரின் உத்தரவின் பேரில் மேல்மருவத்தூர் ஆதிபராசக்தி கோயிலை ஆய்வு செய்ய சென்றோம். அப்போது கோயிலில் இருந்த ஊழியர்கள் எங்களை பணிசெய்ய விடாமல் தடுத்தனர். மேற்படி கோயிலில் ஆய்வு செய்ய வேண்டி இருப்பதால் தகுந்த பாதுகாப்பு வழங்க வேண்டும். மேலும் பணி செய்யவிடாமல் இடையூறு செய்தவர்கள் மீது நடவடிக்கை எடுக்க வேண்டும்.  இவ்வாறு அந்த புகார் மனுவில் குறிப்பிட்டிருந்தார்

அதிகாரி பணியிட மாற்றம்

ஆதிபராசக்தி கோயிலில் ஆய்வு நடத்திய விவகாரம் தொடர்பாக வேலூர் அறநிலையத்துறை இணை ஆணையர் தனபால் பணியிட மாற்றம் செய்யப்பட்டார்.


அறநிலையத்துறையின் அனுமதியில்லாமல் மேல்மருவத்தூரில் ஆய்வு நடத்தியதால் நடவடிக்கை எடுக்கப்பட்டு உள்ளது.