மும்மொழிக் கொள்கைக்கு இடமில்லை, தமிழகத்தில் இருமொழிக் கொள்கை தொடரும்: செங்கோட்டையன் தகவல்

பதிவு செய்த நாள் : 01 ஜூன் 2019 12:17

சென்னை

தமிழ்நாடு பள்ளிகளில்  தமிழ் - ஆங்கிலம் இருமொழிக் கொள்கையே தொடர்ந்து பின்பற்றப்படும். மும்மொழி கொள்கையை அமல்படுத்த வேண்டும் என்ற  பரிந்துரையை தமிழ்நாடு அரசு ஏற்காது என்று பள்ளிக்கல்வித்துறை அமைச்சர் கே.ஏ. செங்கோட்டையன் தெரிவித்துள்ளார்.

மத்திய அரசின் புதிய கல்விக் கொள்கைக்கான வரைவுத் திட்டத்தில் நாடு முழுவதும் மும்மொழிக் கொள்கையை அமல்படுத்தி, இந்தி பேசாத மாநிலங்களிலும் இந்தியை கட்டாயப் பாடமாக்குமாறு பரிந்துரைக்கப்பட்டுள்ளது.

தமிழ்நாட்டில் தமிழ் - ஆங்கிலம் என்ற இரு மொழிக் கொள்கை பின்பற்றப்படும் நிலையில், மீண்டும் இந்தி திணிப்பு முயற்சி நடைபெறுவதாக எதிர்ப்பு எழுந்துள்ளது.

இந்நிலையில், தமிழ்நாட்டில் பின்பற்றப்படும் இரு மொழிக் கொள்கையில் எந்த மாற்றமும் செய்யப்போவது இல்லை என்றும்,

மத்திய அரசின் புதிய கல்விக் கொள்கையின் மும்மொழி பரிந்துரையை தமிழ்நாடு அரசு ஏற்காது என்றும் பள்ளிக்கல்வித்துறை அமைச்சர் கே.ஏ. செங்கோட்டையன் தெரிவித்துள்ளார்.

தமிழ்நாட்டில் இருமொழி கொள்கையே தொடரும். தமிழக அரசின் கொள்கையை குறித்து முதலமைச்சர் மத்திய அரசுக்கு கடிதம் எழுதுவார் என்றும் அமைச்சர் கே.ஏ. செங்கோட்டையன் தெரிவித்துள்ளார்.