கமல்ஹாசனுக்கு முன்ஜாமீன் கிடைக்குமா? - மதுரை ஐகோர்ட்டில் நாளை விசாரணை

பதிவு செய்த நாள் : 19 மே 2019 16:33

மதுரை,

மக்கள் நீதி மய்யம் கட்சியின் தலைவர் கமலுக்கு முன்ஜாமீன் வழங்கப்படுமா என்பது குறித்து நாளை உயர்நீதிமன்றம் முடிவு செய்கிறது.

மக்கள் நீதி மய்யம் தலைவர் கமல்ஹாசன், அரவக்குறிச்சி இடைத்தேர்தல் பிரசாரத்தில்

சுதந்திர இந்தியாவின் முதல் தீவிரவாதி ஒரு இந்து. அவர் பெயர் நாதுராம் கோட்சே என பேசினார்.

கமல்ஹாசனின் இந்த பேச்சுக்கு பாரதீய ஜனதா மற்றும் இந்து அமைப்புகள் கடும் எதிர்ப்பு தெரிவித்தன.

கமலுக்கு எதிராக போராட்டங்களும் வெடித்தன.

திருப்பரங்குன்றத்தில் அவர் பேசியபோது செருப்பு வீச்சும் நடந்தது.

இந்து முன்னணி அமைப்பைச் சேர்ந்த ராமகிருஷ்ணன், அரவக்குறிச்சி போலீஸ் நிலையத்தில் கமல் மீது புகார் செய்தார். இதன் அடிப்படையில் மதக்கலவரத்தை தூண்டும் வகையில் பேசியது, இந்து மதத்தை இழிவுபடுத்தி பேசியது என 2 பிரிவுகளில் கமல்ஹாசன் மீது வழக்குப் பதிவு செய்யப்பட்டது. டெல்லியிலும், சென்னையிலும்கூட கமல்ஹாசன்மீது பல வழக்குகள் பதிவு செய்யப்பட்டன.

வழக்குகளை ரத்து செய்ய கோரிக்கை

இந்த வழக்குகளை ரத்து செய்து உத்தரவிடக்கோரி, சென்னை உயர்நீதிமன்ற மதுரை கிளையில் கமல்ஹாசன் சார்பில் முறையீடு செய்யப்பட்டது.

அவசர வழக்காக விசாரிக்க விடுக்கப்பட்ட வேண்டுகோளை ஏற்க மறுத்த உயர்நீதிமன்றம், முன் ஜாமீன் கோரி மனுத்தாக்கல் செய்தால் விடுமுறை கால அமர்வில் விசாரிக்கலாம் என தெரிவித்தது.

முன்ஜாமீன்கோரி மனு

கமல்ஹாசன் சார்பில் கடந்த 15-ம்  தேதி முன்ஜாமீன் கேட்டு மனுதாக்கல் செய்யப்பட்டது. இதனை விசாரித்த நீதிபதி புகழேந்தி, இருதரப்பு வாதங்களையும் கேட்ட பிறகு, வழக்கை தேதி குறிப்பிடாமல் ஒத்தி வைத்தார்.

தேர்தல் முடியும் வரை கமலின் சர்ச்சைக்குரிய பேச்சு குறித்து ஊடகங்கள் மற்றும் அரசியல் கட்சியினர் விவாதிக்கக்கூடாது என்றும் கூறினார்.

இந்த நிலையில், மே 20-ம் தேதி மதுரை உயர்நீதிமன்றத்தில் நடைபெற உள்ள வழக்குகளின் பட்டியலில் கமல்ஹாசனின் முன்ஜாமீன் மனு வழக்கும் இடம் பெற்றுள்ளது.

எனவே அவருக்கு முன்ஜாமீன் கிடைக்குமா? என்பது நாளை தெரியவரும்.