இறுதிகட்ட மக்களவை தேர்தல்: 59 தொகுதிகளில் வாக்குப்பதிவு

பதிவு செய்த நாள் : 18 மே 2019 13:10

புதுடில்லி

   மக்களவை தேர்தலின் 7வது மற்றும் கடைசி கட்டமாக, 8 மாநிலங்களில் உள்ள 59 தொகுதிகளில் இன்று வாக்குப்பதிவு நடைபெறுகிறது.

17 மக்களவை தேர்தல் நாடு முழுவதும் 7 கட்டங்களாக நடைபெற்று வருகிறது. அதன்படி கடந்த ஏப்ரல் 11ம் தேதி 91 தொகுதிகளுக்கு முதல் கட்ட தேர்தல் நடந்தது. ஏப்ரல் 18ம் தேதி 96 தொகுதிகளுக்கு 2ம் கட்டமாகவும், ஏப்ரல் 23ம் தேதி 115 தொகுதிகளுக்கு 3ம் கட்டமாகவும், ஏப்ரல் 29ம் தேதி 71 தொகுதிகளுக்கு 4ம் கட்டமாகவும். மே 6ம் தேதி 51 தொகுதிகளுக்கு 5ம் கட்டமாகவும், மே 12ம் தேதி 6வது கட்டமாக 59 தொகுதிகளுக்கும் வாக்குப்பதிவு நடைபெற்றது.

இறுதிகட்ட வாக்குப்பதிவு

7வது மற்றும் இறுதிக் கட்டமாக 8 மாநிலங்களில் உள்ள 59 தொகுதிகளுக்கு நாளை (மே 19ம் தேதி) தேர்தல் நடைபெறவுள்ளது. இதில், பீகார் மாநிலத்தில் 8 தொகுதிகளுக்கும், ஜார்க்கண்ட் மாநிலத்தில் 3 தொகுதிகளுக்கும், மத்திய பிரதேச மாநிலத்தில் 8 தொகுதிகளுக்கும், பஞ்சாப் மாநிலத்தில் 13 தொகுதிகளுக்கும், மேற்குவங்க மாநிலத்தில் 9 தொகுதிகளுக்கும், சண்டிகர் மாநிலத்தில் 1 தொகுதிக்கும், உத்தரபிரதேச மாநிலத்தில் 13 தொகுதிகளுக்கும், இமாச்சலபிரதேச மாநிலத்தில் 4 தொகுதிகளுக்கும் என மொத்தம் 59 தொகுதிகளில் தேர்தல் நடைபெறவுள்ளது.

இந்த 59 தொகுதிகளிலும் கடந்த 10 நாட்களுக்கும் மேலாக அனல் பறக்கும் பிரசாரம் நடைபெற்று வந்தது. பாஜக சார்பில் பிரதமர் மோடி, பாஜக தலைவர் அமித்ஷா, மத்திய அமைச்சர்கள் ஆகியோர் இந்த 8 மாநிலங்களிலும் பேரணி நடத்தி ஆதரவு திரட்டினார்கள். அதுபோல காங்கிரஸ் தலைவர் ராகுல் காந்தி, பிரியங்கா காந்தி ஆகியோரும் பிரம்மாண்ட பொதுக்கூட்டங்களை நடத்தி பிரசாரத்தில் ஈடுபட்டனர்.

மேற்கு வங்க மாநிலத்தில் கலவரம் ஏற்பட்டதால் அங்குள்ள 9 தொகுதிகளிலும் நேற்று முன்தினமே (மே 16ம் தேதி) பிரசாரம் ஓய்ந்தது. மற்ற 50 தொகுதிகளில் நேற்று மாலையுடன் பிரசாரம் முடிவுக்கு வந்தது.

இந்நிலையில், ஞாற்றுக்கிழமை காலை 7 மணிக்கு வாக்குப்பதிவு தொடங்குகிறது. இதற்காக 59 தொகுதிகளிலும் பலத்த பாதுகாப்பு ஏற்பாடுகள் செய்யப்பட்டுள்ளன. பதட்டமான தொகுதிகளில் 5 அடுக்கு பாதுகாப்பு போடப்பட்டுள்ளது.

முதல் 6 கட்ட தேர்தல் மூலம் 483 தொகுதிகளுக்கு ஓட்டுப்பதிவு நிறைவு பெற்றுள்ளது. நாளை 59 தொகுதிகளுக்கு ஓட்டுப்பதிவு முடிந்ததும் 542 தொகுதிகளுக்கான தேர்தல் நிறைவுபெறும். பணப்பட்டுவாடா புகார் காரணமாக நிறுத்தப்பட்டுள்ள வேலூர் தொகுதிக்கு மட்டும் பின்னர் தேர்தல் நடைபெறும்.

நாளை நடக்கும் தேர்தலில் சுமார் 10 கோடி பேர் வாக்களிக்கவுள்ளனர். இதற்காக 59 தொகுதிகளிலும் 1,12,986 வாக்குச்சாவடிகள் அமைக்கப்பட்டுள்ளன. 59 தொகுதிகளில் மொத்தம் 918 வேட்பாளர்கள் களத்தில் உள்ளனர். இவர்களில் பிரதமர் மோடி போட்டியிடும் வாரணாசி தொகுதி மிகுந்த எதிர்பார்ப்பை ஏற்படுத்தியுள்ளது.

நாளை சத்ருகன் சின்கா, ரவிசங்கர் பிரசாத், நிஷா பாரதி, பவன்குமார் பன்சால், சன்னி தியோல் ஆகியோர் தொகுதிகளிலும் வாக்குப்பதிவு நடைபெறவுள்ளது. கடந்த 2014ம் ஆண்டு தேர்தலில் இந்த 50 தொகுதிகளிலும் 33 தொகுதிகளை பாஜக கைப்பற்றியது என்பது குறிப்பிடத்தக்கது.