அமைச்சர் ராஜேந்திர பாலாஜி மீது தேர்தல் ஆணையத்தில் மக்கள் நீதி மய்யம் புகார்

பதிவு செய்த நாள் : 16 மே 2019 16:10

சென்னை,

சுதந்திர இந்தியாவின் முதல் தீவிரவாதி ஒரு இந்து என கமல்ஹாசன் கூறியதற்கு அமைச்சர் ராஜேந்திர பாலாஜி கடுமையாக விமர்சனம் செய்தார். இதையடுத்து மக்கள் நீதி மய்யம் சார்பில் பால்வளத்துறை அமைச்சர் ராஜேந்திர பாலாஜி மீது தேர்தல் ஆணையத்திலும், சென்னை காவல் ஆணையர் அலுவலகத்திலும்  புகார் அளிக்கப்பட்டுள்ளது

மக்கள் நீதி மய்யம் கட்சியின் தலைவர்  கமல்ஹாசன் சமீபத்தில் அரவக்குறிச்சி தொகுதி இடைத்தேர்தலில் பிரச்சாரம் செய்தபோது, முஸ்லிம்கள் அதிகம் வாழும் பள்ளப்பட்டி என்ற ஊரில் பேசுகையில், சுதந்திர இந்தியாவின் முதல் தீவிரவாதி ஒரு இந்து,  இந்து தீவிரவாதம் என்பது பற்றி குறிப்பிட்டு பேசினார்.

கமல் பேச்சுக்கு கண்டனம் தெரிவித்த அமைச்சர் ராஜேந்திர பாலாஜி, 

‘கமல்ஹாசன் நாக்கை மக்கள் அறுப்பார்கள்’ என்று முதல் ஆளாக எச்சரித்து கடுமையாக விமர்சித்தார்.

இதனையடுத்து மக்கள் நீதி மய்ய நிர்வாகி பிரியதர்ஷினி, 

சென்னை காவல் ஆணையர் அலுவலகத்தில், அமைச்சர் ராஜேந்திர பாலாஜி மீது சட்டபூர்வமான நடவடிக்கை எடுக்ககோரி புகார் கொடுத்தார். கொளத்தூர் மற்றும் திரு.வி.க நகர் பொறுப்பாளர்கள், கட்சி நிர்வாகிகள் உடன் இருந்தனர். 

தேர்தல் ஆணையம் சென்று தலைமை தேர்தல் அதிகாரி சத்யபிரதா சாஹுவை சந்தித்து, அமைச்சர் ராஜேந்திர பாலாஜி மீது இன்று புகார் கொடுத்தார் பிரியதர்ஷினி.

மநீம சார்பில் அளித்த புகார் மனுவில்,

‘அமைச்சர் ராஜேந்திர பாலாஜி மக்களை வன்முறைக்கு தூண்டும் வகையில் பேசியுள்ளார். அவர் மீது சட்டப்படி நடவடிக்கை எடுக்க வேண்டும்’ என மக்கள் நீதி மய்யம் சார்பில் அளிக்கப்பட்ட மனுவில் குறிப்பிடப்பட்டுள்ளது.