13 காவல் நிலையங்களில் புகார்: முன்ஜாமீன் கோரி நடிகர் கமல்ஹாசன் மனு

பதிவு செய்த நாள் : 15 மே 2019 18:35

மதுரை,

13 காவல் நிலையங்களில் தன் மீது பதிவு செய்யப்பட்டுள்ள வழக்கில் முன்ஜாமீன் கோரி மக்கள் நீதி மய்யம் கட்சியின் தலைவர் கமல் மனு தாக்கல் செய்துள்ளார்.

அரவக்குறிச்சி சட்டமன்ற இடைத்தேர்தல் பிரச்சாரத்தின் போது மத உணர்வை புண்படுத்தும் வகையில் பேசுதல், மத ரீதியில் மோதலை தூண்டும் வகையில் பேசுதல் என இரண்டு பிரிவுகளில் கமல் மீது காவல் நிலையத்தில் பதிவு செய்யப்பட்டுள்ளது.

மேலும், தமிழ்நாடு முழுவதும் 13-க்கும் மேற்பட்ட காவல் நிலையங்களில் இது போல் புகார் அளிக்கப்பட்டு உள்ளது.

வழக்கை ரத்து செய்ய கோரிக்கை

தன் மீதான வழக்கை ரத்து செய்ய வேண்டுமெனவும், இதனை அவசர வழக்காக விசாரிக்க கோரியும் சென்னை உயர்நீதிமன்ற மதுரை கிளை நீதிபதி புகழேந்தி முன்பாக கமல்ஹாசன் சார்பில் முறையிடப்பட்டது.

அப்போது பேசிய நீதிபதி,

வழக்கு மற்றும் வழக்கு விசாரணைக்கு தடை கோரும் மனுக்களை நீதிமன்ற விடுமுறை கால அமர்வில் விசாரிக்க இயலாது என்றும், வேண்டுமென்றால், மனுதாரர் முன் ஜாமீன் கோரி மனுத்தாக்கல் செய்தால் அதனை பரிசீலிப்பதாக தெரிவித்தார்.

முன்ஜாமீன் கோரி மனுதாக்கல்

நீதிபதியின் உத்தரவையடுத்து, கமல்ஹாசன் தரப்பில் முன் ஜாமீன் கோரி மனுத்தாக்கல் செய்யப்பட்டது.

 இந்த வழக்கு நாளை விசாரணைக்கு வரும் என எதிர்பார்க்கப்படுகிறது.