எந்தவொரு இந்துவும் தீவிரவாதியாக இருக்க முடியாது: கமல் பேச்சுக்கு பிரதமர் மோடி பதில்

பதிவு செய்த நாள் : 15 மே 2019 12:37

புதுடில்லி

எந்தவொரு இந்துவும் தீவிரவாதியாக இருக்க முடியாது என்று பிரதமர் நரேந்திர மோடி, கமல்ஹாசனின் பேச்சுக்கு இன்று பதிலளித்துள்ளார்.

கடந்த மே 12ம் தேதி, மக்கள் நீதி மய்யம் கட்சித் தலைவர் கமல்ஹாசன் அரவக்குறிச்சி தொகுதியில் பிரசாரம் செய்தார். அங்கு பேசிய அவர், “மத நல்லிணக்கம், மத ஒற்றுமை பற்றி பேசுகின்றனர். தேசிய கொடியில் உள்ள 3 வண்ணங்களும் அப்படியே இருக்க வேண்டும் என்று நான் நினைக்கிறேன்

காந்தி சிலை முன்பு நின்றுகொண்டு சொல்கிறேன். சுதந்திர இந்தியாவின் முதல் தீவிரவாதி ஒரு இந்து. அவன் பெயர் நாதுராம் கோட்சே. காந்தியின் கொள்ளுப்பேரனான நான், அந்த கொலைக்கு கேள்வி கேட்க வந்துள்ளேன்” என்று பேசினார். கமலின் இந்த பேச்சு தமிழகம் மட்டுமின்றி இந்தியா முழுவதும் எதிரொலித்து கடும் சர்ச்சையை ஏற்படுத்தியுள்ளது.

பாஜக, அதிமுக தலைவர்கள் கமலின் பேச்சுக்கு கடும் கண்டனம் தெரிவித்துள்ளனர். சிவசேனா கட்சியும் கமலின் பேச்சை கண்டித்துள்ளது. இந்நிலையில், கமல்ஹாசனின் இந்த விமர்சனம் குறித்து பிரதமர் மோடி கருத்து தெரிவித்துள்ளார்.

இதுகுறித்து பேசிய பிரதமர் மோடி,

”எந்தவொரு இந்துவும் தீவிரவாதியாக இருக்க முடியாது. உலகமே ஒரு குடும்பம் என்பதே இந்து தர்மத்தின் ஆழமான நம்பிக்கை ஆகும். ஒருவர் பயங்கரவாதியாக இருந்தால், அவர் நிச்சயம் இந்துவாக இருக்க முடியாது” என பதிலளித்துள்ளார்.

பிரதமர் கருத்துக்கு தமிழிசை வரவேற்பு

தூத்துக்குடியில் செய்தியாளர்களுக்கு பேட்டி அளித்த தமிழக பாஜக தலைவர் தமிழிசை சவுந்தரராஜன்,  

தீவிரவாதத்திற்கு எந்த மதமும் கிடையாது, பிரதமரின் கருத்து மிகச் சரியானது என்று கூறினார்.