நெசவாளர்கள் கடன் ரூ.65 கோடி தள்ளுபடி: முதல்வர் எடப்பாடி பழனிசாமி வாக்குறுதி

பதிவு செய்த நாள் : 15 மே 2019 11:16

சூலூர்,          

கைத்தறி, விசைத்தறி தொழிலாளர்கள், நெசவாளர்கள் வீடுகட்டும் கூட்டுறவு கடன் சங்கத்தின் மூலம் பெற்ற கடன் தொகை ரூ.65 கோடி தள்ளுபடி செய்யப்படும் என்று முதல்வர் எடப்பாடி கே.பழனிசாமி வாக்குறுதி அளித்தார்.

சூலூர் சட்டசபை தொகுதி இடைத்தேர்தலில் அதிமுக சார்பில் போட்டியிடும் வேட்பாளர் வி.பி.கந்தசாமியை ஆதரித்து தமிழக முதல்வர் எடப்பாடி பழனிசாமி தொகுதிக்கு உள்பட்ட சின்னியம்பாளையம், கணியூர், வாகராயம்பாளையம் உள்ளிட்ட பகுதிகளில் செவ்வாய்க்கிழமை பிரசாரம் செய்தார். அப்போது அவர் பேசியதாவது:

கைத்தறி நெசவாளர்களுக்கு 250 யூனிட் இலவச மின்சாரம், விசைத்தறி நெசவாளர்களுக்கு 750 யூனிட் இலவச மின்சாரம் வழங்கும் மாநிலம் தமிழ்நாடு. கைத்தறி, விசைத்தறி தொழிலாளர்கள், நெசவாளர்கள் வீடுகட்டும் கூட்டுறவு கடன் சங்கத்தின் மூலம் 31.3.2017-க்கு முன்பு பெறப்பட்ட கடன் தொகை ரூ.65 கோடி தள்ளுபடி செய்யப்படும். நெசவாளர்களை பாதுகாக்கும் அரசாக இந்த அரசு விளங்குகிறது.

ஆளுங்கட்சியான அதிமுக சார்பில் போட்டியிடும் வேட்பாளர் வெற்றி பெற்றால்தான் தொகுதி மக்கள் பயனடைய முடியும். திமுக வேட்பாளர்களோ, அமமுக வேட்பாளர்களோ வெற்றி பெறுவதால் அவர்களது எம்எல்ஏ.க்களின் எண்ணிக்கை வேண்டுமானால் கூடலாம். மக்களுக்கு அதனால் ஒரு பயனுமில்லை.

இத்தனை ஆண்டுகளில் திமுக எம்எல்ஏ ஒருவர்கூட என்னை நேரில் சந்தித்து தங்களது தொகுதிக்குத் தேவையான உதவிகள் குறித்து மனு அளித்ததில்லை. எனவே தகுதியான வேட்பாளர்களை மட்டுமே மக்கள் தேர்வு செய்ய வேண்டும்.
மு.க.ஸ்டாலின் தனது பிரசாரத்தின்போது நடைமுறைக்குச் சாத்தியமில்லாத வாக்குறுதிகளை அளித்து மக்களை ஏமாற்றி வருகிறார். அதிமுக ஆட்சியைக் கவிழ்க்க வேண்டும் என்ற ஒற்றைக் குறிக்கோளுடன் டிடிவி.தினகரன் வலம் வருகிறார்.

மூன்றாவது அணி அமைக்கும் முயற்சியில் ஈடுபட்டுள்ள தெலங்கானா முதல்வர் சந்திரசேகர ராவை மு.க.ஸ்டாலின் சந்தித்துள்ளார். இது நிலையான சிந்தனை இல்லாமல் ஸ்டாலின் செயல்படுவதையே காட்டுகிறது.

சென்னையில் மட்டும் சுமார் 2.25 லட்சம் கண்காணிப்பு கேமராக்கள் பொருத்தப் பட்டுள்ளன. இதேபோல தமிழகத்தின் பல்வேறு முக்கிய நகரங்களிலும் கண்காணிப்பு கேமராக்களின் எண்ணிக்கை அதிகப்படுத்தப்பட்டுள்ளன. இதனால் குற்றச்செயல்கள் பெருமளவு குறைக்கப்பட்டுள்ளன.

தமிழகத்தில் சட்டம் ஒழுங்கில் சிறந்து விளங்கும் மாவட்டமாக கோவை மாவட்டம் திகழ்கிறது. அதிலும் குறிப்பாக இந்தியாவிலேயே சிறந்த காவல் நிலைய விருதை கடந்த ஆண்டு கோவை ஆர்.எஸ்.புரம் காவல் நிலையம் பெற்றுள்ளது.

சூலூர் சட்டப் பேரவைத் தொகுதிக்கு உள்பட்ட இருகூர் பேரூராட்சியில் ரூ. 22 கோடியிலும், சின்னியம்பாளையம் பகுதியில் ரூ. 5 கோடி மதிப்பிலும், நீலாம்பூர் பகுதியில் ரூ. 2.5 கோடி மதிப்பிலும் பல்வேறு வளர்ச்சிப் பணிகள் மேற்கொள்ளப் படுகின்றன. இப்பகுதி மக்களின் 60 ஆண்டு காலக் கோரிக்கையான அத்திக்கடவு -அவிநாசி திட்டத்துக்கான பணிகள் தொடங்கப்பட்டு முழு வீச்சில் நடைபெறுகின்றன என்றார் முதல்வர் பழனிசாமி.