எண்ணெய் இறக்குமதி செய்வது குறித்து தேர்தலுக்குப் பின் முடிவு செய்யப்படும்: ஈரானிடம் இந்தியா கூற்று

பதிவு செய்த நாள் : 15 மே 2019 11:06

புதுடில்லி,                 

ஈரானிடம் இருந்து எண்ணெய் இறக்குமதி செய்வது தொடர்பாக, தேர்தலுக்கு பின்னர் முடிவு செய்யப்படும் என்று அந்நாட்டு வெளியுறவுத்துறை அமைச்சரிடம் சுஷ்மா ஸ்வராஜ் கூறியுள்ளார்.

ஈரானிடம் இருந்து அதிக அளவு கச்சா எண்ணெய் கொள்முதல் செய்யும் நாடாக இந்தியா இருந்து வந்தது. இதற்கிடையில், அணுசக்தி ஒப்பந்தத்தில் இருந்து வெளியேறுவதாக அமெரிக்க அதிபர் டொனால்ட் டிரம்ப் கடந்த ஆண்டு அறிவித்தது முதல், ஈரான் மீது பல்வேறு பொருளாதார தடைகளை அமெரிக்கா விதித்து வருகிறார்.

ஈரானிடம் இருந்து கச்சா எண்ணெய் கொள்முதல் செய்ய அளித்த சலுகைகளையும் கடந்த 1ம் தேதியோடு அமெரிக்கா ரத்து செய்தது. இதனால், ஈரானிடம் இருந்து கச்சா எண்ணெய் கொள்முதல் செய்த இந்தியா, சீனா உள்ளிட்ட நாடுகள் கடும் நெருக்கடியை சந்தித்துள்ளன.

இந்த சூழலில், ஈரான் வெளியுறவுத்துறை அமைச்சர் ஜாவத் ஷாரீப், 2 நாள்கள் அரசுமுறைப் பயணமாக இந்தியாவுக்கு வருகைத் தந்தார். இந்திய வெளியுறவுத்துறை அமைச்சர் சுஷ்மா சுவராஜை சந்தித்து ஜாவத் ஷாரீப் பேசினார்.

இந்த சந்திப்பின் போது,”ஈரானிடம் கச்சா எண்ணெய் இறக்குமதி செய்வது குறித்து பாராளுமன்றத் தேர்தலுக்கு பின்னர் முடிவு செய்யப்படும். இந்தியாவின் எரிசக்தி பாதுகாப்பு மற்றும் பொருளாதார நலன் கருதியே இந்த முடிவு எடுக்கப்பட்டுள்ளது” என்று சுஷ்மா சுவராஜ் கூறியதாக தகவல்கள் கிடைத்துள்ளன.

ஈரானிடம் இருந்து கச்சா எண்ணெயை வாங்குமா இல்லையா என்பது தேர்தல் முடிந்து அமையவுள்ள புதிய அரசுதான் முடிவு எடுக்கும் என்பது குறிப்பிடத்தக்கது.