ஆன்மிக கோயில்கள் : தீராத வியாதிகளை தீர்க்கும் யோக நரசிம்மர்!

பதிவு செய்த நாள் : 12 மே 2019

தல வரலாறு:     பக்த பிரகலாதனுக்காக காட்சி கொடுத்த நரசிம்மரின் அவதாரத்தை தாங்களும் தரிசிக்க வேண்டுமென வாமதேவர், வசிஷ்டர், கத்யபர், அத்திரி, ஜமத்கனி, கவுதமர், பரத்வாஜர் ஆகிய சப்தரிஷிகளும் சோளிங்கர் யோக நரசிம்மர் கோவிலுக்கு வந்து தவமிருந்தனர். ஒரு காலத்தில் விசுவாமித்திரர் இத்தலத்தில் சிறிது நேரம் நரசிம்மனை வழிபட்டு ‘பிரம்மரிஷி’ பட்டம் பெற்றாராம். ராமாவதாரம் முடிந்ததும் ராமன் ஆஞ்சநேயரிடம், “இந்த மலையில் தவம் செய்யும் ரிஷிகளுக்கு அரக்கர்களால் இடைஞ்சல் ஏற்படுகிறது. அதை போக்கி வை,’’ என்றார். அதன்படி ஆஞ்சநேயர் இங்கு வந்து காலன், கேயன் என்னும் இரு அரக்கர்களுடன் சண்டை செய்ய, அது முடியாமல் போனதால் ராமனை வழிபட்டு அவரிடமிருந்து சங்கு, சக்கரங்களை பெற்று அதன் மூலம் அரக்கர்களை அழித்து ரிஷிகளை காப்பாற்றினார். கடைசியில் ரிஷிகளின் தவத்தினை மெச்சிய பெருமாள் அவர்களது விருப்பப்படி நரசிம்ம மூர்த்தியாக காட்சி கொடுத்தார். ஆஞ்சநேயர் நரசிம்மர் கோயில் உள்ள மலைக்கு அருகில் உள்ள சிறிய மலையில் “யோக ஆஞ்சநேயராக’ சங்கு சக்கரத்துடன் அருள்பாலித்து வருகிறார்.

தல பெருமை:  பெருமாளின் 108 திருப்பதிகளில் நம்மாழ்வார், திருமங்கையாழ்வார், பேயாழ்வாரால் மங்களாசாசனம் செய்யப்பெற்ற சோளிங்கர் திருத்தலம் வேலூர் மாவட்டத்தில் அமைந்துள்ளது. இங்கு 500 அடி உயரமுள்ள கடிகாசலம் என்ற பெரிய மலை மீது மூலவரும், அதன் அருகிலுள்ள சிறிய மலையில் சங்கு சக்கரத்துடன் ஆஞ்சநேயரும், கீழே உற்சவரும் அருள்பாலிக்கிறார்கள். முதலில் பெருமாளை தரிசித்து விட்டு பின் ஆஞ்சநேயரை தரிசிப்பது வழக்கம். இத்தலத்தில் ஒரு கடிகை (24 நிமிடங்கள்) இருந்தாலே மோட்சம் கிடைக்கும் என்பது ஐதீகம்.

சிறிய மலை : பெரிய மலைக்கு எதிரில் இயற்கை அழகோடு 406 படிகள் அமைந்து அழகிய குன்றின் மீது அமைந்துள்ளது எழில்மிகு யோக ஆஞ்சநேயர் கோயில். யோக ஆஞ்சநேயருக்கு நான்கு கைகள் உள்ளன. ஒரு கையில் சங்கு, ஒரு கையில் சக்கரம், மற்ற இரு கைகளில் ஜபமாலை உள்ளது. சிறிய மலையிலிருந்து பார்த்தால் யோக ஆஞ்சநேயரின் கண்கள் நேராக பெரிய மலையில் உள்ள யோக நரசிம்மரின் திருவடி நோக்கி அமைந்துள்ளது.பேய் பிசாசு பிடித்தவர்கள் தீராத நோயினால் வருந்துபவர்கள் இம்மலைச் சுனை(குளம்) நீரில் விதிப்படி மூழ்கிப் படிகளில் படுத்துக் கிடந்து வாயு குமாரனை நினைத்து எண்ணிய வரம் பெறலாம்.

இத்தலத்து பெருமாள், ஒரே கல்லால் ஆன மலை மீது அருள்பாலிக்கும் தன்னை 1500 படிகள் ஏறி வந்து தரிசித்தாலே பலன் தந்து விடுவார் என்று பக்தர்கள் நம்புகின்றனர். 

தொண்டை நாட்டு 22 திவ்யதேசங்களில் ஒப்பற்ற திவ்யதேசம் இது.  காஞ்சிபுரத்திற்கும், திருவேங்கடமலைக்கும் இடையி லுள்ள திவ்ய தேசம் ஆகும். சப்தரிஷிகளுக்காக கோபம் தணிந்து யோக முத்திரையில் தியான கோலத்தில் காட்சியளித்த இடம். இம்மலையில் உள்ள மூலிகை மரங்களால் இங்கு வரும் ரத்த கொதிப்பு, இதயநோய் பிரச்னை உள்ள பக்தர்கள் குணமாகின்றனர். பராங்குச சோழன் கட்டிய 3ம் நூற்றாண்டு கோயில் இது.

நேர்த்திக்கடன்: கல்கண்டு படைத்தல், வெல்லம் படைத்தல், வாழைப்பழம் தருதல், வேட்டி, சேலை படைத்தல், தயிர் சாதம் செய்து பிரசாதம் படைத்தல், அபிஷேக ஆராதனைகள் ஆகியவை இங்கு முக்கியமான நேர்த்திக்கடன்களாக பக்தர்களால் கடைப்பிடிக்கப்படுகின்றன. வெள்ளிக் கிழமைதோறும் பெருமாளுக்கும் தாயாருக்கும் திருமஞ்சனம் (அபிஷே கம்) நடைபெறும். திருமேனியில் சேர்க்கப்படும் பால், தயிர், தேன், சர்க்கரை முதலியவற்றின் கட்டிகளைப் பஞ்சாமிர்தம் என்பது வழக்கு. இதுவே பிரசாதமாக வழங்கப்படுகிறது. வெள்ளிக் கிழமைகளில் எவரேனும் தாயாருக்கு பிரார்த்தனை கட்டணம் செலுத்தினால் உற்சவம் நடைபெறும்.

பிரார்த்தனை : இத்தலத்தில் உள்ள நரசிம்மரை வணங்கினால் புத்தி சுவாதீனம், பில்லி சூன்யம், ஏவல், தீராத வியாதி ஆகிய பிரச்னைகள் தீரும். ஆண், பெண் சேராமை (தாம்பத்ய பிரச்னை), குழந்தை யின்மை, திருமணத்தடை ஆகிய கஷ்டங்கள் தீர்வதற்காகவும் பக்தர்கள் வழிபாடு செய்து கஷ்டம் நீங்கப் பெறுகிறார்கள். இத்தலத்தில் வழிபட்டால் வியாபார நஷ்டம், பசி, மூப்புத் துன்பம் ஆகிய பிரச்னைகள் தீர்ந்து சுபிட்சம் ஏற்படுகிறது.

இங்கு  நரசிம்ம குளத்தில் நீராடினால் பிரம்மஹத்தி தோஷம் கூட  நீங்கும் என்பது ஐதீகம். மன நோய் உள்ளவர்கள், புத்திர பாக்கியம் வேண்டுபவர்கள், தீராத நோய்களால் பாதிக்கப்பட்டவர்கள் இங்குள்ள குளத்தில் நீராடி மலை மீதுள்ள பெருமாளையும், அருகில் உள்ள ஆஞ்சநேயரையும் வழிபாடு செய்ய வருகின்றனர்.

திருவிழா: கார்த்திகை திருவிழா. - 5 வெள்ளி 5 ஞாயிற்றுக் கிழமைகளில் - இத்திருவிழா இங்கு மிகவும் விசேஷம். சித்திரை -பிரம்மோற்சவம்- 10 நாட்கள் இவ்விழாவிலும் ஆயிரக்கணக்கான பக்தர்கள் கலந்து கொள்வர். வைகாசி - நரசிம்ம ஜெயந்தி, காஞ்சி கருடசேவை. ஆடி - திருவாடிப்பூர உற்சவம். ஆவணி -திருப்பவித்ரோற்சவம். புரட்டாசி - நவராத்திரி. ஐப்பசி - மணவாளமாமுனி உற்சவம். மார்கழி- பகல் பத்து, ராப்பத்து உற்சவம்.  தைப்பொங்கல். மாசி - தொட்டாச்சார்யா உற்சவம்      

திறக்கும் நேரம்: மலைக்கோயில்களில் காலை 8.00 மணி முதல் மாலை 5.30 மணி வரை தரிசனம் செய்யலாம்.

முகவரி : யோக நரசிம்மர் திருக்கோயில், சோளிங்கர் – 631 102, வேலூர் மாவட்டம்.